Boneiro a biba cu Buleria durante “Bonaire Regatta 2023”

Bonaire Regatta Festival tabata un exito rotundo. E isla di flamingo a conta cu presentacion di varios talento di Aruba, manera Buleria acompaña pa Claudius Philips. Diabierna anochi pueblo di Boneiro a yega hunto pa gosa di e presentacionnan di Buleria, JC & Friends y mas!

Mama mia…

“Nos ta bendiciona”,  tabata e prome palabranan di Rodrick “Rocco” Franken , cantante den Buleria, despues di a presenta y bolter Boneiro. Franken a expresa cu Buleria tin masha hopi fanatico na Boneiro. E banda ta ansioso pa sa con lo bay dia 22 di december proximo, ora lo tin un fiesta den espera di fin di aña. Semper Boneiro a duna Buleria calor. Por spera Buleria atrobe na Boneiro riba Dia di Rincon. 

Jeanchrisjair “Buddy” Vesprey ta un di e talentonan den Buleria. Vesprey a comenta cu cada biaha cu nan presenta na nan di tres cas, esta Boneiro, semper ta un sentimento extraordinario y esaki no tabata un excepcion durante Bonaire Regatta. “Hendenan a biba cu nos, nos ta purba semper pa trece e ambiente di Carnaval”, asina Vesprey a expresa. Tin poco cancion romantico a resona y e publico a sa di ricibi esakinan tambe. P’e siguiente lunanan, por spera mas produccion di Buleria. Buddy lo participa den Caiso & Soca Monarch.

Claudius Philips a acompaña Buleria y duna un tremendo show aya na Boneiro. “Semper ta great pa presenta dilanti di e publico di Boneiro”, Philips a expresa.  El a sigui conta cu semper e publico ta biba cu e presentacion. E parti bon ta cu su cancionnan a pega asina bon cu e publico sa e letranan. Claudius ta gusta interactua cu e publico y laga nan sinti cu nan tambe ta parti di e show. Tin mas cancion lo sali den algun siman. Tur luna e lo saca un cancion mirando cu tin masha hopi warda. 

Hisa buta na Bonaire Regata
Jurnick Clarenda, ta forma parti di JC & Friends, el a conta cu e banda ta existi pa cinco aña caba. For di momento cu el a subi stage el a sintie na cas. Jurnick a conta cu aña pasa nan a “hisa buta”. Nan tin hopi presentacion durante henter aña. Te cu ainda nan no a presenta na Aruba pero nan a presenta na Corsou y Hulanda. Nan lo graba varios cancion y lo saca un album. Por sigui nan riba Facebook JC & Friends.