|
|
|
| Extras | ||||||
|---|---|---|---|---|---|---|
|
|
|
|
| Bookmark Us |
|---|
 |
| Latest Photo Ads |
|---|
 Ta bende Mazda RX7  Car For Sale  Trailer for sale  Sport Watch (with pu  Kia Rio 2004 |
|
|
| Randall Croes riba lista di Democracia Real |
|
|
| Wednesday, 01 July 2009 - 22:03 | ||||||||||||||||
Diahuebs atardi na cede di Democracia Real e economista Randall Croes a lansa su mes riba e lista di Partido Democracia Real. Por a mira famianan y amigonan presente cu a mustra nan sosten pa cu su candidatura. Click lesa mas pa mas foto y pa lesa su speech.
Apreciable ciudadanonan di Aruba. Awe mi ta desea di participa cu mi ta join e Team di Democracia Real pa realizá e Cambio…….. y awor…. den proximo periodo di Gobierno. Participando mi por duna un man y contribui na e momentonan critico aki cu nos pais ta pasando aden, mei-mei di e crisis economico mundial y un crisis di moral y vision den politica. E eleccion na September ta bay ta un referendum, caminda cu pueblo tin cu escohe entre dos systema di Goberná Aruba. Un systema cu te awor nos a conoce di traha ad hoc sin un vision, sin planifica y mas bien ta basa riba un cultura di probecho pa algun, persecusion di esun cu pensa di otro manera y gana eleccion. E estilo aki cu a conduci cu awe Aruba nos economia ta zwak, nos honor y bon nomber a ser atachá pasobra nos gobierno ta bai ser investiga pa Reino. E otro opcion, ta un cambio grandi den e mentalidad, vision y direccion di maneho di nos pais, basa totalmente riba interes general y traha pa un mihor futuro di e comunidad. Un opción caminda cu e ser humano, e famia, su cartera y e calidad di bida di nos habitantenan ta central y no e beneficio di un grupo selecto. E maneho nobo lo ta basa riba un maneho planifica pa realizá resultadonan concreto pa mehora nivel di bida pa cada persona y famia. E ta un vision economico y politico cu ta creativo, innovativo y cu un empuhe grandi pa diversifica y consolidá nos economia di manera sostenible y mas duradero. Un maneho cu ta respeta normanan di etica, desencia y moralidad y cu ta promove oportunidad igual pa un y tur. Awe mi ta sigur cu henter nos comunidad ta sinti peso di e costo halto di bida pero tambe e peso di belasting cu e maneho anticua aki a crea pa nos tur. Pa esnan cu ta puntra: Con bin mi a tuma e paso aki,….. pa drenta politica? Algun siman pasá mi a tende e noticia cu e Refineria ta pasando den dificultad y cu nan lo shutdown e planta temporalmente y nan lo bay over na haci algun projecto di mantencion. Mi tin cu bisa boso, cu mi a haya un haya un shock, mescos cu henter Aruba a sinti. E Shutdown ta parse temporal pero nos no sa sigur ainda. E hecho aki a pone nos tur pensa hopi ariba cual lo ta nos futuro. Con e crisis aki lo sigui?. Den mi caso, como un Economista, e impacto tabata hopi grandi y el a kita hopi soño den anochi. Aruba su economia mester a ser diversifica for di basta tempo caba. Awor el a bira un urgencia! Nos tur mester uni tras di e meta pa hasi nos economia mas fuerte y dinamico. Sr. Andin Bikker, kende mi ta considera un amigo, y un persona cu vision y determinación pa logra su metanan, a bishitami dos biaha na cas pa nos papia riba e posibilidad di subi lista. Sr. Bikker a ponemi bon na haltura di e Vision di forma un team di hendenan cu ta dispuesto pa haci sacrificio, crea un oportunidad pa e pueblo, y no pa bin probecha. E partido aki ta consisti di hendenan cu ta cla pa traha te laat anochi y lanta mainta temprán pa sigui traha. Despues di a pensa bon y refleha riba e necesidadnan urgente aki, mi a conclui cu mi no por