Diputado serfilia na selebrashon dia di Boneiru na Aruba

Wednesday, 12 September 2012 15:59

Resientemente tabatin selebrashon di Dia di Boneiru na Aruba tabata un éksito rotundo. Diputado enkargá ku kultura tambe tabata presente pa presensia e bunita selebrashon Dia di Boneiru na Aruba.

Mainta e selebrashon a kuminsá kaminda un grupo verkèner a hasi nan entrada bou di ritmo di drùmbènt kargando bandera di Boneiru i Aruba riba un tapeit kòrá for entrada di Klup Boneriano te práktikamente n’e esenario kaminda a hisa nan i kanta himno di Aruba, interpretá pa e hóben kantante Edjeen Semeler di un tata boneriano i Grupo Tuti Fruti a kanta e himno di Boneiru. Tabatin diskurso di presidente di komishon organisadó Jairo Evertsz, siguí pa gezaghèber di Boneiru dr. Lydia Emerencia i por último minister presidente mr. Mike Eman. Den oranan mas lat atardi, diputado enkargá ku kultura sra. Silvana Serfilia a duna inisio na e tremendo simadan ku a tuma lugá na Sanikolaas i na e okashon aki e la bisa ku esaki ta trese e lasonan mas serka di otro i asina mantené fraternidat den e tres pueblonan di Aruba, Boneiru i Kòrsou pa despues e duna inisio na e simadan ku a tèrmina na Klup Boneriano pa despues e selebrashon kultural sigui te den oranan di anochi. Na e okashon aki tabatin entrega di plakat di rekonosementu di parti gobièrnu di Boneiru dor di diputado di kultura Silvana Serfilia komo muestra di apresio na tres persona ku ta lucha inkansabelmente pa e dos klupnan di Bonerianonan residensiá na Kòrsou i Aruba i asina yuda mantené amistat entre e pueblonan huntu i yuda otro.

Diputado Serfilia a pidi pa sigui ku e tipo di interkambionan aki pa asina nos mantené e parti hermandat ku sèmper e pueblonan aki tabatin i asina fortifiká e lasonan familiar i fraternidat den e tres pueblonan aki.Dipuatdo Serfilia hasi entrega di e plakat na sr. Jairo Evertsz komo presidente di organisashon na Aruba ku a organisá e gran selebrashon di Dia di Boneiru na Aruba i komo miembro di e grupo musikal krioyo Rincon Boyz komo embahador di Boneiru na Aruba, meskos na Alex Molina di grupo Kòmpèr Kòrsou i na sr. August Albertus di Union Mutualista Boneriano huntu ku nan respektivo direktivanan ku ta hasiendo un bon trabou pa asina e lasonan di amistat fraternal keda biba entre e pueblo di Aruba Boneiru i Kòrsou.