|
Hues a duna Olivieira rason den corte |
|
|
|
|
Saturday, 07 June 2008 - 00:00 |
 Un problema entre dos fundacion di Elias Mansur Sport Park a bay para te den Corte. Tratamento di e caso aki a tuma lugar algun siman pasa, caminda Stichting Elias Mansur Arena (Arena), cu a wordo representa pa mr. D.Kock ta demanda pa Hues ordena Olivieira, cu a wordo representa pa mr. A.Swaen, como miembro di e directiva di stichting Elias Mansur Sport Stichting (Sport) firma pa e traspaso di e propiedad pa Arena. E caso ta relaciona cu e hecho cu segun Arena, e directiva di stichting Sport no ta activo mas y cu Arena lo kier trece bida atrobe den e stadion. Click read more pa mas detayes.
Arena a demanda pa Hues ordena Olivieira pa dentro di 48 ora despues cu e sentencia a keda firma, acudi na notario N.Tromp pa asina hunto cu Mansur cu ta e presidente di e directiva Sport, firma e traspaso di e tereno pa Arena. A exigi un danjo per huicio di 500 florin pa cada dia cu Olivieira keda sin cumpli cu e sentencia. Subsidiario Arena ta demanda pa di acuerdo cu ex articulo 6 lid 2 di e statutonan di stichting Sport, Carlo Mansur y Alex Mansur lo wordo propone como miembronan di directiva di stichting Sport. Aki atrobe a demanda 500 florin pa cada dia cu Olivieira keda sin cumpli. Tambe Arena ta demanda pa Hues ordena e cinco miembronan di directiva di stichting Sport esta Mansur, Olivieira, Johann Conradd Oduber, Jose Ramiro Lacle Miguel Mansur pa nombra miembronan nobo pa e vacatura cu ta existi den e directiva. E partidonan a trece nan punto di bista padilanti y ayera mainta Hues a dicta sentencia, caminda basicamente e ta rechasa tur e demandanan di Arena.Hues a mustra cu no por cuminsa un caso sumario riba miembro individual di un directiva y pesei ta rechasa e demanda. Tambe Hues a rechasa e otro demandanan. Esaki a base di e reglanan di e statutonan di stichting Sport cu no ta permiti personan di afo ta mete den e constelacion di e directiva.Hues a mustra tambe cu Olivieira ta desmenti categoricamente e ponencia di Arena esta cu e directiva di stichting Sport no ta completo y no ta funciona. Mr. Swaen a menciona e nombernan esta: Mansur, Olivieira, Jose Ramon Lacle, Karel Williams, Leon Jesus E. Halabi, Jozef Bertran Croes, Richard V. Simon. Cu esaki e abogado a demostra cu e directiva ta existi y ta den funcion.
Den su analisis di e caso, Hues a duna Olivieira rason den su ponencia cu Mansur como e interesado no mester a dirigi su demanda solamente riba Olivieira sino riba henter e stichting Sport y cu esaki ta motibo pa rechasa e demandanan di Arena contra Olivieira. E problema cu tin entre e partidonan ta cu no por saca afo kende ta of kende no ta forma parti di e directiva di stichting Sport y Hues no ta haya cu esaki ta un asunto cu mester wordo discuti den un caso sumario. Hues a rechasa e demandanan di Arena contra Olivieira.
| Comments () >> |
 |
 |