laga mi pais, un banda den e temponan asina dificil y mi a bisa Sr. Andin Bikker cu mi ta join e team di Democracia Real. Mi no ta drenta politica pa bida largo, sino pa un periodo necesario pa duna mi contribucion real, cu ta ensera e preparacion di un plan di maneho economico, hunto cu demas autoridadnan di Partido, cu lo beneficia tur hende y nan famia pa hopi tempo. Nos lo kier yama e plan aki: “Mehora economia pa cada famia”. Mi a analizá e estudio social y político cu Democracia Real a haci caba den nos comunidad y hunto cu e conocimientonan adquiri despues di 20 aña ejerciendo e profesion di economista, mi a dicidi di yuda trese solucionnan grandi pa probleman grandi. E proyecto socio-economico aki ta dirigi na yuda reduci costo di bida. E meta ta pa cada famia por tin opcionnan di baha gasto y keda cu mas cen fin di luna den nan cartera. Nos lo crea espacio pa nan planea nan futuro. Dentro di algun siman nos partido lo presenta e plan aki na nos comunidad. E Slogan “Cambio awor” ta cuadra completamente cu locual ta a necesario pa Aruba awor. Nos futuro lo ta mihor siribi si awor e Cambio tuma lugar y un generacion di politico nobo drenta gobierno. Nos hubentud no por warda mas, nos famianan no por warda mas, nos grandinan tampoco por warda mas. Nos tin mester di un biento fresco, pero cu aire nobo. For di e lugar aki, y bosonan como testigo, mi ta priminti di yuda e Partido aki logra e meta grandi di e Cambio necesario. Ora cu nos ta den Gobierno, nos lo traha incansablemente pa ta un gobierno di dialogo y decision, scuchando e opinion di tur esnan cu por contribui. E epoca di tuma decision basa riba cuanto voto por haña of cuanto voto por evita di perde pa proximo eleccion, mester pasa pa historia. Mester traha caminda pa un Aruba moderno, cu maneho basa riba pricipionan di; calidad; normanan y moralidad politico, dedicacion, proteccion y oportunidad igual pa esnan mas zwak den comunidad; cifras y ciencia; planificacion y follow-up di resultado; profesionalismo; creatividad; participacion di gremionan den decisionnan importante; reduccion di burocracia. En fin, un democracia real, un democracia cu ta duna resultado, un Gobierno participativo………. un Gobierno cu ta traha pa calidad di bida di nos tur. Comentarionan (56)
  Scirbi pa Realfactor, July 01, 2009
awor si cos a bruha, un sabe lo todo riba lista di pdr! Jammer , awor menos votonan pa dindin.
Scirbi pa Yo, July 01, 2009
aiza croes riba avp y su ruman randall riba dr? waw, riba cua aldrick lo bay?
Scirbi pa loko, July 01, 2009
tremendo tremendo.. porfin un alternativa ne awacati putri di AVP/MEP
Scirbi pa acer, July 01, 2009
hopi bon candidato pero riba partido robes mihor e la bai ku berde di mes hunto ku su ruman mujer
Scirbi pa pedro croes, July 01, 2009
randall 8 anja pasa bo tabata riba lista di aliansa, cu otro palabra stop di busca pa tuma hende hasi cu esaki ta bo debut den politica ora bo ta bisa cu pa esnan cu ta puntra pakiko bo a drenta politica. of posiblemente lo bo ta referi na esnan cu conose bo background tanto den gabinete eman 2 como na cmb y balashi, spaar nos di e fly by night aki.
Scirbi pa Ijsbeer, July 02, 2009
Kon yama e partido atrobe Democracia real of AVP? Pasobra mi no ta mira un ddiferencia den e dos partidonan AKI vota aVP of Domocracia real ta mescos tur dos ta un boonchi di mes un balija
Scirbi pa mirananmiranos, July 02, 2009
Bon bini na Sr. Randall Croes, asina mester ta, hende nan capacita cu ta tuma e curashi pa drenta politica. Al final e proximo gobierno ta bai consisti di AVP (10) y Democracia Real (2) . Pabien Aruba!
