Regreso di KLM pa Aruba dia 1 di februari ta indudablemente otro logro grandi di e actual gobierno. Na 2008 KLM a anuncia cu despues di 7 decada lo no bula Aruba mas. Den oposicion caba e actual Prome Minister a cuminsa papia cu gerente di KLM pa convence nan pa laga KLM tin Aruba como su destinancion atrobe. Na momento cu e gobierno nobo a keda instala combersacionnan intensivo cu KLM a sigui y tabatin como resultado positivo regreso di KLM pa Aruba. Respet pa otro, confiansa y e forma decente y respetuoso di hiba deliberacionnan tabata e base di e logro aki.

Carnival Cruises tambe a saca Aruba for di su itenerario durante e gobernacion anterior. E gobierno nobo a inicia mesora combersacionnan cu e compania prestigioso aki pa haya e bapornan crucero bek na Aruba. Combersacionnan cu tambe tabatin un resultado positivo. Cu masha orguyo gobierno por a anuncia cu desde otro luna e bapor Carnival Miracle lo mara den waf di Aruba y lo sigui haci esaki 10 bes mas. Cu propaganda manera “We’re going back to Aruba” Carnival Cruises ta laga  su clientela sa cu nan ta bek. Mientrastanto combersacionnan ta sigui pa na 2011 e bapor por drenta nos haf durante henter aña. Un logro importante pa nos turismo.  

Aumento di Onderstand y introduccion di “schoolkinderentoelage” 

Manera a wordo priminti den campaña Gabinete Mike Eman a cumpli dor di hisa onderstand cu 25%. Esnan di menos recurso a bai atras cu mas di 28% durante e ultimo añanan y ta e motibo aki cu e actual gobierno a haci e promesa y a pone den su programa di gobernacion cu lo hisa e onderstand y lo introduci e “schoolkinderentoelage” di 100 florin pa luna pa muchanan di famia cu ta cobra onderstand. Di e forma aki gobierno kier contribui na trece un balanza den e situacion socio-economico di pais Aruba. E ley pa trece e cambio aki a pasa Parlamento caba y a keda implementa tambe. 

Eliminacion di 10 florin pa dump, etica den politica y reapertura di Elmar San Nicolas  

Na comienso di luna di december Gabinete Mike Eman a anuncia cu for di 7 di december 2009 pueblo no mester paga mas pa tira sushi na dump. Esaki lo contribui pa hisa un poco mas e poder di compra di nos hendenan.

E gobierno nobo aki a haci un compromiso grandi cu pueblo cu e lo trece bek etica den politica. Politica na Aruba a para bira algo mahos y repudiabel. Ta pesey cu a priminti di loe trece cambio den esaki u for di momento cu e ministernan nobo a keda conoci, esnan cu tabata miembro di Parlamento y a bira minister no a tuma e overbruggingstoelage riba cua nan tabatin derecho. E mei miyon cu hunto nan a laga un banda, a wordo destina pa yuda un scol na Aruba. Un comienso pa trece etica den politica a wordo crea cu e gesto sincero aki. Gobierno a priminti e pueblo di San Nicolas cu lo tene debido cuenta cu su preocupacion y su dolornan. Asina lo cuminsa cu restoracion di diferente edificio na San Nicolas y becindario cu ta den e proyecto di revitalisacion di centro di cuidad y barionan. Tambe pa duna bek servicio accesibel na pueblo. Ya pesey cu na luna di januari a habri e oficina di Elmar pa di e forma aki habitantenan di San Nicolas y becindario por haci uso mas facil di e sucursal aki ora di paga nan cuenta di coriente. Un logro cumpli cu e pueblo di pariba di brug. 

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario