| Stichting Ateliers '89 tin workshopnan nobo |
|
|
|
| Thursday, 07 August 2008 - 00:00 | |||||||
 E workshopnan cu lo wordo duna na e ocasion aki ta di CERAMICA y otro di PINTURA /DIBUHO, cualnan lo dura un luna largo. Workshop di ceramica; especialmente pa e ocacion aki a wordo manda for di Hulanda cu bapor un cargamento di klei y glazuur. Igualmente ta bin tambe di Hulanda e docente pa e worshop aki cu ta nada menos cu e artista jufrou; Telka Dodenwaard. E sympatica damita aki a gradua na aña 1999 na Academia di Beyas Artes na Maastricht, Hulanda. Click read more pa mas detayes y imagen.
Inmediato despues di esaki e la haal su Masters na e ya conocido instituto pa postgrado "Sandberg Instituut" na Amsterdam, Hulanda. Ta durante su estudio aki e la bin ta specialisa su mes den e arte di instalacion. Obranan grandi a wordo construi cu ta yena espacionan henter unda cu tambe a bin ta inclui su esculturanan di ceramica. (mira potret)
Durante e workshop planea lo pone enfasis ariba e technica di "Boetseren" y esaki lo wordo adapta den concepto contemporaneo segun e workshop ta sigui. E resultado final despues cu a experimenta suficiente cu diferente modulonan, lo ta un escultura pa persona. E escultura aki lo wordo pinta y enbeyese cu diferente color di Glazuur. E resultado final lo wordo presenta den e exposicion final unda cu tur e obranan di e paricipantenan lo wordo exhibi ariba dia 27 di September den e salanan di exposicion di Stichting Ateliers '89 mes. Na e ocasion unico aki Telka lo wordo yuda den su trabou pa e conocido ceramista Arubana Sra. Trudi Lampe. Participa na September proximo y lagabo mes bai den e tereno aki y disfruta asina di e diferente aspectonan cu e workshop aki tin di brinda den e bunita arte aki di Ceramica. Inscribi bo mes pronto ya cu e admicion lo ta limita y tin espacio pa solamente binti persona. Na mes un momento cu e workshop di ceramica ta andando lo tin esun tambe di Pintura y Dibuho. Workshop di Pintura y Dibuho; aki pintura i dibuho lo wordo dicta pa e maestro Sr. Elvis López. Lo trata aki e basiconan contemporaneo di pintura y dibuho. Unda lo practica e diferente technica di pintura Acrilico. Aki lo trata di guia cada persona individualmente segun nan experticio ariba e tereno ya menciona. Tambe lo pone hopi atencion na e diferente aspectonan di uso di materialnan prima y con pa soluciona e ultimo bo mes. Segun e workshop aki ta andando lo mira tambe e diferente posibilidadnan di presentacion cu ta wordo brinda awendia. Con bo por jega na expresa y presenta bo mes den un exposicion cu e diferente materialnan segun bo mes un obranan. Na e ocacion aki lo tin dos diferente workshop. Anochi den mes un oraionan pa teenersnan y hende grandi di 14 aña pariba. Atardi di 3'or pa 5'or P.M.pa hobennan di 8 pa 13 aña. Lo parti si e ultimo grupo den dos; Dialuna y Diaranson di 8 pa 10 aña y Diamars y Diaheubs pa 10 pa 13 aña. E workshopnan menciona lo cuminsa pa hende grandi y teeners ariba 1 di September 2008 y pa muchanan ariba 2 di September. E dianan ta Dialuna te cu Diaheubs. Anochi di 6.30 P.M. pa 9.30 P.M. Atardi di 3'or P.M. te cu 5'or P.M. Adres ta Dominicanessenstr. 34 na Oranjestad. Pa mas informacion y inscripcion yama Sr. Elvis López na 565 46 13 o Sr. Angelo Tromp na 564 30 56.
|
|||||||