Scirbi pa Im Back, July 02, 2009
Randall Croes, bo NO ta un economista pero bo ta un OPORTUNISTA.
Bo ruman muher ta riba e lista di AVP y tog bo ta tuma un decision asina?? . Bo tata q.e.p.d Chibi cu a lidera e lista di AVP den su tempo, lo ta hopi lamenta pa loke abo ta haciendo. OPORTUNISTA!!!!! mal ruman.
Scirbi pa vinchi, July 02, 2009
Un hende por a dunami un splicacion????? Dicon no tin ningun ( NI UN) candidato cu tawata ariba e lista di DR den e ultimo eleccion , no ta ariba e lista di DR e anja aki?????
Scirbi pa Palabra Berdad, July 02, 2009
Esaki si ta un famia bruha! Con por ta posibel cu dos ruman, cada un ta bay riba un otro partido? Cu ni bo rumannan bo no por convence, ta con bo ta bay convence e pueblo awo? Mas cu djis politika, e asuntu aki ta mustra con bruha e famia aki ta.
Scirbi pa CAMBIO, July 02, 2009
E pensamento cu famia "Mester" sigui otro den pensamento politico ta un tiki achterhaald, mi amigo. Importante ta cu nan ta respecta otro su opinion y cu cada un por tin un otro manera di wak cosnan y dus otro manera di pak aan e solucion. Paso bo ruman bula den pos bo tambe ta bai su tras? Ami no ta kere. Aunke bo no ta kere na Aruba tin hopi hende inteligente cu por forma nan mesun opinion sin tin cu sigui esun di su tata, mama of ruman. Pesey nos ta biba den un pais democratico.
Scirbi pa Sombra, July 02, 2009
E hendenan aki ningun momento ta drenta politica pa juda, nan ta drenta pasobra nan a mira cu hopi $$$$$$ placa ta bai drenta caha di gobierno y nan tambe a bini pa busca nan share. Tempo cu nan mester a juda nan no juda, awor nan ta miranda cu basta placa ta bai drenta caha di gobierno, direpiente nan kier haci comosifuera nan kier juda whata.......?
Un Set di e hendenan aki ta Opotunistanan.
Scirbi pa KMLO, July 02, 2009
Randalll den pasado bo tawata man drechi, consehero di Henny nan den gobierno. Bo a wak ki desaster nan tawata haciendo y bo a bisa cu bo no kier ta parti di esaki y bo a bula afor. Bo famia a rabia cu bo y bo tawatin razon, den 2 anja di tempo, AVP a destrui Aruba pa e proximo 20 anjanan. Awor, bo no kier bay direct cu AVP, pero cu e yui di AVP... e no ta mucho bon decision, pero toch uno respeta. Hopi forza y exito, semper bo tawata y ta un persona fair, y no a lganan usabo manera AVP a haci.
Scirbi pa Dushi Aruba, July 02, 2009
Como supuesto economista bo a frakasa por completo. Ningun di bo consehonan tabata correcto y danki Dios cu e sindicato di WEB tabata asina bon informa cu nan a dicidi di saca nan placa di pensioen for di un fondo, paga un boet pa cu esaki y asina mes sali gana si gerencis di WEB a sigui bo conseho di laga e suma na unda e tabata ta. Bye the way ta na unda bo a cumpra e supuesto diploma ey, pasobra di economia bo sa net net NADA!!!!!!!!!!!!
Scirbi pa Mente Habri, July 02, 2009 Al fin un famia cu ta mustra cu bo por tin opinon diferente, respeta otro y hasta participá den politica cu opcionnan diferente, sin tin nodo di pleita cu otro. Arnold Zchwarzenegge, Gobernador Republicano di California ta casa cu sobrina di John F. Kennedy, miembro di e famia pilar di Partido Democrata. Kiko a pasa, nos ta makako y nan ta hende? Arubiano ta mes hende cu Mericano of Macamba y Famia Croes ta demostra esaki
Scirbi pa Mente Habri, July 02, 2009
Ata un famia cu ta duna un ejemplo di por tin opnion difrente, hasta carrera politco diferente, sin critica otro y pleita cu otro.
