Na promer lugar un gradicimento ta bay na nos Tata Todopoderoso cu a duna nos e guia, capacidad, inspiracion y motivacion pa dirigi e destino di nos pais durante e ultimo 8 añanan. Sin duda algun mester constata cu tabata reina un situacion sumamente dificil na momento cu nos a cuminza cu nos gobernacion na final di 2001, pero cu fe, curashi y determinacion nos a logra di pone pais Aruba riba pia atrobe mediante di un gran cantidad di logro y proyecto na beneficio di nos comunidad. Hecho ta cu tur e logro y proyectonan ta visible pa un y tur y cada ciudadano cu core rond riba e isla aki lo mester por mira y admiti cu e placa di e pagadornan di belasting a wordo bon uza durante e ultimo 8 añanan.

Awor cu nos ta na vispera pa despidi como gobierno, mester resalta algun punto hopi importante pa loke ta e futuro di e pais aki. Nos ta bay laga atras un pais economicamente y financieramente solido, caminda nos ta goza di un BBB rating di Fitch y tambe un A-rating di Standard & Poor, cualnan siguramente ta indicadornan cu nos a goberna e pais aki den forma responsabel. Alavez cu orguyo y satisfaccion nos mester constata cu nos debe nacional relata na e GDP a ser reduci substancialmente for di 46.6% na 2007 te na 42% na final di 2008. Nos reservanan di divisa a alcansa un record di casi 1.5 biyon florin. Pa fondonan di inversion nos ta laga atras un suma substancial di 468 miyon florin cu siguramente lo ta un estimulo grandi pa cu nos desaroyo economico.

E recesion mundial tambe te ainda ta afectando nos economia, pero tabata danki na e  inversion di 10 miyon dollar extra cu nos gobierno a hinca den promocion di nos turismo cu nos a logra tene cabez riba awa. Algun desaroyo importante y positivo cu nos por mira pa loke ta e industria di turismo ta cu fin di e siman aki nos pais lo ta anfitrion di e conferencia mundial di SITE University y cual evenemento siguramente lo duna un tremendo ‘boost up’ na nos industria di turismo. Pa loke ta e companianan di aviacion nobo cu lo cuminsa bula pa Aruba, dia 19 di December 2009 e compania di aviacion AirTran lo cuminsa cu su vuelonan for di Atlanta pa Aruba y entrante 13 di februari 2010 nan lo cuminsa bula tambe for di Orlando. Pa sigui diversifica e mercado di turismo tur tramite ya ta haci caba pa ricibi e promer vuelo charter for di Suecia pa Aruba. Alavez esaki lo trece cu ne cu mas turista di calidad lo bin pasa nan vakantie na Aruba. Pa otro aña y tambe na 2011 y 2012 haf di Aruba lo haya bishita di 16 barco crucero, esta di Carnival Miracle cu siguramente ta un empuhe grandi pa nos industria di turismo crucero. Expectativa ta hopi halto pa loke ta e bishitantenan crucero cu lo bin Aruba den e proximo lunanan. Alavez tur e plannan ta hopi avansa caba pa muda e haf industrial pa Barcadera y pa crea un bunita area turistico na e haf di Oranjestad, cu su marina y su hotel di 5 strea, esta Grand Melia. Hotelnan di calidad di 5 strea, manera Ritz Carlton na Palm Beach y Fairmont na Seroe Colorado ta cla pa wordo ehecuta. E compania di Schiphol Group tambe lo sigui inverti den nos Aeropuerto Reina Beatrix.

Pa loke ta transporte publico, ya nos por a mira con na cuminsamento di e luna aki e compania estatal Arubus N.V. a expande su flota cu 11 bus for di China y tur e busnan aki ta bin cu airco. Cu sumo placer nos por mira tambe con e Area Comercial di Arubus na San Nicolas ta bao di construccion y ta planea pa su apertura oficial tuma lugar na mei di otro aña.

