Recientemente prome minister Nelson Oduber a papia na radio ta splica tocante e acuerdo cu Gobierno a cera (of ta cerando) cu Valero.  Su declaracion a pone Serge Mansur di Democracia Real pensa hopi riba e periodo prome cu introduccion di BBO, caminda cu henter partido MEP tabata den prensa henter dia pa splica con beneficioso y magnifico e introduccion di BBO lo ta pa Aruba y su comunidad. E tempo ey nos tabata bon altanto cu e unico motivo cu BBO a wordo introduci tabata door di e desesperacion pa placa di parti di Gobierno. Encontra di tur conseho ela wordo introduci, y nos tur sa con horroroso e efectonan di BBO a resulta pa nos comunidad. Click read more.

Durante e reunion di tratamento di presupuesto supletorio 2008 di Ministerio di Turismo y Transporte, fraccion di RED a presenta e siguiente mocion tocante e proyecto di mudamento di waf di container pa Barcadera: “tumando na cuenta cu pa loke ta e proyecto di waf MTBS a entrega diferente rapport cu cifra diferente pa loke ta e factibilidad financiero di e projecto aki, tumando na cuenta cu ta trata di un projecto di centenares di miyon di florin y cu e posibel riesgo di perdida financiero pa Pais Aruba lo ta hopi grandi, tumando na cuenta e magnitud financiero aki di e proyecto y cu tin instancianan manera CAD, CBA y AIB cu por duna conseho objetivo y imparcial riba e cifranan di factibilidad presenta dor di MTBS, ta urgi Gobierno pa aserca CAD of otro instancia menciona cu e tarea pa controla y duna conseho riba e cifranan di factibilidad menciona den e diferente rapport di MTBS pa loke ta nan veracidad y realismo”.