Eliminacion di BBO cu 1.5% 

Manera a wordo priminti durante campaña cu lo elimina BBO den fase, e promesa aki a wordo cumpli cabalmente tambe. E prome fase ta cu ta kite cu mita pa dia 1 di januari 2010. Dia 20 di november 2009 e gobierno cu apenas a sinta a firma e decreto gubernamental pa cambia e ley pa baha e BBO di 3% pa 1.5% entrante 1 di januari 2010. E documento aki a wordo manda pa Raad van Advies y despues el a bai Parlamento. Fin di luna di december e ley importante aki a wordo trata den Parlamento di Aruba y cu a aproba esaki. E alegria tabata grandi, ya cu introduccion di BBO a causa un impacto negativo enorme riba pueblo. Eliminacion di BBO cu ta un medida regresivo te na 1.5% ta un compromiso grandi cu a wordo haci cu pueblo y cu a wordo cumpli cu ne. E otro 1.5% lo wordo elimina na januari di e siguiente aña kitando di e forma aki e BBO por completo.  

Seramento di e Shelter 

Contra tur conseho, contra tur etica, contra tur principio gobierno anterior añanan atras a habri un shelter pa adictonan ambulante den centro di cuidad. E shelter aki nunca a wordo bon maneha y e adictonan ambulante tabata causa problema y mas problema pa e comerciante, e cliente y e turista di tal forma cu caya grandi cu un tempo tabata un centro di actividad a para bira un cuidad morto. Den oposicion e actual gobierno a bisa na difertente ocasion cu lo sera e shelter y lo busca un solucion pa e adictonan den e prome luna di gobernacion. Asina a sosode tambe. Dia 30 di november 2009 e portanan di e shelter a wordo sera. E adictonan ambulante a wordo ubica den diferente otro centro di rehabilitacion sea na Aruba mes of na Santo Domingo. Pa e par di adictonan cu a keda ta buscando un solucion y ta trahando duro riba e ley di curatela pa esaki wordo implementa den su miho forma.  

Valero ta keda 5 luna mas habri