| Streanan nobo lo briya na Monterrey Mexico |
|
|
|
| Monday, 07 July 2008 - 00:00 | |
 E segundo edicion di e “FINA World Youth Swimming Championships” lo cuminsa diamars, 8 di juli na Monterrey (Mexico). Te cu diadomingo, 13 di juli, landadornan juvenil di mas o menos 70 pais lo competi den e compleho di piscina “Centro Acuatico de la Universidad Autonoma de Nuevo Leon”, situa den e ciudad di Monterrey. E campeonato ta habri pa landadornan femenino di 14-17 aña y landadornan masculino di 15-18 aña y ta representa pa hopi di nan e prome oportunidad di briya na nivel internacional. Click read more pa mas detayes y imagen.
Ademas, manera Presidente di FINA, Mustapha Larfaoui, a bisa: “E experiencia cu e atletanan hoben aki lo gana, ta duna nan un motivacion valioso pa e desaroyo di nan carera deportivo. Nan por comparti e experiencia di a competi den un evento di nivel mundial cu nan compañeronan di nan equipo, dunando asina un empuhe grandi y fresco na e ambiente deportivo den nan país.”
Danki na e aporte financiero di Comisión di Subsidio, Fundación Lotto pa Deporte, Arubaanse Zwembond y e propio mayornan di e landadornan, Aruba ta representa na e “FINA World Youth Swimming Championships” na Monterrey den persona di dos hoben landador estelar di nos país, Ashley Groters y Derek Groters. Ashley lo competi den tres evento, cu ta 50 meter, 100 meter y 200 meter Freestyle. Derek lo competi den dos evento, cu ta 200 meter y 400 meter Freestyle. Arubaanse Zwembond ta gradici Comisión di Subsidio pa e apoyo, cu a hasi e participación di nos país na e campeonato mundial juvenil aki posibel. Naturalmente tin tur confianza cu Ashley y Derek lo sa di duna un bon actuación na Monterrey y cu nan lo sigui nan progreso tan extraordinario, na caminda pa competencianan mas grandi.  |
