| Apertura session Comite Olimpico Internacional |
|
|
|
| Wednesday, 06 August 2008 - 11:00 | |
 E spectacular “National Center for the Performing Arts” na Beijing tabata sede dialuna pa e apertura oficial di e di 120 Reunion General (Session) di Comité Olimpico Internacional. Den su discurso, Presidente di e Republica Popular Chino Hu Jintao a menciona e impacto cu e Weganan Olimpico lo tin riba su país. “Ta nos speranza cu atraves di e Weganan, nos por mustra mundo e aspiración sincero di e pueblo Chines pa comparti den e beneficionan di desaroyo y pa hunto cu resto di mundo construi un futuro briyante,” Hu a bisa. Click read more pa mas detayes.
Presidente di IOC Jacques Rogge no a menciona nada den su discurso tocante e controversianan cu a rondona e preparaciónnan pa e Weganan, pero si a remarka e retonan pa China y e oportunidadnan cu e Weganan Olimpico a presenta. “China ta un país den transición, cu un gran futuro, tremendo potencial y algún reto grandi. Mi ta kere cu historia lo mira e Weganan como un punto crucial den e transformación remarcable di China,” ela bisa.
Rogge y su colega miembronan di IOC a pose hunto cu Presidente Hu Jintao riba e escenario di e “Opera House” pa saca un portret prome cu inicio di e ceremonia di apertura di e IOC Session. E parti musical di e programa sorprendentemente tabata dirigi riba e gusto occidental, cu un serie di aria y dueto di operanan popular. Un obra chines so tabata inclui den e programa, cu a finaliza cu e primicia di presentación di “Dream Under the Olympic Flag”, un obra compone specialmente pa e ocasión aki. Durante tres dia e miembronan di Comité Olimpico Internacional lo discuti un gran cantidad di tema riba agenda, entre nan lógicamente e ultimo rapport di Comité Organizador di e Weganan Olimpico di Beijing. Un total di 115 persona ta miembro di IOC, entre nan Nicole Hoevertsz di Aruba. E “Session” di IOC ta tuma lugar anualmente, pero durante e Weganan Olimpico tin un carácter special, mas dirigi riba e diferente aspectonan relaciona cu organización di e evento deportivo mas grandi di mundo, e Weganan Olimpico. |
