|
Hyatt cu proyecto "bo tambe por" |
|
|
|
|
Friday, 16 May 2008 - 00:01 |
|
 Diasabra awor, 17 di mei 2008 pa 17:45 cu un ceremonia di apertura, ta duna inicio na e competencia nacional di landamento sincronisa di Arubaanse Zwembond. Cu e ceremonia aki ta start un fin di siman di competencia, caminda ekipo di landamento sincronisa di Aruba lo midi forza cu esnan di Corsow y Florida cu a haña invitacion special di AZB pa participa na e competencia aki. Lo landa na Piscina Olimpico Roly Bislik na Savaneta ariba dos dia esta, diasabra atardi y diadomingo mainta, cuminsando pa 10:00 am. E competencia ta culmina cu entregamento di medaya y trofeo alrededor di 12:00 di merdia riba diadomingo. Click read more pa mas detayes.
Hyatt Regency Aruba Resort & Casino, cu su projecto Bo Tambe Por ! ta sponsor e medaya y trofeonan pa e ganadornan di e evento aki. Ta trata di e siguiente categorianan: riba diasabra despues di e ceremonia di apertura: solo sincro mientras cu diadomingo mainta lo tin e competencia pa e duo y ekiponan. Den cada categoria tin categorianan di diferente edad. Categorianan ta parti den esnan cu ta cuminsa nobo den landamento sincronisa, hoben bou di 12 aña, hoben den edad entre 13 – 15 aña y edad di 16 – 18 aña di edad.
Hyatt Regency Aruba Resort & Casino pa e evento aki ta manda palabra di exito pa e ekipo di “Barracudas Synchronized Swimming Team”, Talentonan di Bo Tambe Por ! cu ta participa den competencia e fin di siman aki. Hyatt Regency Aruba Resort & Casino y Bo Tambe Por ! ta hopi orguyoso di e ekipo di Barracudas pa nan logronan local y cu semper nan a tene e nomber di Aruba na halto internacionalmente. Un ekipo di taya Olympico ! Henter pueblo di Aruba ta invita pa bin mira e eventonan spectacular aki y asina tambe apoya nos atletanan y duna nan un curashi nan pa rindi mihor durante e competencia aki y gana hopi medaya y trofeo.
E projecto Bo Tambe Por ! ta un projecto di Hyatt Regency Aruba Resort & Casino. Un esfuerzo pa duna bek na e comunidad di Aruba despues di 20 aña di existencia. E comite organisador ta uno hopi entusiasma y yen di energia pa traha pa e projecto. Bo Tambe Por ! ta un programa specialmente diseña pa hubentud den edad escolar, dunando nan asina e oportunidad di expresa nan talentonan ariba varios tereno. Di e forma aki tambe Hyatt Regency Aruba Resort & Casino ta honra e esfuerzo diario cu e talentonan ta desplega y ta purba di encurasha nan, y tur otro hoben, pa sigui sobresali ariba nan tereno individual. E intencion na mes momento ta pa introduci y expone otro hoben na e diferente Talentonan aki. Nada ta pasa ariba su mes, e poder di exito ta den nos man: ta e lema di Barracudas Synchronized Swimming Team y e ta uno asina importante cu e por sirbi como estimulo na otro hoben.
Bo ta sinti cu bo kier landa sincronisa, practica cualkier otro deporte of arte? Sigui bo instinctonan y purba di hasi e deseo ey un realidad.
Bo tambe por!
| Comments () >> |
 |
 |
