|
Gobierno a paga debe di 90 mil di AVP |
|
|
|
|
Wednesday, 19 September 2007 - 00:00 |
|
Parlamentario Dirk Dumfries a duna di conoce cu gobierno di MEP a paga 90 mil pa debe di material di school di compania di ex Ministro di enseñansa di AVP. Sr Dumfries ta splica cu e no por compronde con AVP ta papia un hala di disparate di e maneho di enseñansa durante tratamento di e presupuesto 2007 di e Ministerio di Enseñansa, Asunto Socila y Infrastructura.
E comunicado ta sigi bisa cu un y tur por corda ainda con Gabinete Oduber III a hereda na aña 2001 nos enseñansa. E ex Ministro di Enseñansa den Gabinete Eman III tabata tin atencion solamente pa su negoshinan. Un ehempel bibo ta cu manera custumber a lanta un compania pa cumpra material di school pa gobierno. E negoshi miyonario di AVP a bay bon te cu e compania Wedico NV a nenga pa paga e ultimo suma na e compania di Buki Niesten Nijmegen BV e suma di mas cu 84 mil florin. E compania Niesten Nijmegen BV a hiba gobierno corte mirando cu den pasado e compania Wedico NV a bestel e bukinan pa gobierno y aparentemente a nenga pa paga e suma di 84 mil florin. Den corte e hues a calcula e daño perhuicio, mas interes, e demanda y gasto di incasso na mas di 223 mil florin pa e hecho contra ley. Un suma grandi si no yega na un solucion. E compania Niesten Nijmegen BV ta haya un lastima cu e relacion cu Aruba a wordo atacha.
Esmas ta nos muchanan lo wordo perhudica pa falta di complimento di e negoshi di e minister di AVP. Pa por sigui manda material pa nos schoolnan e compania Niesten Nijmegen BV, a ofrece gobierno den corte dia 12 di September 2006 pa yega na un acuerdo di liberacion di culpabilidad. Gobierno y e compania Niesten Nijmegen BV a bay diacuerdo pa paga finalmente 90 mil florin considerando na prome lugar cu gobierno kier sigui traha cu e compania na interes di nos muchanan. Na di dos lugar mester di e bukinan y otro material di school pa nos muchanan cu ta futuro di nos pais no wordo perhudica door di e negochi di AVP.
Finalmente gobierno a logra sera e caso cu aprobacion di Parlamento. Ata e decreto y splicacion como prueba caminda Minister di Finanzas y Economia Swaen y Minister di Enseñansa Lopez-Tromp di MEP mester a laga defende gobierno den corte y a paga e debe di Wedico NV cu ta 90 mil florin pa sigui haya buki di school pa e schoolnan basico, esaki ta e realidad.Cu AVP awe tin e curashi pa critica ta un lastima mirando e situacion deplorable cu nan a laga nos schoolnan atras. Lo dura Gabinete Oduber añanan largo pa pone tur school na Aruba den un condicion acceptabel atrobe.
Durante e ultimo añanan hopi miyones di florin Gabinete Oduber a inverti den construccion y renobacion di schoolnan.Core rond den pueblo pa mira tur locual a wordo construe na EPI na Seroe Blanco, na Morgenster, na Sabana Basora, lokaal di fisica y tecnica pa 8 school di MAVO, 11 klas pa Maria College, renobacion di Colegio Sagrado Corazon na Savaneta, di Sint Aloysisus College na Noord, reconstruccion di gymzaal di MTS pa un Foodcourt pa EPI, cura di school nobo na Pius X school, cura pa Fatima College na Dakota, despues di 40 aña a renoba Graf von Zinzendorfschool na San Nicolaas, Maria Reginaschool na San Nicolaas.
Locual e parlamentarionan di AVP mester compronde hopi bon ta cu no ta partido MEP a declara cu nan a haci poco pa enseñansa. Tabata nan propio colega Minister den Gabinete Eman III, a declara pa laga enseñansa pa esnan cu ta comprende e materia aki.
| Comments () >> |
 |
 |
