Ta trata aki di un carta cu Minister Dowers a manda pa e deurwaarders  na Aruba. E Minister a informa nan cu tur documento oficial cu nan mester entrega na gobierno, di awor en adelante nan mester entrega nan na Bestuurskantoor, y no mas na Macuarima.

Ta trata aki por ehempel ora un persona entama un caso contra gobierno of contra gobernador, un deurwaarder mester entrega esaki ofricialmente na gobierno, of manera ta wordo bisa na Hulandes "Betekenen".

Minister Dowers a manda e carta sin wak prome kiko nos leynan ta stipula. Den e caso aki nos leynan ta stipula cu e "betekening" aki mester tuma lugar na oficina di director di Asuntonan di Legislacion y Asuntonan Huridico.

Talves e Minister no tawata sa cu e regla aki ta existi, pero nos ta spera si cu e Minister stop di comete tanto eror di principiante. Of talves e Minister tawata sa masha bon, pero a dicidi toch di viola ley. Den ambos caso ta trata aki di un acto inacceptable.

E parlamentario a finaisa bisando cu "Awor cu gobierno a cumpli su 100 dianan, e periodo di stage a caba, y erornan di principiante mester stop".