Stop di zundra hende pa nan opinion diferente y nan gana di participa den politica, cu ta exigi basta curashi. Cu tin dos ruman ariba diferente lista no ta nada nobo na Aruba. Hasta ruman di difunto Chibi Croes tambe a bai ariba otro lista y ningun musca a bula, hende drechi, hende cu ta respeta otro. Bon ejemplo pa hopi otro cu ta tira piedra ariba hende cu pensa diferente cu nan!
Scirbi pa xxxxxxx, July 02, 2009
cu 2 ruman tin diferente opinion riba partido politico no ta haci nan un famia bruha al contrario nan ta un famia hopi hopi uni
Scirbi pa local, July 02, 2009
na tur esnan cu ta papia di oportunista of mal ruman, mi ta di opinion cu boso ta hende di mente limitá.
sorry, pero nos ta biba den un pais democratico toch? bo mag kies pa bo mes toch? of nos tin cu kies blind pa sea nos ruman, tata, omo, djies pasobra e ta famia? tur hende tin nan opinion y DERECHO pa kies pa loke nan ta sinti ta cuadra mas cu nan mes opinion. si no tawata asina, nos tur lo ta blind [pa no bisa kleurenblind] y kies just paso nos ta hanja un color mas bunita cu e otro. e cos ki mester stop! vota pero vota consciente! y ta tempo pa nos na aruba UNI y sinja respeta decision nan di otro y si bo no ta di acuerdo, bin cu motibonan valido pa support bo opinion. Randall, hopi exito y tur cos bon.
Scirbi pa Yirman P, July 02, 2009
Hopi exito
Na mi parecer y tambe di hopi medio di cumunicacion abo ta un di e mijor economistanan cu Aruba tin Abo ta un bon apoyo pa un govierno
Scirbi pa PUMA eyden, July 02, 2009
Awel ami cu mi 4 rumannan tambe nos cada 1 ta bai subi riba un lista.. Esun cu logra ta juda e otronan cu no a logra cu un bon trabow (style di tempo di tico cu vito 250 florin pa ora) Ta con por bai vota pa hendenan asina????? Kiko boso famia ta bruha of ta kiko ta pasando cu boso 2 como ruman????? Wel wel ta te unda ambishon ta jega anto???
Scirbi pa Calabas, July 02, 2009
Randall masha pabien cu bo decision. Awor tin cu traha duro pa logra e meta pa por drenta gobierno y haci cambionan necesario pa pais Aruba. Keep up the good spirit and go for it.
Scirbi pa Joa24, July 02, 2009
Vinchi bo tin rason, pero e chino so a keda riba lista cu andin fe ultimo eleccion hahaha . Ami ta just sinta warda dia 7 aug pa mi wak tur e listanan di tur partido. Ken nan a skop afo y ken ta keda !
Scirbi pa Biemer, July 02, 2009
Un hende cu tin un record criminal por bai riba lista di partido? mi ta kere cu si pasobra ata Randall riba lista.....Osea cu na Aruba cacho cu pushi por ta riba lista di un partido.... Randall a drenta e gang di hendenan cu ta pensa riba nan saco so.... Ya tin hopi partido asina caba pakiko Andin y su gang tin cu sigui cu e mesun sabor manera e otronan?????
Scirbi pa m r m too, July 02, 2009
Esta un falta di respet pa Pueblo, cu tin politico cu mester por sa miho, cu kier pretende cu awe un eleccion por remplaza un referendum, cu ta algo cu mester su preparacionnan debido.
Nan kier purba imita Betico pero no sa con, y ta haci'e tur robez y bruha. Tempo cu aki na Aruba tawata uza eleccion como un referendum, tawata pasobra ARUBA no por a traha un ley pa haci referendum legal, y e referendum cu a ser organiza na 1977, pa Gobierno Central y Gezaghebber no laga anul'e, bou ordo di Hulanda, a ser organiza como un 'opniepeiling'. Locual TOCH a dun'e e balor completo di un referendum di autodeterminacion tawata e presencia y sosten di Nacionnan Uni y representantenan di otro Paisnan. Awe Parlamento di Aruba mes por traha su leynan y no tin nada pa stroba e Partidonan politico cu kier organiza un referendum pa haci'e na e manera corecto y cu e seriedad y respet cu mester.
Scirbi pa ciudadano, July 02, 2009
Randall , exito cu bo plannan . Pero na september ta eleccion nos lo bai tin y nada di referendum ; lesa e artic*lo den AWE MAINTA di dia 2 di juli 09.
Scirbi pa xxxxxxx, July 02, 2009
shon no bruha cos Arnold Swazenegar ta casa cu Kennedy aki boso ta ruman di otro same blood
nos ta riba un pais democratico cu tur hende por tin nan opinion pero no expresa asina cu kada un ta bay ariba un lista y Aiza a bay prome cu Randall ariba lista so bo mester a warda pa aki 4 anja bo expresa bo opnion prome cune
Scirbi pa Change, July 02, 2009
Esaki ta bai bira interesante 2 cu Ego trip mi ta wonder con largo e matrimonio aki di Andin cu Randall lo dura. Alliansa tabatin tur potencial 8 anja pasa y mescos cu DR no a logra un asiento pa drenta parlamento....awor Randall ta bai purba cu DR.......ami ta kere cu e guy aki ta jinxed....so DR tambe lo bira defunto mescos cu Aliansa......
Scirbi pa juli, July 02, 2009
Randall y Andin MASHA PABIEN!!!
No lubida! Ta dos (2) bril di palo tin NEL-BAN (geel) y MIKE-BAN (berde).... Pabien cu bo decision! Esaki ta loke "libertad y democracia" kiermen di berdad.
Scirbi pa chandrika moondi, July 02, 2009
Sr. bo ta un bon economista y bo analisacionnan di e actual mundo economico Arubiano y mundial den diferente programma na t.v. tabata hopi educacional y alcaso. E palabranan di bo introduccion ta alentador, pero mi ta spera cu abo keda fiel na bo filosofia, norma y balornon. Politica sa cambia hende radical y nos tin ehempel de sobra den e otro partidonan tradicional. Cu bo ruman ta riba e lista di AVP no tin nada aden. Esaki ta demonstra con democraticamente y liber nos hendenan ta den nan pensamento. Tempo di madushi/padushi/mama/tata/ruman a vota geel/berde/oranje, y ta pesei ami ta of tin di vota mescos a pasa masha tempo. Cada hende ta donjo di su mesun pensamento, creencia y decision. Hende cu sano huicio y respet pa su mes no ta actua manera carne.
Scirbi pa Sombra, July 02, 2009
Mi por imagina mi e hendenan aki den Poder, Pober lo bira mas pober, rico, mas rico y papiamento lo cmabia pa spanjo. Mi ta kere bai biba na Cuba ta mihor cu keda Aruba pasobra nan lo laga Aruba bashi bashi. Oei! e oportunistanan aki ta pone hende su curpa grima Oe! Senjor spaar nos y Aruba.
Scirbi pa Arubiano den exterior, July 02, 2009
Nos arubiano-nan mester STOP di critica un jiu di tera cu ta desea un oportunidad pa por haci un diferencia den nos gobierno, i esaki por ta pa bienestar di nos tur. Meneer Randall ta un hende inteligente, maduro, i mester por sigi su deseo di subi riba e lista cu e kier y no loke su otro ruman-nan kier, of esun-nan cu ta critice kier. NOS TUR TA INDIVIDUAL.
Ta di lamenta cu e partido aki ta hopi zwaak ainda, y mi por pre- mira cu Randall lo no jega leu e biaha aki. SUERTE MENEER!!
Scirbi pa Brenda, July 02, 2009
esaki ta duidelijk cu ta halamento di garoshi tin,pasobra AVP sa cu nan no lo make it nan so.ta pesej nan kier parti un bolo,prome cu nan PERDE DI MES.Y ni asina aki nan lo logra,paso nan no lo haal suficiente voto huntu.
