|
E momento a yega pa Aruba Model Search |
|
|
|
|
Thursday, 13 March 2008 - 00:00 |
Un trayectoria
impresionante di “scouting” pa participante di AMS2008 ta yegando su etapa
final. Na comienzo di Januari ya caba por a nota presencia di AMS2008
crew na actividadnan carnavalesco y durante paradanan di carnaval ta reparti
“scout cards” na jovenan femenino y masculino cu segun e wowo di e
profesionalnan aki tin potencial pa modelahe. Tambe e crew di AMS2008 a
sa di tuma hopi registracionan durante e temporada di Carnaval y tambe durante
e luna(nan) siguiendo esaki.
A lanza e campaña di AMS2008 DEN BO BARIO NA SUBWAY cu sigur a resulta un
tremendo exito tambe pa locual ta trata e busqueda di e proximo “fashion star”
di Aruba. Un cantidad impresionante di jovenan, masculino y femenino, a
sa di tuma e iniciativa y inscribi na TRASH BY RONCHI durante e ultimo dos luna
y mei pa asina participa na e casting nacional di AMS2008. AWOR E MOMENTO
A YEGA !
Mayan, diasabra dia 15 di Maart, na Havana Beach Club cuminsando pa 5’or di
atardi jovenan mester cuminsa presenta pa asina ricibi nan number di
participacion y tambe inscribi (si nan no a hasi esaki caba) pa forma parti di
e casting nacional di Aruba Model Search 2008. Durante un impresionante
casting nacional e juradonan lo pre-seleciona e participantenan oficial di
AMS2008. Ta durante e actividad aki e jovenan femenino y masculino cu a
inscribi lo hanja sa si nan ta forma parti di AMS2008. Sigur mester duna
di conoce cu espectativanan ta halto y cu e cantidad di registracionan a
surpasa 300. Esaki sigur ta muestra di cu e jovenan di Aruba ta dynamico
y kier logra cosecha exito den bida !
Definitivamente nan lo conoce un
experiencia inolvidable. “E national casting di AMS2008 ta wordo
considera como e evento di casting mas grandi den historia di moda di
Aruba. E cantidad di jovenan cu a inscribi ta admirable y ta marca
historia ! Nos ta sumamente orguyoso di e jovenan cu ta durf y ta participa
na e casting nacional di AMS2008” ta palabranan di Ronchi De Cuba kende ta e
producer di AMS2008 y tambe un di e juradonan di dicho evento.
Logicamente e organizacion di AMS2008 ta sumamente contento cu e reacion cu nan
a ricibi di parti di e jovenan di Aruba. Ta aki ta caminda e “fashion
journey” di e jovenan aki lo cuminsa. E experiencia di ta un participante
di AMS2008 lo permanece pa semper serca e participantenan mescos e caso cu
esnan cu a participa na 2006 y 2007.
E seminarionan, entrenamientonan,
acontecimientonan di AMS2008 lo fungi como un fundeshi solido pa cu e futuro di
e participantenan. Awor ta e momento decisivo....e momento caminda cu
cada participante di e casting nacional di AMS’08 lo hanja sa si nan ta forma
parti di e grupo pre-seleciona di participantenan di AMS2008. Mayan,
diasabra dia 15 di Maart, un fecha historico, un evento sin igual, caminda cu
lo pre-seleciona e posible super estreyanan di modelahe di Aruba pa tur skina
di mundo. Awor e ta keda completamente na e jovenan di Aruba si nan ta
presenta na Havana Beach Club y dal e prome paso pa cu posibel logronan inmenso
na nivel internacional ! Pa mas informacion yama 582-6632.
| Comments () >> |
 |
 |
