Diabierna polis a wordo pidi pa asisti na Colegio Arubano unda cu tin entendi cu algun hoben a wordo gara cu droga. Polis a yega y a atende e hobenen aki. Directeur a bin na porta pa asina ricibi nan y a splica e situacion. Despues di basta rato polis a dicidi di bai cu algun hoben warda pa asina warda nan mayornan y wak kiko ta pasando.

Diabierna mainta banda di 11:40 am polis tabata controlando den caya principal net dilanti Mango unda cu diferente persona a haya boet pa motibo cu nan no tabatin nan papel na ordo. Hopi hende ta lubida di tin nan rijbewijs cu nan of tur papel di auto. Tambe otronan no ta paga seguro na tempo y door di e controlanan aki nan ta corda cu tin cu cumpli cu e reglanan.

Diaranzon anochi, central di polis a haya un yamada cu un homber lo mester a cay for di e di dos piso di un edificio den construccion serca di La Cabana, y cu su situacion ta grave y ta rekeri ambulance na e sitio. Na yegada tabata trata di e edificio di "Kelki Geel". Eynan nan ta informa polis cu un homber lo a cay for di dos piso y a cay riba stacanan di hero cu lo a herida e persona gravemente. Ta trata di e homber Jose Luis Perez Abreu.

Dialuna anochi un auto a dal preke net pariba di aeropuerto. Esaki a pasa banda di 7or di anochi. Un chauffer cu a wak algo riba caminda a dicidi di para y a wak cu tabatin un persona riba caminda y na e momento aki un otro auto a pasa y no a wak preke y a pasa riba su pianan kibrando 1 di nan.

E Nissan Platina color cora A-36074 tabata bin for di e retonde di tanki flip y perde control y keda otro banda di caminda. Brandweer y polis a wordo pidi pero na nan yegada no tabatin hende pega den e auto y tampoco tabatin heridos. Takelwagen a presenta pa asina por a saca e auto aki.