Scirbi pa Famia, July 02, 2009
Mi ta haya bso tur set di kens esnn cu a ofende ns famia si bso nn no sa ni cana pp porqueria rond!!! Si Aiza ta riba lista y randall ta fe bso asunto mi sa cu mi welo porta lo ta bolter den su caha awo pero kd ken tin nn propio opinion!!! Boso stoi pp cu mi omo ta fracaso y cherchia di mi famia!!! Mi ta haya bso nn hpi idioot personalmente y dcn bso no tin e cueri cara di bise cos ey na ns famia mes??? A caso miedo bso tini cu ns lo tin mas diploma cu bso y mas inteligiencia??? Biba bso bida stoi biba di otro wa bso balki nn y no wak di ns!!! Ns kd un tin ns mesun opinion riba aruba of no?? Wel lga ns cu ns y bso cu bso asunto!!! Es cu tin durf psa bisa mi omo of mi madrina sey y wa ki sorpresa bso lo hya!!! Stoi sinta wa bida di otro busca bso mesun bida pa wa!!Mi omo a subi y mi madrina anto kio bso por hsi ns lo wa ken ta esun cu lo gana awo!!!
Scirbi pa Prd Soldier, July 02, 2009
randall 8 anja pasa bo tabata riba lista di aliansa, cu otro palabra stop di busca pa tuma hende hasi cu esaki ta bo debut den politica ora bo ta bisa cu pa esnan cu ta puntra pakiko bo a drenta politica. of posiblemente lo bo ta referi na esnan cu conose bo background tanto den gabinete eman 2 como na cmb y balashi, spaar nos di e fly by night aki.
Kii Bso Ta Papia ????... pa kuminsa aiza no ta riba lista mas tss.. y sih e ke bai riba e lista di dr e mag bso un tin ndi bisa wa ... bso nan ta kana papia pro bso un sa nda over di dje tss... sih e twt den alansia 8 aja psa pro wa esei ta 8 anja psa bon po lagi pompa pedro croes tsss... y palabra brd kii abo sa di su famia ahn bsa bo kns nan pa bo tin algi bse bai buska information riba bo famia bo wak ken ta ma brua tss bso lewmai pompa kune su bida e ta y ki eta hsi of lagi hsi no ta boso kuenta ta su kuenta  nos ta topa un bia mas mi mst tende algo mi ta diss bso poe bso bai yora na mama
Scirbi pa Mente Habri, July 02, 2009
Randall tin nan loooocooooooooo!!!
Esta un berguensa con hende ta papia coi loco di berdad. Di unda a sali "record criminal", di unda a sali gañaaaa! E politica di semper, e politica di MEP, e partido mayoritario, cu no por c*lpa ningun zapato biewu cu nan ta investigando'e. MEP: Insulta, coba fondo, descrimina esnan cu pensa atro, nenga permiso na tur comerciante cu no ta sponsor partido, destrui Playa hincando Chollernan biba banda di e tiendanan y traha mallnan gigantesco dilanti di hotel pa kita Playa su clientenan, persegui hende cu placa di Gobierno si nan tribi di tin opinion otro cu Gobierno, pleita cu hende y famia cu vota pa otro partido, nombra henter famia, amigonan, conocirna, primi y primanan, tanta y omonan den gobierno, cu of sin coi hasi y asina gana eleccion. Democracia Real: Hende drechi
 Scirbi pa Judge, July 02, 2009
Mi ta desea sr. Croes tur exito spera cu e logra trese cambio y bin cu ideanan bon pa pais Aruba.
saludos 
Scirbi pa Sarah, July 02, 2009 Awor mi a jega mi cas pa mira e noticianan riba e website aki di 24 ora, wel wel e noticia aki si a haya reaccion, mi a lesa e comentarionan di tur hende, algun hopi extremo contra, cual no ta husto y otronan na fabor. Segun mi e meneer aki Randall Croes a haci algo cu hopi di nos masha tempo kier a haci pero no tabata tin curashi pa haci, esta expresa su derecho liber di su opinion y afilia su mes liber cu un pensamento of grupo. Nos constitucion ta promove esaki como derecho humano. Mi jui a muher jega di bisami cu el a duna un speech hopi interesante na su scol y mi a mire na Television tambe varios biaha. Mi jui a bisami awe mainta cu ta esaki ta e meneer cu papia asina bon na su scol y cu lo ta bon pa vota pe awor. Ami no conoce personalmente pero e ta dunami un bon imprecion, awe mi a tende na varios radio cu su speech di introduccion, mi solamentre por comementa cu nos tin cu mira ainda kiko mas e lo presenta y no huzga y condena asina lihe, esey ta hopi bobo, kom now mensen.
