| Prome dia di compencia di CISC uno productivo |
|
|
|
| Tuesday, 22 July 2008 - 00:00 | |||||||
 E prome anochi di finalnan di landamento den e “National Stadium Pool” na Kingston, Jamaica, a produci no menos cu tres medaya caba pa Aruba den landamento. Y tur e medayanan a wordo gana riba e mesun distancia: 100 meter Freestyle. Jan Roodzant, e atleta cu dentro di poco lo representa nos pais na e Weganan Olimpico, a gana medaya di oro den e categoria cabayeros di 18 aña y mas, Valerie Eman a gana brons den e categoria damas 18 aña y mas, mientras cu Ally Ponson tambe a sa di gana un medaya di brons den e categoria mucha muhernan 11-12 aña. Click read more pa mas detayes y imagen.
Ademas di e tres medayanan aki, Ashley Groters y Daniella van den Berg a sa di termina na un bunita cuarto puesto, herando pa poco un medaya nan mes tambe. Durante e prome anochi no menos cu 12 landador Arubano a sa di clasifica pa e pruebanan final, posicionando nan mes dentro di e mihor ocho landadornan den cada evento. Esey riba su mes caba ta un logro grandi. Cu e anochi a produci tres medaya pa e seleccion Arubano, naturalmente a hasi e alegria den e delegacion mas grandi ainda.
Sin duda e prome anochi tabata uno masha productivo pa nos landadornan cu ta compitiendo den e “Caribbean Islands Swimming Championships” na Jamaica. E competencianan ta sigui te cu diamars, 22 di juli, y por spera mucho mas resultado di e competencianan di landamento y landamento sincroniza di nos seleccion nacional den e deportenan aki. Riba e portretnan por mira ganadornan Jan Roodzant, Ally Ponson y Valerie Eman cu nan respectivo medaya.
|
|||||||
