Diamars anochi tabatin e conferencia di FTA cu tema dialogo social caminda diferente oradornan invita a hiba palabra. Otmar Oduber tabata presente e anochi ey y ta indica cu e exposicionnan presenta pa Dr. Ana Teresa Romero, directora di Oficina di OIT Caribe como tambe di Sr. Erwin Koense, dirigente sindical di Corsow tocante dialogo social y su beneficionan tabata hopi educativo. E dos oradornan aki a mustra riba e importancia di un dialogo social, caminda cu por deduci cu e no ta un opcion sino un necesidad pa atende cu e problemanan y su solucionnan caminda cu esakinan ta conta cu e sosten amplio den comunidad.

Aki Otmar Oduber ta mustra cu esaki ta algo cu AVP, mescos cu diferente otro actornan den comunidad a bin ta bogando pe pa añanan largo, pero cu lamentablemente debi cu nos tin un gobierno terco cu dor cu nan ta goberna nan so ta kere cu nan ta manda y ningun hende por bisa nada. Pa añanan largo nan a bin ta bariendo e tema di dialogo social fo’i riba mesa y mirando e situacion di crisis cu nos pais ta pasando aden, e dialogo nacional mester bira un di e prioridadnan pa e siguiente gobernacion. Tambe Otmar Oduber ta mustra cu den pasado, durante Gabinete Eman III a tuma lugar un dialogo social cu a enfoca riba combatimento di criminalidad. Aki diferente actornan a sinta hunto y a logra yega na un pensamento comun pa atende cu e problematica di criminalidad. Asina a bin cu e rapport ‘De Omslag’ cu tabata carga e sosten di comunidad, pero cu lamentablemente ora MEP a drenta gobernacion, esaki a wordo hinca den lachi y nunca a wordo usa. Igualmente e ta indica cu a pesar cu gobierno mes ta evitando di realiza un dialogo social, partido AVP si a bin ta reuniendo cu gremionan sindical, comercial y diferente otro instancia den comunidad pa atende cu e situacion dificil cu nos ta pasando aden y pa hunto busca e solucionnan necesario. E programa di partido AVP pa gobernacion 2009-2013 ta inclui gran parti di e puntonan presenta den e dialogonan realiza cu diferente organizacionnan di nos comunidad. Esey ta e diferencia grandi cu AVP ta presenta, e ta un partido cu ta traha conhuntamente cu tur actor den comunidad pa busca e mihor caminda pa hiba Aruba Ariba! Manera Dr. Ana Teresa Romero a bisa den su discurso, “mester tin political ‘will’ pa logra un dialogo social. Mester tin willingness pa trese diferente partido na mesa, personanan cu tin e poder di decision”, y esey AVP semper a para pe y lo sigui para pe, pasobra pa hiba nos pais dilanti nos mester e sosten di tur hende! Otmar Oduber a duna di conoce. Finalizando el a gradici y felicita FTA cu e tremendo iniciativa aki mustrando nan determinacion pa logra un dialogo nacional na beneficio di henter nos comunidad.

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario