Receientemente tabatin un reunion na parlamento cu WAB, AHATA y AAS. Den e reunion aki solamente tabata presente e presidente di e comision Dumfries, MPA sr. Lampe cu a bin laat. Sra van Poppel. AVP no tabata presente ni e miembronan di MEP di e comision tabata presente.

Durante conferencia di prensa lider di MPA parlamentario Monica Kock a trece dilanti cu durante un reunion cu AHATA a resulta cu na mei turismo a cay cu 16,9%. Segun AHATA den e prome cuartal Aruba a perde na roomtax 27 miyon florin. Den esaki MPA ta puntra unda e Plan van Aanpak ta pa e sector aki? Ta mustra cu di parti di Gobierno ta masha keto mes. E recesion economico ta afectando Aruba den diferente sector pero di parti di Gobierno no tin in plan di accion pa e situacion aki.

Diamars anochi tabatin e conferencia di FTA cu tema dialogo social caminda diferente oradornan invita a hiba palabra. Otmar Oduber tabata presente e anochi ey y ta indica cu e exposicionnan presenta pa Dr. Ana Teresa Romero, directora di Oficina di OIT Caribe como tambe di Sr. Erwin Koense, dirigente sindical di Corsow tocante dialogo social y su beneficionan tabata hopi educativo. E dos oradornan aki a mustra riba e importancia di un dialogo social, caminda cu por deduci cu e no ta un opcion sino un necesidad pa atende cu e problemanan y su solucionnan caminda cu esakinan ta conta cu e sosten amplio den comunidad.

Recientemente un delegacion di S.A.D.A. (Sindicato Aduana Di Aruba) tabata di bishita na Cas di Partido AVP na Playa pa un combersacion cu representantenan di partido AVP. E delegacion di S.A.D.A. su meta tabata pa combersa cu representantenan di partido ariba un cantidad di topiconan cu ta importante pa S.A.D.A. y particularmente Douaneronan.