| Presidente di SAC contento: Apesar di algun obstaculo cu a presenta Carnaval 58 a culmina exitosamente! |
 |
 |
| Tuesday, 21 February 2012 21:26 |
|
Un fayo tecnico di grupo Tsunami a pone cu el a cuminza un ora mas laat, pero importante ta cu a logra cabe segun schedule, y cu prome cu solo a baha ya caba el a yega DOW. Tecla Kelly a bisa cu tabata tin un gap chikito pero a logra trece tur hende hunto y sigui normal y tur hende a haya espacio pa baila y goza di nan participacion. Den e prome paradanan SAC a traha hopi cera cu Cuerpo Policial, manera sra. Trudy Hassel a bisa, sinembargo e Parada Grandi a bay na style tradicional, cu polisnan cu a join hunto cu e gruponan y hunto cu SAC a tene e gruponan hunto pa evita cu algo por a bay foi man. E fayo tecnico ta algo cu por pasa, pero no tabata tin mucho efecto riba e parada y presidente di SAC ta gradici tur cu a yuda pa e parada por a sigui. El a a splica cu un bez cu e parada a ranca sali tur cos a bay segun schedule. E hecho cu tabatin menos participante e biaha aki, e tin entendi for di esnan cu no a participa ta pa prome e situacion financiero dificil cu no ta permiti gasta placa manera antes, y cu ta pone cu hopi hende ta wak e florin di su dos banda, prome cu bay gasta placa. Di dos e seguridad cu ta pone hende bira mas cauteloso, mirando cu anteriormente tabata tin hasta matamento di un persona na final di un parada. Segun Tecla Kelly Carnaval 58 no tabata uno facil. For di inicio tabata tin algun contratempo cu a keda bin y a pone cu nan a bay atras den diferente aspecto, por ehemplo e preparacionnan cu mester a cuminza mas tempran y mester a core contra holoshi, pero mester a cumpli cu e schedule y e programa cu tabata tey caba sin haci mas cambio pa no bira un free for all, loke no tabata e intencion. Presidente di SAC a bisa cu e parada grandi di Diadomingo tabata e centro di tur cos, y tur hende a haci nan best pa e bira un parada exitoso. |
Mustra/Kita e formulario di comentario
