| Awasero di medaya pa Aruba den landamento |
|
|
|
| Tuesday, 22 July 2008 - 00:00 | |||||||||||||||
 Mey mey di un awasero torrencial cu a dal Jamaica, e delegacion Arubano a produci un awasero di medaya pa nos pais. No menos cu 12 medaya den un solo dia, e cantidad mas halto den historia di landamento Arubano, ta loke e hoben landadornan a cosecha. Enfrentando un total di 14 pais di Caribe, Aruba a posiciona su mes solidamente na un septimo puesto actualmente, net tras di paisnan grandi den e deporte di landamento manera Trinidad & Tobago, Puerto Rico, Bahamas y Republica Dominicana. Click read more pa mas detayes y imagen.
E landadornan Arubano a lucha cu
tur nan forza, no solamente contra e landadornan di otro paisnan, pero
tambe contra awasero y biento fuerte, y tin biaha te hasta strena cu
lamper cu diasabra a afecta e competencianan durante e “Caribbean
Islands Swimming Championships” (CISC).
Asina mes nan a demostra e gran progreso cu Aruba a logra den e deporte di landamento durante e ultimo añanan. Masha positivo tabata e comentarionan di e otro paisnan, cu a mira e progreso y a considera esaki favorable pa e deporte. Medayista Olimpico Cubano, Rodolfo Falcon a comenta cu dirigentenan di Arubaanse Zwembond: “Mi felicitacionnan na boso pa un gran trabou. Aruba ta posicionando su mes entre e potencianan di landamento den Caribe.” Diasabra en realidad tabata un dia grandioso, cu no menos cu 12 medaya pa e seleccion Arubano. Entre nan cinco medaya di oro, 2 medaya di plata y 5 medaya di brons. Esnan cu a gana medaya tabata: Medaya di oro: Jan Roodzant (200 meter Freestyle), Derek Groters (200 meter Freestyle), Ashley Groters (200 meter Freestyle), Jordy Groters (200 meter Schoolslag), Equipo di Relevo mucha muhernan 11-12 aña (4x100 meter Freestyle). Medaya di plata: Daniella van den Berg (200 meter Schoolslag), Valerie Eman (200 meter Freestyle). Medaya di brons: Ashley Groters (200 meter Schoolslag), Daniella van den Berg (200 meter Butterfly), Jordy Groters (50 meter Butterfly), Valerie Eman (400 meter Individual Medley), Equipo di Relevo mucha hombernan 13-14 aña (4 x 100 meter Freestyle). Riba e portretnan por mira algun di e landadornan durante CISC na Jamaica. Pa motibo di mal tempo, e ceremonia di entregamento di medaya a keda pendiente te diadomingo anochi. Den e proximo edicion, nos lo manda portret di e ganadornan cu nan respectivo medaya.
Orguyoso di boso.
said:
|
|||||||||||||||
 |
Pabien Pabien Pabien , cu papa dios bendiciona boso i companja boso henter boso bida pa boso keda den DEPORTE i representa Aruba en Grande. BENDICION MENSEN |
what goes around...
said:
|
Ei nos ta ! pabien na tur y sigi asina !  |
ombo
said:
|
Pabien.. awosero di sunchi pa boso.. succes |
