Vuelonan ‘precleared’ door di Douane Mericano na Aeropuerto Internacional Reina Beatrix ta ser considera como un vuelo domestico na Merca. Comercialmente e cambio di e tratado tin un significacion hopi positivo. Universal Aruba General Aviation Terminal actualmente ta competi den e area di Caribe cu facilidadnan di general aviation na Venezuela y Curaçao. Awor Aruba por competi tambe cu San Juan y Fort Lauderdale.

Na principio di e aña aki Aruba tabata e prome pais cu cual e autoridadnan Mericano a hiba conversacionnan riba e asunto aki. Otro paisnan cu e autoridadnan di Merca a acerca despues di nan bishita na januari y deliberacionnan na februari di e aña aki tabata Irlanda, Bahamas y Bermuda. Cu e paisnan aki Merca ainda no a logra un acuerdo. Sin embargo na Aruba danki na e actidud receptivo di Gobierno di Aruba y iniciativa, consehonan y determinacion di tur esnan envolvi departamentonan gubermental y sector priva di Aruba, nos pais a bira un modelo pa tur e otro paisnan cu falta pa completa nan customs preclearance cu e inspeccion di avion priva pafor di teritorio Mericano.

Finalmente si tur cos bai manera planea e prome vuelo inaugural for di Universal Aruba General Aviation Terminal lo tuma lugar na september di e aña aki.Durante su estadia na Washington Prome Minister lo sostene conversacionnan cu Secretario General di e Organizacion di Estado Mericano (OEA), sr. José Insulza, riba e ultimo desaroyonan politico den nos region. Tambe Prome Minister Oduber tin reunionnan na Merca cu e Assistant Secretary of Western Hemisphere na Departmento di Estado y e Chief of Staff di Departamento di Treasury.

Gobierno di Aruba hunto cu Vice Consul di Merca na Curaçao, sr. William (Bill) Furnish ta traha duro pa pronto por establece un oficina di un agente consular Mericano na Aruba.