| Fiscal ta pidi tres y dos anja pa tirado |
|
|
|
| Friday, 20 June 2008 - 00:00 | |
 Diabierna Huez a trata e caso di e dos hombernan Gloriendrik W. Anthony y Gilbert J. Raven. Anthony ta acusa cu dia 23 di februari 2008 a los tiro riba e homber R.A. Reid, y a heride na su pia. Raven ta acusa di ta complice den e tiramento y ta esun cu a duna Anthony e arma. Segun e procesverbaal di polis, polisnan a bai pa 4.15 di madruga na Havana Beach Club, pa un pelea, naunda tiro lo a cai. Na caminda polisnan ta haya informacion cu lo tin un hende benta banda di Clinica Posada. Nan ta bai y ta topa cu un homber herida riba acera. Click read more pa mas detayes.
E tabatin herida na su cabez y
un tiro na su heup. Segun e victima e tabatin un discusion cu un
persona den Havana, pero no tabata mucho cos. Y ora cu el a sali, pafo
di e luga el a wordo tira pa e homber cu kende el a haya problema cune.
Polis a haya sa cu e homber tabata Reid y a core bai ora cu el a haya e tiro. Polis a bai poli y a confisca e paña cu Reid tabatin bisti. Reid ta bisa den su declaracion cu e tabata den Havana y a cuminda un ex amiga di dje. E homber para banda di su ex a puntre si e tin problema. Ora cu fiesta a caba el a bai pafo y su amigo a bise cu tin bringamento. El a bisa e amigo no bai mira bringamento, pero mira mucha muhe. Despues el a tende un tiro y a mira e mesun homber bisti cu sweater Guchi a mik riba dje. E a bisa di susto el a core bai. E ta bisa cu e no tabatin problema cu e homber. For di Anthony , polisnan a confisca su celular, dos pasashi, como cu e tabata bayendo Corsow y tambe e paña cu e tabatin bisti. Declaracion di Anthony Anthony mes den su declaracion ta bisa cu el a bai Havana den bus di Raven. E ta bisa cu ora cu Raven a bahe , el a dune un pistool. Raven a keda warde den auto. Pero e ta bisa cu el a haya problema paden y a sali bek. E ta bisa cu e hendenan a bise cu bo no por laga e cos asina. E ta bisa cu ora cu e tabata pafo, e homber a bin riba dje. El a tira riba e homber su pia y despues a core bai. Mientras cu e tabata coriendo e arma a cai y nunca mas el a haye. El a drenta e bus di Raven y el a hibe su cas. E ta bisa cu e motibo cu el a tira riba e homber ta cu e homber a pushe, y despues ora cu e tabata pafo, el a mira e homber ta cana bin riba dje. E ta bisa cu el a tira ora cu e homber tabata dos stap for di dje. El no a tira cu intencion di herid’e, pero simplemente pa spante. Den otro declaracion, Anthony ta bisa cu el a bin di vacantie di Hulanda y a topa cu su ex. Gilbert e bise cu e tin problema cu e mesun persona y kier pone fin na dje. Anthony ta bisa cu el a bai na cas di Gilbert, kende tabatin un arma hinca na su paña y a dune e arma, cu cual el a drenta den Havana cune. Anthony a bisa cu el a pasa cu e arma dor di e metal detector y tambe el a wordo listra na su curpa y nan no a haya e arma. Despues cu el a haye den problema den Havana, el a dicidi di bai cas. El a laga su amiga bahe na cas di Gilbert y einan el a bisa Gilbert cu el a haye den problema cu un homber desconoci. Gilbert a bise cu por ta nan a manda e homber pa mi. Anthony a bisa cu el a cana cu Gilbert bai na e auto y a conte cu e homber a pushe den su cara. Gilbert a dicidi di bai cune na Havana. Ora cu su amiga a mira cu nan tabata bai bek Havana, e amiga a sera e auto di Gilbert, pero el a maniobra e bus y a bai toch. E ta bisa cu Gilbert a bise pa e tene ciudou, como cu na Aruba tur hende ta cana arma. Raven deteni. Despues di e declaracion di Anthony, polisnan a detene Raven, como cu e ta esun cu a duna Anthony e pistol. Raven den su prome declaracion a bisa cu e no a bai Havana. El a bisa cu e no a duna Anthony arma. E ta bisa cu Anthony a lante madruga pa dune un lift pa Havana. Ora cu nan a yega Havana, Anthony a bise warda un rato y el a bai bolbe. Raven a bisa cu e no a baha for di e auto y a keda sinta den airco y tende su muziek cu a auto gestart. E ta bisa cu e no sa di arma y nunca e no a usa arma. Fiscal den su rekisitorio a bisa cu Anthony a bisa cu Raven a dune e arma y bayendo Havana, Raven a saca dos pistol y a duna Anthony uno y a keda cu e otro. Den su ultimo declaracion Anthony a bisa cu el a bai cu su amiga Havana y debi cu el a haya problema, el a bai cas y a bai bek Havana cu Gilbert. Tambe Fiscal ta bisa cu den otro declaracion Anthony ta bisa cu el a bai cu su amiga na cas di Gilbert busca paña y Gilbert a dune e arma pa su defensa. Fiscal ta bisa cu e problema di Gilbert ta cu el a desmenti demasiado. Den su declaracion e ta bisa cu e no a bai nightclub, siendo tin declaracion di un testigo cu a bisa cu e tabata rabia sinta den e bus. Fiscal ta bisa cu Raven a nenga dos biaha despues el a declara cu Anthony a bin buske na cas y a conte su problema y a bise pa hibe na Havana y sin puntra el a bisti T-shirt y a bai cune. Fiscal a bisa cu Raven no a puntre nada, el a para e auto, lague baha y despues di mas o menos 1 ½ minuut, Anthony a bolbe y a bise hibe su cas. Fiscal ta bisa cu e declaracion aki no ta aceptable, pero contra e declaracion aki, tin esun di Anthony, kende a bisa cu Raven a conta Anthony di e problema como cu e no tabatin intencion di bai bek Havana. Loke Fiscal ta pensa cu tur dos sospechoso ta purba di tapa bastante. Fiscal ta bisa cu no por yega na e conclusión cutabatin plan, no por proba y no por papia di complice. Anthony a comete e hecho suso. Fiscal ta duda den e declaracionnan, pero e no ta kere cu Anthony ta gaña riba Raven cu el a dune e arma. Según Fiscal, Raven a dune e arma, el a hibe Havana y despues a trece bek, tur esaki ta bisa cu ta complice y e delito a wordo proba. Anthony a haci e intento pa mata Reid, y Raven a yuda dor di duna e arma y a transporte. Fiscal ta bisa cu e tabatin arma den su poder sin permit y ta sigui bisa den su rekisitorio cu e ora di 2.30 di madruga na Havana, naunda tin hopi hende, e ta bisa cu e consecuencia por tabata peor y hasta moprto por a cai. Fiscal ta bisa cu den e delito aki, tur dos ta first ofender y e ta tene cuenta cu Anthony ta bayendo scol na Hulanda y a bini pa Carnaval y no por a bai scol bek. E ta pidi 36 luna pa Anthony y pa Raven cu e facilita e arma el a pidi 24 luna. Huez ta dicta sentencia dia 27 di juni. |
