Den aña 2008 tin diferente acontecimiento cu lo tuma lugar cu un nificacion grandi pa e desaroyo di cultura na Aruba. Pa e motibo aki Gobierno di Aruba a proclama aña 2008, como Aña Nacional di Cultura. Cu esaki Gobierno di Aruba kier pone atencion na e importancia di e educacion y desaroyo cultural di un pueblo.

Motibonan pa proclama Aña di Cultura

Dia 29 di februari 2008 Archivo Historico Nacional en cooperacion cu entre otro Biblioteca Nacional di Aruba lo organisa un exposicion titula “Herencia di Sclavitud”. Esaki ta un exposicion cu ya a expone na Hulanda, Curaçao y Suriname. Otro aña lo toca turno na Aruba pa informa nos pueblo riba e historia di sclavitud den colonia Hulandes.

Dia 10 di september 2008 Scol di Musica Rufo Wever ta celebra nan di 55 aña di existencia. Ya caba muziekschool tin diferente actividad planea pa celebra e ocacion aki.          

Dia 14 di september Oficina di Monumento en cooperacion cu diferente instancia lo organisa “Paseo Monumental”. Un actividad cu a re-inaugura na 2006 cu e intencion di sigui organisa esaki cada pasa 2 aña.

Manera nos tur sa, na aña 2003 nos a celebra 25 aña cu Gobierno di Aruba a instala un propio departamento encarga cu asuntonan cultural na Aruba. Esaki ta nifica cu dia 30 di september 2008 lo cumpli 30 aña cu asuntonan cultural ta forma parti oficial di e responsabilidad di Gobierno di Aruba.

Na november 2008 Museo Archeologico ta planea pa haci apertura oficial di nan edificio nobo na Schelpstraat. Esaki lo ta un logro grandi pa Aruba y den Caribe, caminda ta presenta un museo completamente moderno equipa.

Dia 15 november 2008 Stichting Schouwburg Aruba ta celebra nan di 50 aña di existencia y den cuadro di esaki Cas di Cultura Aruba tambe ta trahando riba diferente proyecto pa presenta na e pueblo di Aruba.

Calender di Cultura

E desaroyonan positivo aki riba tereno di cultura a haci cu Ministerio di Labor, Deporte y Cultura a tuma e iniciativa pa publica un calender 2008. Esaki lo ilustra diferente actividad cu ta tuma luga riba tereno di cultura na Aruba. Cu cooperacion di tur departamento y organisacion cu ta resorta bao di Ministerio di Cultura, hunto cu otro instancia y departamento di gobierno, a logra compila un cantidad grandi di portret cu ta refleha diferente actividad cultural cu ta tuma luga anualmente. Riba e calender lo indica e actividad(nan) cu lo tuma luga otro aña na e fecha concerni. Tambe ta indica riba e calender diferente dia internacional riba tereno di cultura y otro dia mundial cu un nificacion special. Mas cu claro cu ta menciona tambe tur fecha di nos fiestanan nacional. Lo lansa e calender na inicio di december den combinacion cu un evento cultural, cual fecha lo keda anuncia pronto.

Slogan, logo y jingle pa Aña di Culura

E sed pa haci celebracion di Aña di Cultura tabata grandi. Un publico selecta bao di tur e departamentonan di Ministerio di Labor, Cultura y Deporte, conhuntamente cu algun otro departamanto di gobierno manera ATA, Departamento di Enseñanza, BUVO, Archivo Historico Nacional, Biblioteca Nacional, DOW y tambe AHATA, a yuda cu sugerencia pa un slogan. A ricibi en total 199 frase, 22 mensahe y 3 parti di un discurso for di diferente persona. For di e totalidad sr. Felix “Chucho” Hoek a scohe e letranan pa un jingle. Fin di november lo presenta e slogan, logo y jingle di Aña di Cultura durante un conferencia di prensa.

Comments (3) >>

Show/Hide comments

cosbonso said:

Payasada di Ramon cu Robby atobe....biba nos c*l-tura! Nan a lubida di pone "cu mi lenga afo" den e jingle.

January 06, 2008

Bito said:

Hopi zuiver mes,dus porfin full 1 anja ,dus spera e radionan copera si cu nos musicanan,tremendo.......cosbon so envidia mata,bai serka deje porta bo por hanja tambe hahahahahahahahahah

January 09, 2008

Pink Panter said:

Great, pero den mi opinion Gobierno mester stop di gasta placa di pueblo den cosnan sin valides nos schoolnan ta yora un tiki verf y calidad di educashon, E calidad di bida di e pueblo ta bayendo atras y Gobierno a hisa costo di bida na un grado criminal y ta sigi implementa gasonan ariba custia di e pueblo cu a pone nan eynan ,nan a bira in humano anto ainda ta pretende cu nos mester celebra dia di Betico? No pls stop, mira con nan ta paga register accountant parasito di ministro den pasado y actual cu ta gana 30 mil florin pa luna cu no a benificia ni aruba den pasado tampoco awor cu kiko ela contribui pa mejoracion di calidad di bida di nos pueblo? Nada de nada y asina e fiesta ta sigi!!!y eta sigi imbenta con pa horca e pueblo mas!

January 20, 2008

Write comment

Show/Hide comment form

Name

Email

Comment

Add Comment