| Departamento di Finanza no a duna placa |
|
|
|
| Tuesday, 01 July 2008 - 00:00 | |||||
 Diahuebs mainta Huez a trata e caso di e hoben J.C.L.J. Krosendijk, kende dia 9 di april a horta un auto. E ta wordo acusa di a usa violencia y a mustra e señora un cos cu ta blink pa bahe for di auto y a bai cune. Segun e procesverbaal, e señora hunto cu su yiu muhe ta parti corant y banda di 4’or di madruga, e yiu a para e auto y a laga e porta habri cu yabi den dje, y a core baha pa entrega corant. Su mama tabata sinta patras den e auto. Na momento ei, e sospechoso K. a bula drenta den e auto y a purba bai cune. E mama a grite pa sali for di e auto, pero el a bisa e mama cu ta e mester sali. Click read more pa mas detayes.
E mama hasta a dal K, ora cu e tabata purba bai cu e auto. E tabata busca e handrem pa sali cu e auto, pero no por a haye. Despues cu el a haya e handrem, el a saca e auto cu furia y e mama a haya un chens y a bula for di e auto, lagando su tas atrás cu 2 celular, documentonan importante. E yiu su declaracion tabata mescos cu esun di e mama. Huez ta bisa cu dia 9 mesora nan a haya un lista di e telefon. Según e procesverbaal, riba e lista un polis a mira un number di un muhe conoci y despues a sali na cla cu ta number di telefon di mama di Krosendijk. Polisnan a bai detene Krosendijk y e describcion a cuadra cu locual e dos victimanan a duna. El a keda deteni dia 11 di april.
Declaracion di Krosendijk. El a declara cu e tabata den caya ta usa free base. El a mira e lus sendi y porta di e chofer habri, y motor sendi. El a drenta den e auto y a tende un muhe grita stop. E ta bisa cu e no tabata sa cu tabatin hende den e auto.El a para y e muhe a baha for di e auto. E ta bisa cu despues el a sconde e auto den mondi. Den e auto tabatin un tas cu dos celular. El a saca contenido di e tas y e benta e tas afo. El a duna un prima di dje e cel, locual cu e prima a nenga despues den su interrogación. E ta bisa cu un celular el a bende cu un tal Monti pa 35 florin y otro celular el a bende cu Jonathan pa 50 florin. Huez a mira su strafkaart cu tabata basta largo. E tabata bayendo EPB, pero pa su conducta nan a kite for di scol. Loke Huez a haya remarcabel ta cu pa tur e delitonan cu el a comete, nunca el a haya un sentencia di bai sera. Den un sentencia prome e mester a bai Brasami Huez ta bisa cu según e documentonan, dia 14 di februari, el a wordo poni na disposición di Gobierno y mester a wordo interna den Brasami na Corsow, te ora cu e cumpli 18 aña. Despues di e sentencia a pidi permit di Minister di Husticia kende a bai di acuerdo, pa tuma e gastonan. Y departamento di Finanzas mester a paga e gasto di e tramitenan, pero esei no a wordo haci. Brasami tabata di acuerdo pa tume. Krosendijk ta bisa cu e ta usa droga, pero e no ta un drogadicto. Daño di perjuicio E dos victimanan tabata den Corte y a pidi daño di perjuicio di 3450 florin. Esei ta encera bril di e mama, na balor di 1000 florin, Noclaim di seguro cu nan a paga, y tambe e dianan cu nan mester a huur e auto, debi cu nan trabou ta exigi cu nan tin mester di auto. E mama tabata kier a haya 10mil florin pa daño inmaterial, pa locual el a sufri psichicamente. E mama ta bisa cu te ainda e ta na man di Dr. Van Gaalen, como cu el a keda cu miedo di bai riba caya. Fiscal den su rekisitorio ta bisa cu Krosendijk a usa violencia pa por a bai cu e auto. E ta bisa cu no tin mester di dos prueba pa mustra esei, como cu declaracion di e dos victimanan mes ta suficiente y ta comproba. Fiscal ta bisa cu for di tempo cu e ta Fiscal na Aruba, ya el a topa cu e mesun sospechoso aki, sinco biaha. Sempere ta gaña cu e no ta usa droga. Fiscal ta bisa cu e no ta kere. Fiscal a pensa cu su cabes yen di droga e mester usa violencia. E ta pidi pa paga e daño material, manera a wordo pidi, pero no esun inmaterial ta difícil pa comproba. Ministerio Publico ta bisa cu ta duele cu e no por a wordo interna den Brasami y no a drecha su bida, pero a traumatisa dos persona cu violencia y ta pidi 2 aña incondicional, kitando e tempo cu e ta sera caba. Abogado Mr. van Esch, ta bisa cu e sospechoso ta nenga cu el a haci acto di violencia y no a haya otro declaracion di polis cu a sostene e declaracion di e mama. E abogado ta mustra cu pa e castigo, mester tene cuenta cu su situacion social. E ta bisa cu e tin dos luna y mei sera y te ainda, ningun di su mayornan a bin bishite. E ta bisa cu su cliente a bisa cu e tin duele pa locual cu el a haci y ta dispuesto pa bai Brasami. Huez ta haya legalmente y convincentemente proba cu el a horta e auto pero ta duda den cu el a usa violencia. Pa esei e ta declare liber pa e straf. Huez ta bisa cu su strafkaart no tin ningun cuminda cu el a wordo condena na castigo di prison, sino solamente cu el a wordo poni bou di disposicion di Gobierno. Huez a bisa cu e mester haya un castigo, cu algo ta keda colga riba su cabes. Huez ta lamenta cu no a mande Brasami, dor cu departamento di Finanza no a duna e placa. E ta dune un castigo di diesdos luna di cual 1 luna condicional, kitando e tempo cu e tabata sera . Huez ta bisa cu e ta duna Fiscal tempo pa Finanza percura pa duna e placa pa mande Brasami.
Turtle
said:
|
|||||
 |
Tur esaki, pasobra finansas no kier a duna placa??? Kiko a para cu uza un tiki tino y para responsabel pa bo propio actonan?? Mi a stop di bay scol, cumisna cumpra droga, pero mi no ta un drogadicto , pasobra finansas no a duna mi placa pa paga scol  I just don't get it) Don't stand up only for your rights, but also for your acts. |