Riba tereno di salubridad publico, e hospital na San Nicolas ta den fase di terminacion despues cu luna pasa ya tabata tin su ‘soft opening’ caba. Cu esaki tambe e pueblo di San Nicolas y vecindario no mester di bay te Playa mas pa haya ayudo y atencion medico na e hospital existente. Algo hopi importante ta cu nos pacientnan no tin nodo di bay mas den exterior pa catherisacion y cu nan por sigui e operacion aki na Aruba serca y den compania di nan familiarnan.

E proyecto di procesamento di sushi, esta e Solid Waste Management Facility na Parkietenbos tambe lo bay conoce resultadonan positivo den futuro y esaki na momento cu e producto di Fluff lo bay haya su uzo debido.

Riba tereno di enseñanza, tur e plannan ta cla caba pa construi y renova un gran cantidad di school na Aruba. Aki nos ta para un rato keto na e construccion di un scool di HAVO/VWO publico na Noord y cual school siguramente lo bay alivia e fluho masal di studiantenan cu actualmente ta siguiendo nan lesnan na Colegio Arubano. Alavez tur tramite organisatorio y financiero ta cla caba pa renova Maria College na Playa y pa despues sigui cu Rosario College y La Salle College tambe na Playa. Lo construi un kleuterschool nobo pa Pieter Boerschool na San Nicolas, traha y drecha curanan di diferente school rond Aruba, renova Colegio Arubano na San Nicolas, Colegio Felipe B. Tromp na Noord, construi facilidad di Centro Orthopedagogico na Noord y renova Abraham de Veer MAVO na San Nicolas.

Pa loke ta e parti infrastructural, nos tin actualmente den ehecucion e proyecto di Centro di Cuido pa nos Ancianonan na Palisiaweg na San Nicolas. E centro aki ta situa den sercania di e mesun sitio caminda ta den construccion 144 vivienda social pa esnan di mas edad.

Alavez mester menciona cu e plannan ta den ehecucion pa sigui construi camindanan den tur districto di Aruba y esaki mediante di Fondo pa Caretera y tambe door di DOW. Poco poco nos ta mirando con e red di camindanan na Aruba ta wordo mehora y expandi y esaki desde 2002 cu nos gobierno a inicia cu e fondo di caretera.

Pa loke ta deporte, tin un gran cantidad di proyecto deportivo y recreativo cu ta den pleno ehecucion. Aki mester menciona e construccion di e Parke di Baseball na Santa Cruz, e Parke deportivo di Little League na Pos Chikito y esun di Lifida na Savaneta. Tur e proyectonan deportivo aki ta un estimulo grandi pa nos jovennan practica deporte, crea diciplina pa nan mes y evita cu nan lo cay den gara di vicionan cu lo perhudica nan den nan desaroyo. Alavez tur plan ta cla caba pa construi un Centro di Pesca na Zeewijk y pronto lo cuminza cu renovacion di e monumento di Corte di Husticia na Playa. Cu hopi satisfaccion nos lo por mira con otro luna e mulinanan di biento na Vader Piet lo bay den funcion y cu esaki tambe poco poco nos pais lo bira menos dependiente di fuel oil pa nos planta di awa y electricidad.

Asina tin mas proyecto inicia pa Gabinete Oduber cu ta den ehecucion y cu lo wordo finalisa den futuro sercano.

Hecho ta cu nos gobierno a traha cu alma y curpa pa realisa esakinan, pero locual nos tin cu tene semper na bista ta e desaroyo estatal y en especial locual lo sosode otro aña dia 10 di oktober na momento cu cambio di Statuut tuma lugar. Nos siguramente lo no ta desea pa e cambio estatal aki perhudica nos Status Aparte y consecuentemente henter nos desaroyo economico. Nos como Arubianonan orguyoso mester para firme y sali na vanguardia di e libertad cu tanto nos a lucha pe.