| In memoriam di sra. Viuda Felepina |
|
|
|
| Saturday, 16 August 2008 - 00:00 | |||||||||||||||||||||||||||||
 Dia 14 di augustus 2008 pa 8:20 di anochi a bay laga nos un mama cu a lanta 13 yiu, esta 4 yiu muher y 9 yiu homber. Aserca Mama Felepa tabata tin tambe un gran cantidad di nieto y nietanan. Dia 1 di mei 1941 Mama Felepa a casa cu Urbano Oduber, tata di un familia grandi na Santa Cruz, e bario di Siribana cu semper el a a stima y aprecia. E familia di tata, mama y 13 yiu a biba den gran harmonia y solidarismo na Siribana, Santa Cruz. Un union familiar grandi y yiunan cria cu gran respet y aprecio pa otro. E lema den e familia aki ta ‘un pa tur y tur pa un’. Click read more pa mas detayes y imagen.
Dia 10 di januari 1964 un tragedia grandi a pasa den e familia Oduber, ora cu awe den feliz memoria Urbano Oduber a haña accidente na trabao y despues di a lucha pa su bida a fayece dia 14 di januari 1964. E morto tragico aki a causa hopi dolor den e familia, unda un mama a keda su so cu 13 yiu di cual esun di mas chiquito tabata un baby di apenas un aña y 3 luna bieu, nos ruman stima Mary. Mama Felepa cu su fe grandi den Dios y boluntad grandi pa accepta e reto di mantene su 13 yiunan a inicia un episodio nobo den su bida cu no tabata facil. Banda di e responsabilidad pa cria su 13 yiunan, Mama Felepa a entrega su mes na sirbi su religion catolico cu masha hopi debocion y amor. Mama Felepa tabata den parochieraad di misa di Santa Cruz, Legion di Maria, haciendo actividadnan pa nos grandinan, pasa tur diadomingo hunto cu e otro colaboradornan di pastoor pa pasa duna comunion na e enfermonan y esnan di mas edad na nan cas. Den esaki Mama Felepa tabata haña yudansa di Zuster Cecilia, tambe den feliz memoria y su amiga di semper sra. Chichia Werleman. No por lubida sr. Buchi Werleman y sra. Eloisa Koolman. Logicamente un gran cantidad di otro personanan di Santa Cruz cu semper a para cla pa yuda pastoor y coopera cu Mama Felepa, manera e.o. sra. Maria Curiel. Mama Felepa a dedica gran parti di su bida apesar cu e mes a pasa den duro cu e poco cu e tabata tin di yuda masha hopi hende mes na Santa Cruz. Su adagio di bida tabata: ‘Locual mi man drechi haci, mi man robez no tin nodo di sa’. Nos su yiunan si sa cu Mama Felepa a haci masha hopi mes pa semper yuda esnan den necesidad. Mama Felepa tabata un autoridad respeta pa su yiunan y a lanta nan cu gran disciplina y respet. Mama Felepa semper a encurasha tur su yiunan pa studia, pasobra e tabata bisa cu ‘mi no por duna boso nada materialmente, pero educacion si ta e mihor cos cu mi por duna boso’. Segun Mama Felepa, estudio ta e trapi di bida pa por progresa y den e mundo aki nan por kita tur cos for di bo, menos e diplomanan cu abo mes a logra den bo trayectoria estudiantil. Esey tabata su palabranan. Pesey awe Santa Cruz completo y henter Aruba mester reconoce cu Mama Felepa ta un persona special, un gran yiu di Dios cu cualidadnan grandi, unda sin medionan financiero e por bisa den e mundo cu el a laga tras, e tin 13 yiu cu cada un na nan manera a contribui grandemente na locual nos isla ta awe den varios aspecto. Pa Mama Felepa e regalo di mas grandi cu el a haña den su bida tabata dia 13 di mei 1990, na momento cu Papa Pablo II a bishita Curaçao y cu su persona por a ricibi Santa Comunion for di e Papa conhuntamente cu su nieto Nelson Jr. Ariba varios tereno su yiunan a sa di representa nos isla dignamente. Semper Mama Felepa a stimula su yiunan pa ta personanan recto y ehemplar. Mama Felepa a ser reconoci pa su hendenan di parokia di Santa Cruz como mama di aña, a haña reconocimento di Legion di Maria cu masha hopi aña el a fungi den directiva, en general mama di henter un pais. Poco mama na mundo por conta bo con un mama por cria 13 yiu y hopi dificil 13 yiu por haci mescos pa un mama. Mama Felepa semper a comparti tur locual e por tabata tin materialmente cu no solamente su 13 yiunan, pero cu hopi otro hende. Si tin di come pa su yiunan, tin pa otro tambe. Hasta ora Mama Felepa a gana Lotto hopi aña pasa, el a parti e placa cu tur su 13 yiunan y e resto completo cu personanan den mas necesidad cu ne. Nos lo no corda kico tin hende a haci cu Mama Felepa djies pasobra el a gana Lotto, anto su yiu ta den politica! Mama Felepa su yiunan a stimele semper pa tur locual el a nifica pa nan den bida, un mama special cu un fe grandi den Dios y un boluntad grandi pa yuda un y tur. Semper el a biba rezando su rosario y boekinan di misa. Cu Mama Felepa tin tambe 33 aña ta sufri di hopi critica, insinuacionnan, djies pasobra su yiu a scoge pa ta politico, esta un sirbidor di pueblo. Mama Felepa, nos Dios Tata Todopoderoso lo recompensabo pa tur locual bo a soporta den e mundo aki. Mama Felepa, nos ta yama bo danki pa duna bo 13 yiunan un bon educacion y un bon preparacion pa accepta e retonan di bida. Mama Felepa, danki pa tabata cu nos durante bo bida. Danki tambe na tur cu a stimabo y a coopera cu bo durante bo 88 añanan na e mundo aki. Cu Nos Creador tuma Mama Felepa den su Reino Celestial, unda angelnan den cielo lo busca bo y hiba bo serca nos Tata Wardador. Mama Felepa, bo a uza e inteligencia cu Dios Tata Todopoderoso a duna bo pa sirbi bo yiunan, familia, amigonan y tur esnan cu bo a stima. Mama Felepa, apesar cu bo yiu a sirbi e pais aki pa mas cu 22 aña den varios gobierno, hamas bo a haña nunca ningun condecoracion pa tur locual bo a haci pa e comunidad Arubano, nos ta sigui cu e manera simpel cu bo a biba y cu nos Tata Todopoderoso lo sabi di duna bo tur honor cu bo a merece. