| Drs. Marisol Lopez-Tromp ta reflecciona |
|
|
|
| Friday, 16 May 2008 - 00:00 | |
|
Na Aruba nos conoce varios situacion den famia: Famia cu un solo mama of tata. Mas of menos 17% di e poblacion Arubiano ta biba den un famia cu un solo mama of tata. E causa mas importante di esaki ta e aumento di casonan di divorcio y separacion di parehanan cu ta biba hunto. Un otro causante di e situacion aki ta e casonan di embarazo hubenil. Despues di 1991 23.6% di tur famia na Aruba tabata di un solo mama of tata y na 2002 ela subi te 25.2%. Famia cu un madrastra of padrastro y Famianan Adoptivo. Aunke cu no tin cifranan exacto pa indica e cantidad di famia cu tin un madrastra of padrastro of cu ta famia adoptivo, tin registra na 1999 mas of menos 300 mucha adoptivo cu ta ricibi pago di ayudo social. Famia di mama hubenil. Na 2000 a registra 63 caso di embarazo hubenil y na 2001 69 caso di embarazo hubenil. E cantidad di embarazo entre e edad di 15 pa 19 aña ta di 5.1 muher pa cada 100. Esaki ta mescos compara cu Merca pero hopi mas halto compara cu Hulanda unda cu e ta 0.4. Famia cu problema di conducta manera violencia of adiccion. Situacionnan problematico y complica den famia ta causa tensionnan y problemanan grave bao mucha, hobennan y adolescente tanto na cas como na school cu por tuma formanan grave den nan conducta, manera keda sin bai school, uso di alcohol & droga, sex sin proteccion, vandalismo hubenil, joyriding y criminalidad. Famia cu entrada abao. E ultimo censo 2000 ta indica un structura di entrada pa personanan individual a base di cual por wordo calcula cu e percentahe di personanan cu trabao di 14 aña of mas cu un entrada di Awg1500 of menos ta mas of menos 25%. Aunke esaki no ta indica cuanto famia tin cu entrada abao toch e ta un duna un impresion di e situacion. Famia cu un miembro cu limitacion sea mental of fysico. Un persona cu limitacion ta exigi hopi atencion di e famia y ta influencia e karacter di e famia. Ademas, un famia cu un miembro cu limitacion ta trece hopi gasto di salud. Na prome lugar e famia ta importante pa e miembronan di famia kendenan ta ricibi amor, siguridad y sosten. Na di dos lugar e famia ta importante pa e comunidad ya cu e famia ta manera un bloki primordial den construccion di un comunidad fuerte, stabil y sano. Den cuadro di e importancia di un famia gobierno ta sinti e necesidad pa proteha e rol di famia y ta haci esaki den su maneho social por medio di entre otro hiba servicio social mas cerca den cada distrito di famianan na Aruba, construccion di vivienda social, proyectonan pa mehoracion di situacion financiero di cada famia (cuida bo cartera) y tambe proyectonan pa bolbe pone mama/ tata di famia den necesidad y cu ta riba lista di bijstand na trabao. Por ultimo, Minister drs. Marisol Lopez-Tromp kier desea cada famia di Aruba hopi amor y felicidad den nan seno awe y tur dia di aña. |
