24ora.com - Your news provider - Emocionante fin di siman den ciclismo

Latest Photo Ads
TURBO KIT GT42 Auto Segunda Mano (19.11.2008) Ta Bende Electronics (19.11.2008) Ta bende Airshifter Ta Bende Brommer (19.11.2008) Hyundai Tucson 2007 Auto Segunda Mano (19.11.2008) Ovation 1861 standar General (14.11.2008)

Emocionante fin di siman den ciclismo

Wednesday, 11 June 2008 - 00:00

Diadomingo ultimo a tuma lugar e di dos parti di bataya di ciclismo entre Aruba y Curacao na e circuito di Warawara. Durante dos careda, unda e prome un time trial unda cada coredo ta core su so pa miho tempo y e di dos un circuito desafiante den e ceronan di Warawara, Boton y Maria Mai, e coredonan di Aruba y Curacao a manda pedal pa yega velocidadnan pa bai cas cu e premionan. Coredonan di Curacao, incluyendo e team nacional di ciclismo hubenil, tabata presente e fin di siman aki pa midi forsa cu contrincantenan di Aruba. Click read more pa mas detayes y imagen.

E presencia di Curacao a presenta un desafio pa coredornan local, stimulando asina miho tempo di tur participante. E caredanan di fin di siman a keda combina den un 2 day stage clasification cual ta tuma den consideracion resultado di ambos careda pa determina premiacion.

RESULTADO DI STAGE 2, CIRCUITO:
Den careda di roadbike di circuito, stamina, velocidad y strategia, tur ta combina pa interesante y exhilerante careda. Aki ta unda coredonan ta forma den peloton pa kibra biento y spaar energia. Atakenan, ora un coredo ta haci esfuerso pa kibra for di e peloton, ta forma parti di strategia con cada coredo ta coloca su mes miho pa yega e liña final prome. Durante e careda di circuito experiencia y traha den team ta ventahanan cu ganadornan sa di probecha ademas di talento y forsa fisico. E clima di diadomingo tabata calor sofocante, cual combina cu e circuito di subida precipioso a pone a prueba e capacidad di tur coredo.

Den e categoria di ELITE A, coriendo 102 KM, George Winterdal di Aruba a termina na prome luga cu tempo di 3:08:52. Na di dos luga, djis su tras, a termina Jerry Otten di Curacao cu tempo di 3:08:53. Na di tres luga, cu un tempo di 3:14:09 a termina Andrick Fingal diAruba.

Lucien Dirksz
Den categoria di ELITE B cualnan a core 74.8 KM di distancia, a termina na prome luga, Lucien Dirksz, cu tempo di 2:17:28, sigui pa Micheal Roos cu 2:28:19 y cerando e top tres clasificado den stage 2 tabata Victor Vrolijk kende a termina cu un holoshi marcando 2:33:13. Tur e tresnan aki tabata di Aruba.

Den CATEGORIA JUNIOR 74.8 KM a keda domina pa e ekipo nacional di Curacao cual a bai cu tur tres prome puesto. E coredonan di Curacao, den un muestra di teamwork resaltante tur a termina pareu den un abraso fraternal. Registro oficial ta mustra Timothy Kook, Deniel Juliana y Quinten Winkel tur cu tempo di 2:17:20.
Den CATEGORIA PRE-JUNIOR cu a core 54.4KM a registra: prome luga, Adolfo Gomes di Aruba cu tempo di 1:47:59. Net un seconde su tras den un sprint hopi preta, a sigui Wilfrid Camelia di Curacao cu1:48:00. Na di tres luga a termina Sebastian Ton di Curacao cu 1:49:43.

CATEGORIA DAMA 54.4 KM, Doreen Kralick a termina na prome luga cu tempo di 2:00:25, sigui pa Shariska Dirksz cu 2:07:01 y Josemary Geerman na di tres luga cu 2:27:26. Na cuater lugar a completa Daniela Chica den 2:49:30. Tur dama competido tabata di Aruba.

CATEGORIA SUBMASTER 54.4 KM. Na prome luga, a keda Fabio Sanchez (Aruba) cu tempo di 1:48:58. Sigui na di dos luga pa David Self den 2:32:16. Ambos coredo cu a termina henter e ruta tabata di Aruba.

Den CATEGORIA DI MASTER 54.4 KM, e prome luga a hiba nomber di Albert Raven den 1:50:24, sigui na di dos luga pa Jan Hendrik Flanegin cu 1:55:29 y Gabriel Ienna cu tempo di 2:04:11. En total tabata tin 7 coredo den e categoria aki, tur di Aruba.

Exitante bataya entre Aruba y Curacao:
E careda a conoce varios atake durante su transcurso y tambe a experiencia varios sprint pa e recta final. Particularmente por menciona e finish entre Adolfo Gomez di Aruba cu a termina un seconde prome cu Wilfrid Camelia di Curacaoden categoria pre-junior. Den e maximo categoria Elite A, George Winterdal, Gino Hodge, Andrick Flanegin di Aruba a hiba interesante bataya strategico cu Jerry Otten di Curacao unda esakinan tabata den sombra di otro pa gran parti di e careda. Faltando 3 buelta pa bai sinembargo George Winterdal ta bai den atake lagando e peloton. Jerry Otten aki ta siguiele por bisa resto di e careda. E final a termina den un sprint entre e dos coredonan aki, unda George Winterdal ta logra perservera pa algun seconde.

Publico presente, cual ta inclui fiel fanaticada di ciclismo, a presencia algun tremendo careda. Excitante perom mas cu tur un tremendo ambiente. Directiva actual di AWB, guia door di presidente Mervin Thiel, vice presidente Nick Erasmus, cu un grupo di voluntario manera Juelle Thode, Reynaldo Mackintosh, Gilbert Dijkhoff, Nico Robert, Shannon, y demasiado otro pa menciona den un solo comunicado, ta fomentando careda y ambiente di ciclismo casi tur fin di siman na Aruba.

E proximo eventonan auspicia pa AWB ta 14 di juni proximo, esta e Youth National Championship Race Time Trial y careda di BMX riba 14 di juni. Diadomingo 15 tin youth national championships di roadbike.

Ademas ta preparando pa 22 di juni unda di awor caba ta invita un y tur pa lo tin un family bike tour recreativo. Mas informacion lo ser publica den proximo comunicadonan di anuncio., Pa esnan cu di awor caba ta desea mas informacion por tuma contacto cu AWB na This e-mail address is being protected from spam bots, you need JavaScript enabled to view it of riba website: www.arubacycling.net.