| Taekwondo Federacion Nacional hopi activo |
|
|
|
| Tuesday, 12 August 2008 - 00:00 | |
 Desde November di aña pasa Aruba conoce un federacion di Taekwondo nobo. Ta trata aki di Federacion Nacional di Taekwondo. Esaki ta un federacion di scolnan di Taekwondo cu tin como meta principal pa promove e deporte y pa hisa e calidad di su atletanan y entrenadornan engeneral. Tambe e intencion ta pa e federacion aki por organisa eventonan deportivo local, dunando nos atletanan mas oportunidad pa practica nan deporte. Te cu awor, e federacion ta conta cu no menos di 5 scol di Taekwondo, parti den diferente districto di nos isla. Click read more pa mas detayes y imagen.
“Nos ta uni disciplina, conocemento y experiencia cu otro”, asina Master Marilu de Veer, Presidente di e federacion a duna di conoce. “Nos ta hopi contento di por conta cu un cantidad di expertonan den nos team , tur cu un solo meta…..pa hiba nos Taekwondo na e siguiente nivel”. E ta referi entre otro na e miembronan activo den e directiva di e federacion, manera ta Alberto Klabber como Vice Presidente, Rudy Wong como Tesorero, Francisco de Mei como Secretario y como Comisarionan ta trahando Shareene Daal, Teo Rodriguez y Jario Oduber.
Mester menciona cu lantamento di un federacion nobo ta pa por organisa e scolnan mihor y promove e deporte di Taekwondo mas ainda. Esaki ta sosode banda di e asosacion nacional, cu claro ta keda como e asosacion oficial di nos pais. Hecho ta cu tur e miembronan di e federacion aki ta miembro di e asosacion nacional. Pero e trabounan di e federacion nobo aki ta den un fase bastante avansa caba. Ya caba a organisa tres eventonan na nivel local den forma di fundraising, a duna asistencia y dirigi e parti technico na algun evento local y hasta internacional. Hasta a biaha na tres ocasion caba cu atletanan local pa eventonan internacional. Na tur e ocasionnan a logra regresa nos isla cu medayanan rond di nan garganta. Pa loke ta e directiva di e Federacion Nacional di Taekwondo, mester menciona cu nan ta conta cu e sosten di algun persona bon conoci y cu un trayectoria hopi exsitoso den e deporte di Taekwondo. Master Marilu de Veer por ehempel ta un instructor reconoci di Taekwondo, cu faha preto 4 dan di World Taekwondo Federation (WTF). Tambe e ta refree internacional di combate di WTF, refree internacional di Poomsae (formas) di WTF. Marilu de Veer tabata instructor pa otro scolnan, pero desde 3 aña pasa a funda su mesun scol, “Oranjestad Taekwondo Center”. Den e ultimo aña el a wordo honra pa Federacion Mundial (WTF) cu un invitacion pa participa na Korea de un “camp training” pa selecciona refereenan pa e Olimpiada di Beijin 2008. E tabata e unico di region di Caribe na e “camp training” aki. Tambe el a wordo invita pa WTF y a participa como referee na e “7th World Junior Taekwondo Championships” na Mei 2008 na Turkia. El a wordo reconci como “Best Referee” na e “First World Open Taekwodo Championship” na Mexico na November 2007. Pan American Taekwondo Union a apunt’e pa ta referee na e Caribbean Championships na Trinidad and Tobago na Mei 2008, unda el a wordo entrena pa traha cu e sistema electronico nobo y e “Electronic chest protector”. Alberto Klabber tambe ta un instructor reconoci, na tres ocasion tabata campeon di Taekwondo di Hulanda y medaya di brons den e campeonato di Europa. Klabber a conta cu Henk Meijer como su entrenador, conoci pa ta un di e mihor entrenadornan na mundo. Alberto Klabber ta conoci pa ta e pionero den organisa campeonatonan di Taekwondo na Aruba. Entre e alumnonan di Alberto Klabber ta destaca Aishel van der Linden medaya di brons den Panamericano y tambe Stuart Smith cu a gana medaya