Ariba dianan 7, 8 y 9 di Maart venidero Aruba lo bai ser conosi cu un produccion cu porfin lo ser realisa y presenta cu hopi amor, pasenshi y entusiasmo, na e pueblo di Aruba. E produccion di baile-teatro aki jama ‘One in Soul’ lo ser presenta pa e productora Alydia Wever conhuntamente cu 17 artista masculino local y international den Cas di  Cultura.

E publico lo bai experencia obranan di e artistanan masculino ku lo worde tresi ariba esenario den un forma diferente y creativo. E artistanan invita lo ta den persona di Ryan Oduber, Ciro Abath, Elvis Lopez, Nigel Matthew, Nathan Trice, Michael Lampe, Sonfaya 2020, Adolfo Valbuena, Armand Simon, Danilo Geerman, Kazell, Paul Van Driel, Chris Wyld,  Roland Colastica, Nelson Gonzalez, hunto ku dos artista hoben Jean Bellegarde y Ken Wolff cu ta haciendo nan entrada den e mundo di arte aki na Aruba.

E produccon aki tambe ta un integrashon cultural cu ta explora tur e disciplinanan den arte entre otro musica, pintura, video, instalashon, decor, poesia, coreografia, moda, literatura y baile moderno. E totalidad di tur e disciplinanan ta hiba e expresionanan aki na un otro nivel pa cu e arte Moderno Contemporaneo aki.

‘One in Soul’ ta un integrashon di e dos energianan cu nos tur como hende tin, cu ta esun femenino y masculino. E dos energianan aki ta dos diferente, pero alaves nan ta complementa otro den e spiritu di cada ser humano ariba e mundo aki.  Como un coreografa conceptual e ta wak e integrashon aki como uno multidimensional, y ta trese un otro aspecto den e concepto di cual e lo ta un reto pa e mes y tur hende cu ta forma parti di e idea interesante aki. E concepto a crece for di tempo di su emabaraso na momento ku e la hanja sa ki sexo e fetus tabata ta. E forma ku e la reacciona y a sinti pa ku e otro ser ku ta uno diferente den tur sentido, a dune un sentimento di inquietud pa explora e transformashon cu su curpa y mente ta pasando den dje. E durashon di e proceso pa a hasi su research, escohencia pa ku artista, musica, y tambe diferente ideanan a tuma basta tempo. Den varios ocasion diferente ideanan, coreografianan, cambionan a crusa su mente y conversashonan ku e la hiba ku amigonanan y diferente personanan ku e conose a inspire y motive pa den un anja y mei,  hasi esaki realidad. E ensayonan a cuminsa un anja pa ser exacto y awor ta jegando su partinan final. E diferente temanan ku lo bai worde presenta lo trese e partinan interno y externo di e dos energianan aki, por ehempel mal comunicashon, globalismo, indentidad, politica, individualismo, emancipashon cultural, y diferente otro mas.

E palabranan ta frasenan bailabel expressivo di e disenjo di e coreografa  y ta crea imagenan cu ta pone nos bira mas sensitivo pa realidad. Un experiencia cu ta duna rikesa y crecemento, no solamente pa e artista  pero tambe pa e publico.

Cu e produccion aki Alydia kier atende nos hendenan ariba e diferente calidad y caracter ku cada individuo ta representa, pero ta bai perdi bou di e capa indoctrinante di politica, religion y te hasta cultura. E obra kier elabora cu su forma artistico pa habri un caminda pa e emancipacion cultural cu nos mester jega na dje.

Pa Alydia e produccion di baile-teatro aki lo ta su prome experiencia pa ku un projecto asina grandi y intenso.

Cada artista lo presenta un tema diferente ku otro ku e mes a scohe pa ku nan caracter y ser. E obra lo representa un reflejo di  nan energia femenino hunto ku e energia masculino cu lo worde expresa abase di 16 coreografia traha door di Alydia mes y cu lo ser presenta door di siete bailarina professional; Astrid Hagers- Arends, Pierangely Wever, Gladys Duarte-Croes, Dyantha Maduro, Jacqueline Zattera, Mayra Stroeken y Gayle Hagedoorn, hunto cu seis studiante di e cuatro skolnan di baile aki na Aruba; Skol di Baile Diana Antonette, Simadanza, Club di Movimiento y Step by Step. E studiantenan ta Mary-ann Grant, Anouk Wools, Thayisa Farro, Christine Vinck, Angelique Kamsteeg y Valedy Sommerville. No por laga afo e dos disenjadoranan cu tambe lo trese nan ideanan den un forma hopi excentrico y creativo cu ta Sr. Mena Dirksz y Jess Wolff. ‘One in Soul’ ta un idea ku a nace for di un mente, un impulso creativo pa integra artistanan di diferente discipline den arte, ku un reto grandi. Pero tur e aspectonan den e produccion a worde forma, ensaya, integra y especialmente e relashon estrecho di cooperashon entre e coreografo, bailadornan, artistanan, disenjadornan, cosedonan y e ekipo tecnico.  Mas cu tur, sin e enorme sosten finananciero  di e sponsornan, arte contemporaneo y cultura Arubano no lo prevalese.

Un danki di antemano ta bai na Nederlands Fonds voor Podiumkunsten, Prins Bernhard Cultuurfonds, UNOCA, Valero, VNO, AHATA, SVE.TV, Stichting Skol di Baile Diana Antonette, Mosaic,  RBBT Bank Aruba, FATUM, Aruba Trading, Taste of Belgium, Graphi-x & Beyond,

y tur e personanan cu a dedika nan tempo, energia y creatividad pa realisa un sonjo  ku a inspira Alydia pa cu e exploracion di e energia femenino y masculino cu ta forma e symbiosis di e alma den e curpa.     

Carchinan lo ta obtenibel na Cas di Cultura, Skol di Baile Diana Antonette y Van Dorp Aruba na Dakota. Por jama na 7445605 pa reservasion.

Ariba diahuebs mainta 6 di Maart, lo bai tin dos presentashon pa schoolnan.

Comments (2) >>

Show/Hide comments

Outlander said:

Alydia, bailarines nan, tur esnan ku ajuda, PABIEN. Di lesa so mi ta curioso pa wak e show. Boso a pensa pa haci presentashon for di Aruba tambe?p.e. Hulanda/Curacao??? Mi lo ta interesa pa presencia e espetac*lo aki. Un biaha mas Pabien.

March 05, 2008

Bebebuski said:

supper maaster , jammer cumi no tey pa wak e show.... suerte y break a legg... groetjes Uit holland Den-haag......

March 14, 2008

Write comment

Show/Hide comment form

Name

Email

Comment

Add Comment