|
Conferencia grandi pa prensa dia 1 di September |
|
|
|
|
Friday, 17 August 2007 - 07:52 |
|
Tur aña riba 1 di September gremio periodistico di Aruba y Antiyas ta celebra Dia di Prensa. Pa conmemora e fecha tan importante aki, ta ser organisa un magno evento di actualisacion periodistico bou e nomber: “Inovacion y Calidad den Periodismo”. E conferencia aki lo tuma lugar riba diasabra 1 di September na Renaissance Convention Center.
E conferencia importante aki lo conta cu un grupo di orador di taya y reconocimento internacional kende lo comparti cu e gremio periodistico di Aruba y Antiyas, nan experiencia y conocimentonan riba diferente topico di interes general relaciona cu e trabou cu e medionan di comunicacion ta realisa den nos comunidad.
ORADORNAN
“Inovacion y Calidad den Periodismo” ta conta cu presencia di e siguiente oradornan: Presidente di Sociedad Interamericano di Prensa (SIP), sr. Rafael Molina, kende lo papia riba Libertad di Expresion: Derechonan y Responsabilidadnan. Director di Noticia di cadena radial RCN di Colombia, sr. Juan Gossain, kende lo trata e topico di: Desafionan di periodismo radial, etica y consehonan pa reporteronan radial. Sr. Lindon Soles ex anchor di CNN, kende lo papia riba periodismo di analisis y profundidad. Director periodistico di e corant “La Voz del Interior” na Cordoba, Argentina y autor di e buki “ Gestion Periodistica” publica pa SIP, sr. Carlos Jornet. E periodista talentoso aki lo bai papia riba Empresa Periodistico: Productividad y Calidad Periodistico.
Un conferencia di e caliber aki mester semper di un toke crioyo. Conferencia “Inovacion y Calidad den Periodismo”, tin entre su oradonan special e linguista Arubiano y docente di EPI, sr. Ramon Todd Dandare kende lo dedica su disertacion riba: Uso corecto di Papiamento como instrumento fundamental pa divulga informacion. E pool di orador importante aki lo duna contenido na e bunita celebracion di Dia di Prensa riba diasabra 1 di September na Renaissance Convention Center.
“Inovacion y Calidad den Periodismo” lo conta cu asistencia di representantenan di e diferente medionan di comunicacion, tanto periodistanan como empresarionan di empresa periodistico, representante di diferente sector publico y priva, di Aruba y Antiyas cu lo sa di probecha e contenido cu un conferencia asina importante lo por produci pa mehora e nivel di calidad periodistico den nos region. Un danki especial ta bay na nos sponsornan Valero , Caribbean Mercantile Bank, Setar, e bon cooperacion di Renaissance Convention Center, Metacorp y Aruba Tourism Authority. E evento aki lo ser organiza pa ECA Communication Group cohuntamente cu Fundacion Prensa Uni ABC.
| Comments () >> |
 |
 |
