| Forsa hende pa duna karchi di voto, kastikabel |
 |
 |
| Wednesday, 12 September 2012 15:06 | |||
 Gezaghèber señora dr. Lydia Emerencia i Representante di Reino, Wilbert Stolte, a risibí informashon for di diferente huki ku tin personanan ku ta bai den e barionan pa tuma e karchinan di votashon i asta ta eksihí ku e personanan mester entregá nan karchi di votashon.
E grupo di persona aki ta bisa ku esaki ta un forma di protesta i asta nan ta pone hendenan bou di preshon pa nan entregá nan karchi di votashon. Gezaghèber i Representante di Reino ta preokupá ku e desaroyo aki i pa medio di esaki ta pone bon kla ku entrega di un karchi di votashon na terseronan ta únikamente posibel na momentu ku un persona mes skohe pa outorisá otro persona, di manera ku e persona ei por vota p’e (apoderashon/volmacht). No ta permití pa pone otronan bou di preshon pa entregá nan karchi di votashon o pa bai vota. Esei por kondusí na un echo kastigabel, konforme artíkulo 131 (Kódigo Penal di Hulanda Karibense): “lo kastigá es ku, den kaso di un elekshon preskribí konforme lei, dor di uso di agreshon o menasa, intenshonalmente stroba un persona di hasi uso di su derecho di vota libremente, ku un kastigu di prison di maskimalmente un aña.Personanan ku a entregá nan karchi di votashon obligá, no por buska un karchi di votashon remplasante na Entidat Públiko Boneiru. Personanan ku a pèrdè nan karchi di votashon, tampoko por buska un karchi nobo mas. E fecha pa buska un karchi nobo a vense 10 di sèptèmber último.
Sin karchi di votashon no ta posibel pa bai vota. Si ainda bo no sa pa ken bo ke vota, bo por haña informashon di e partidonan polítiko via nan wèpsait, kaminda tambe tin informashon tokante di nan programanan elektoral. Ademas algun partido ta hasi kampaña riba e islanan. Entidat Públiko Boneiru ta responsabel pa e organisashon di e elekshon di Tweede Kamer. RCN ta responsabel pa e kampaña di informashon pa stimulá hendenan pa bai vota i e reglanan pa ku votashon. Gezaghèber i Representante di Reino ta enfatisá nan konseho pa kada suidadano hasi uso di su derecho di voto. Ta un derecho atkerí, ku no tur kaminda ta asina komun.
|
Mustra/Kita e formulario di comentario
