|
Olympic Day Run hopi exitoso |
|
|
|
|
Monday, 20 August 2007 - 00:00 |
|
Un cambio den e ruta e biaha aki probablemente a yuda hasi di e Olympic Day Fun Run and Walk 2007 un actividad mucho mas exitoso cu añanan anterior. Alrededor di 200 persona activo a presenta diasabra atardi na e sitio conoci como Fisherman’s Hut pa cuminsa e carreda.
Un ambiente sumamente agradabel a reina durante henter e evento, cu a hiba e participantenan den  direccion di Arashi, caminda nan a bira despues di 2 ½ kilometer, pa termina atrobe na Fisherman’s Hut, caminda un dushi patia, awa y cos di bebe tabata sperando nan. Manera semper meta di e Olympic Day Run ta pa stimula mas tanto hende posibel pa bira activo. Hunto cu McDonalds y Coca Cola, Comite Olimpico Arubano a ofrece tur participante e oportunidad di cana, core na pia, core bicicleta of hasi e distancia hunto cu nan yiu chikito den stroller. Manera a bira custumber caba durante e ultimo cuater aña, e biaha aki un biaha mas e grupo eficiente di voluntarionan di ARRUWAC a hasi un tremendo trabou cu organisacion di e evento y tur e aspectonan tecnico alrededor di esaki. Tur e participantenan a ricibi un bunita T-shirt regalo y tambe un certificado firma pa Presidente di Comite Olimpico Internacional como recuerdo di nan participacion. Danki na e cooperacion di Polis y Ambulance por a garantisa seguridad total na e participantenan durante e Olympic Day Fun Run and Walk. Comite Olimpico Arubano ta gradici tur esnan cu a dicidi di dedica nan diasabra atardi liber na algo sano y agradable pa nan mes. Un palabra di danki na ARRUWAC, McDonalds y Coca Cola cu a yuda hasi e Olympic Day Fun Run and Walk un evento tan exitoso. Na e prome tres lugarnan di mucha  homber y mucha muhernan den e categorianan canamento, coremento y e categoria hubenil (bou di 14 aña di edad), ta recorda pa pasa na oficina di Comite Olimpico Arubano desde diamars en adelante pa pasa busca nan bale di McDonalds como estimulo pa nan bunita esfuerzo. Alaves ta recorda tur participante cu e portretnan di e Olympic Day Fun Run and Walk por wordo aprecia riba e website di COA: www.olympicaruba.com
| Comments () >> |
 |
 |