di plata na e weganan Odesur. Otro atleta cu a destaca di Alberto Klabber ta e conocido Willy Willems, cu a logra medaya di plata na e weganan di ODESUR. Mester menciona cu Alberto Klabber ta fundador di su mesun scol di Taekwondo “Brazil Taekwondo Dojam”. Rudy Wong no mester di mucho introduccion, e ta e pionero di habrimento di scolnan di Taekwondo na diferente barionan desde aña 1982. Pa varios aña el a yega di bay cas cu diferente titulo na Hulanda y a obtene e titulo di campeon Europeo representando Hulanda na aña 1981. El a fungi pa mas cu dies aña como e entrenador/Coach di e ekipo nacional di Taekwondo di Aruba. Rudy Wong riba su mes ta un Instructor di “Alto Rendimiento Deportivo“ certifica pa e Comite Olimpico di Aruba (COA). E ta un miembro di Comision Técnico di COA y ta fungi como “head-referee” di Kick-Boxing y Last Man Standing. Comosifuera poco, Wong ta un masahista bon conoci entre nos deportistanan y ta instructor di deporte pa IDEFRE, y como tal tin un amplio experiencia den e ramo di deporte. Mas ainda por bisa cu Teo Rodriguez tambe ta un instructor bon conoci, a yega di fungi como instructor di nos ekipo nacional di Taekwondo y tabata fundador di Teo Taekwondo Center cu awor a bira Tiger Teakwondo Academy. Durante e ultimo 9 añanan Teo a organisa e campeonato internacional di mas grandi na Aruba, e asina “Tierra del Sol Open”. Su logro mas grandi ta su atletanan cu a sa di destaca internacionalmente, manera por ehempel Marcial Oehler cu a gana medaya di plata durante e ultimo campeonato hubenil Panamericano di Taekwondo, Mario Maduro campeon di Caribe y Juny Jansen brons den e “Juegos Escolares Panamericanos”. Teo Rodriguez ta entrenador di hopi di e atletanan di Taekwondo cu ta destacando awendia. Shareen Daal tambe ta un instructor conoci di Taekwondo y ta maneha su propio scol di Taekwondo, conoci como “Aruba Taekwondo Academy”. Shareen Daal tabata ganador di medaya di Brons pa Aruba durante e weganan Centro Americano y del Caribe na aña 1998. Como atleta el a yega di cualifica pa bay PanAm Games na aña 1999 y hasta pa eliminatorio di Olimpiada. E tabata un di entrenador di selacion juvenil pa un ana. Shareene Daal ta un “sport-leraar” certifica pa Compite Olimpico Arubano y como labor diario e ta duna les pa IDEFRE na scol y den oranan di atardi ta entrena e atletanan di Taekwondo. E federacion nacional di Taekwondo a introduci desde December ultimo un “Central Taining” tur diasabra na Julianaschool, dirigi pa e conocido Alberto Klabber. Aki atletanan di tur scol afilia na e federacion nacional ta topa cu otro y asina gana mas experiencia. Durante e lunanan di November, December y Januari ultimo a ofrece cursonan di “Poomsae” y cu desde fin di Augustus lo re-introduci e entrenamientonan aki atrobe, debi na demanda popular. E entrenamientonan aki lo ta den man di Master Marilu de Veer. E federacion nacional di Taekwondo ta masha satisfecho cu e apoyo grandi cu nan ta ricibiendo di e scolnan di Taekwondo, di e atletanan, nan mayornan y e pueblo di Aruba engeneral. Tabata masha impresionante pa mira con enthusiasma e atletanan mes tabata pa bende rifa y participa den tur e eventonan di fundraising pa asina logra acumula fondo pa por a participa durante campeonatonan internacional. “Nos tin hopi plannan grandi cu dentro di poco nos lo divulga. E intencion ta pa organisa mas eventonan local, yenando e agenda di e atletanan mas cu ta posibel cu eventonan sano di deporte”, asina Master Marilu de Veer a termina bisando. E ta laga un invitacion atras na un y tur cu ta desea di practica un deporte cu hopi disciplina y movecion pa join un di e scolnan di Taekwondo den bo vecindario.  |
