|
Diaranson atardi na Palm Beach Plaza Stichting Musica a duna di conoce cu oficialmente e benta di caarchi pa e evento carnavalesco mas grandi di Aruba a sali na benta. Manera ta conoci e conocido Calypso and Roadmarch contest e aña aki ta wordo organisa pa Stichting Musica y ta hiba e nomber di Aruba Caiso & Soca Monarch.
E magno evento ta cuminsa otro siman diamars dia 15 di January 2013. Lo tin un total di tres anochi di pre final. E anochi final mes lo ta diasabra dia 19. Tur anochi lo tuma lugar den Joe Laveist na San Nicolas. Pa e publico tin dos opcion pa loke ta carchi di entrada. Lo por cumpra pa cada anochi un carchi of por cumpra un pakete cu ta duna e persona aceso na 4 anochi di musica. E carchinan ta obtenibel na Plaza Bookshop, Cliffix, CD & More, Superfood, Wema, Valero Boulevard, Valero Essoville, Gallo Rojo, MY USA, Fun Miles y Dragon CD & Electronics.
Despues cu diadomingo ultimo e bandanan a inscribi Stichting Musica a comparti e sequencia pa cada anochi. Diamars dia 15 di January 2013 lo presenta riba e escenario: Tsunami, Le Groove, Youth Xtreme, Upgrade Music y Je’o. Ariba diaranson dia 16 di January 2013 lo tin: Simpletamente Pabo, Claudius y OREO, Virus Band, XC Lanz, Hot Ones Band y D’licious. Ariba e ultimo anochi di pre final lo tin: The Failures, D.U.R.O., NBO, Aruba Invaders, Thiss and That, Zeta Band, Dushi Band y Robert Jeandor y su Solo Banda Show.
Presente na e conferencia di prensa tambe tabata Sr. Erik Jan Eman kende ta representa Purple Entertainment Group. E compania aki ta encarga cu tur e trabounan di logistica y a duna di conoce cu e aña aki e musiconan lo bay conoce un area sumamente comodo y practico patras di escenario. Tambe e publico lo bay mira pa promer biaha den e festival di mas grandi no menos cu 36 moving lights cu lo duna un efecto di luz nunca bisto riba e escenario.
Stichting Musica tambe ta hopi contento di por conta cu patronisadornan cu ta hasi e festival aki di cual Setar NV tambe tabata presenta pa elabora riba e hecho cu nan lo ofrece e festival por medio di pay per view via cable y tambe internet pa escnan den exterior. Romar Trading cu su producto Heineken lo percura tambe pa tur e barnan ta bon surti durante e anochi. Otro patronisadornan ta e.o. Blackberry, Palm Beach Plaza Mall, Valero Retail y Hertz Lease.
 |
Mustra/Kita e formulario di comentario