Scirbi pa Anti- zeurpiet!, July 02, 2009
E professor cu comentario aki den atrobe cu kier impone su ponencianan anti Hulanda di independencia. Profe, bo kier independencia? Bula y baha na awa, bo ta hanja tur e laman grandi pabo so, bo lo ta totalmente independiente. no worry cu e piscanan, nan no ta bay investigabo toch!
Scirbi pa Franklyn, July 02, 2009
Randall Croes, na promer lugar pabien, pabien, pabien. Hopi hende cu ta papia aki riba no conocebo pero ami si conocebo y sa ki sorto di persona bo ta, hasta na Corsow y Boneiro nan tin respet pa bo capacidad. No preocupa mes cu bobedad, Paul Croes sobrino di Betico ta riba AVP, Jui di Betico a lanta otro partido OLA, Jui di Vrigilio Kock a lanta MPA, Jui di Domi Tromp a Join partido di enemigo antes di nan esta MEP, Ta na unda tin algun hende ta biba, riba LUNA. Bo tin mi voto sigur riba Democracia real, cambio mester bin. Un conoci di bo Franklyn.
Scirbi pa FANATICA DI RANDALL, July 02, 2009
Randall, Bo a tuma un bon decision pa drenta bek den politica. Mi ta un admiradora dibo pa hopi anja caba. Mi ta spera cu mi por drumi awenochi pasobra mi ta asina excited cu mi a wak bo cara den corant y scucha bo stem na radio. Pls bin mi cas mayan anochi na Papilon pa pega bordchie. Shhhhht bo sa ta ken..... xoxoxoxoxo
Scirbi pa Biemer, July 02, 2009
unta critica nos ta critica riba nos Arubianonan... Pero esaki ta un hende cu tin un record criminal.... Of boso a lubida caba??????????????????????????????????????? Ta dicon nan a core cu e meneer aki y despues habri un caso di investigacion di malversion? Boso tur ta lubida? Busca den e boeki nan di pasado, 10 anja pasa anto mira kiko e meneer aki a yega di hasi....Anto awor e ta bai cu Andin? Ni AVP kier e meneer aki, y MEP tampoco. Ni su ruman Aldrich ta soporte !!!!!!!
Scirbi pa OASIS ( O.Tromp), July 03, 2009
BON BINI RANDAL! Nos mester di personanan manera abo. Hopi exito y sigi contribui na nos pais.
E comentaristanan negativo ta pa abo postula bomes mihor cada dia. Sin nan sa nan tambe ta contribui. Mas nos lesa nan comentario scondi tras di otro nomber, nos ta mira cuanto trabow tin di hasi ainda pa educa nos Arubianonan. Sigi contribui Randal, abo cu si ta saca man pa juda nos pais. Masha danki!
Scirbi pa loko, July 03, 2009
ayayay aruba.. pakico critica un hende paso su ruman ta otro partido?? mi ta supone cu boso tur ta vota huntu cu boso famia?? pesei tin asina hopi bril di palo color berde y geel?? boso no por wak ke awacati putri ta destruyendo aruba?? e tin tur derecho di bai riba MEP mes si e ke.. ban tur pun alternativa ne awacati putri MEP/AVP!!
