| Awenochi ta Teen Talents Unleashed |
|
|
|
| Friday, 09 May 2008 - 10:54 | |
E aña aki e famoso y historico Kiwanis KeyClub di Colegio Arubano cu tin mas di 30 aña den servicio na nos comunidad ta preparando su mes pa tene e show di talento mas grandi y luhoso na e historia di Colegio Arubano. E show aki lo tuma lugar riba 9 y 10 di Mei 2008 den e mahestuoso Crystal Theater situa na Renaissance Aruba Resort and Casino. E show aki ta uno completamente sin competencia y fondonan recauda lo bai bek den nos comunidad.
E acotonan cu lo presenta e dos anochinan aki lo ta All Around Squad, Central Pieces, Hilyann Croes, Zoë Timmer, Abegail Janil C. Grajo, Josy & Kimy, Stephanie Werleman, Michael Seraus Jazz Ensemble, Last Words, Scarlet, Nova, High Frequency, Arubian Vatos, Thirteen Steps, Unknow Inspiration di Maria College, The Unsolved, Unauthorized, Gionvanni Croes di EPI. For di Dialuna caba e miembronan di Kiwanis KeyClub di Colegio Arubano ta sumamente ocupa ta bende nan tickets pa e tan spera show. Tin varios lugar na unda pueblo di Aruba por pasa cumpra nan carchi. For di Maria College serca Ricardi Yrausquin na Fabulous Store entre Refresqueria Italia y e restaurant Peanuts den centro di Oranjestad. Almunonan di Colegio Arubano por cumpra ticket durante oranan di pauze den Hall, na Ciclo Basico "Emmaschool" den lokaal EM14 y na Colegio Pariba serca oficina di Meneer Fingal. Ademas di tur e localidadnan aki por cumpra na e miembronan di Kiwanis KeyClub di Colegio Arubano mes y riba e anochi na porta pa 15 Florin. E show aki ta na cargo di e hobenan Daniel Quant y Marko A.J. Espinoza conocido productor di Star Revue 2005, 2006 y 2007. Ambos hunto cu e grandioso crew di Kiwanis KeyClub di Colegio Arubano lo percura pa e show aki ta un exito rotundo. |