Scirbi pa TAHNEE NIETA DI DEFUNTO CHIBI CROES, July 03, 2009
Ta redo nan stima ta purba kibra bida di Famia Croes henter dia..Awor a para bira cu nos no por hasi nada niun caminda.TA FOI BO CUENTA!!!EN TA CAI BOW BO NI BANDI BO!!Laga nas biba nas bida, biba di bo.Si bo sigi wa nas bida NO ta sobra tempo pa bo drecha bo bida. Sigi inventa, sigi molestia..Hopi pasenshi y tempo bo tin di biba nos bida..Anyways ta nos bida!!!Laga nos biba nos bida, biba di bo!!HOMBER LAGA REDO E MUHE NN TMBE!!Laga mi welo, mi omo nan, mi mama, mi madrina y padrino NA PAS!!! Si boso ta suficiente homber/muhe pa laga comentario ki riba sea sina homber/muhe pa laga nos famia croes tmbe sa!!! Y bisa nos den nos cara!!! no para sconde trai pc hasi coi makaqueria paso boso tur ta set di SD!!!
...
Scirbi pa Dr Zero, July 03, 2009
Awor falta pa Michelle Winklaar caba di lansa riba lista di AVP, anto e ora si Aruba ta changa, un banda Randall otro banda Aiza, tambe Andin un banda y Michelle otro banda, anto ta cla. Purbando yega 11 asiento den nan dos.
Scirbi pa AWOR!, July 04, 2009
Ban Randall, Abo den democracia Real, Visser den AVP, ta e hendenan cu gran expertisio pa nos pais.
Boso t'ey paso e gobierno 8 anya largo a hasi un mess! Danki di antemano!!
Scirbi pa BAN!BAN! PA ARUBA!, July 04, 2009
BAN P'E BAN P'E! Dor di e falta di gobernacion di mep, nos tin mester di cada un di bosonan. Hende serio, experto, dedica, cu bon intencion pa nos Pais! Nos por bisa cu den cada partido tin varios hendenan cu ta importante pa drecha y pone un rumbo pa nos pais. Nos No ta traha pa FF mas! Danki DR, RED, AVP,MPA, Boso ta nos salbacion! Den gobierno y den parlamento! NOS TA APOYA BOSO CANDIDATONAN POTENCIAL SIN MAS!
BAN! BAN DILANTI! NA NOVEMBER 2009: ARUBA PROMER!
Scirbi pa Zezinho, July 04, 2009
@Ban!Ban! PA ARUBA: CUA ARUBA? Esun pa Arubiano of esun pa stranhero? Y riba dje, ningun di e partidonan aki tin ARUBA y e Arubiano na pecho di berdad... nan tur ta oportunistanan cu ta wak nan pocket, mi a kere cu Monica kizas lo por tawata otro, pero NO!!! MEP den oposicion??? Anto un gobierno GELAPI cu lo ta e perdicion y destruccion di Aruba:AVP-DR-RED y MPA
Scirbi pa negrofelipe, July 04, 2009
Banban bo ta hopi infantil, 4 anja pasa ta tin 7 partido contra mep, nan a faya y nan a haya.
Tocante e meneer aki e no por mira laga para. puntra Balashi
Scirbi pa INK, July 05, 2009
Den e elecion politico di e ana aki por observa demaciado desaroyo den direcion di interesnan personal hopi ta teme y tin miedo pa mira e jaka grandi nan bai ariba lista no pa yuda Aruba sino nan mes! E meneer aki tin berdad tin un storia stanjo for di banco pero tambe balashi su Zus tambe tin un storia stange cu trabao bosonan no a mira con ela sali den corant poco dia atras caminda compania no ta para responsabel pa su debenan cu e hasi? kiko esaki ta bisa bosonan? y bida personal tambe tin de haber cu un homber casa! Ta crisis time y posibilidad facil pa horta ya cu no ta existi un sistema hudicial corecto toch?
Scirbi pa xxxxxxx, July 06, 2009
na negro felipe wak bon kiko bo ta papia stop di insulta hende si bo no tin prueba
Duna Comentario
Bo mester log in (miembro )pa por comenta.Por fabor traha un account si bo no ta miembro ainda.
|
||||||||||||||||
|
| Tempo | ||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|
|
||||||||||||||||||||||
|
|
|
| Newsletter |
|---|
|
|
Subscribe to this comment's feed
Mustra/Kita comentarionan
Mustra/Kita e formulario di comentario
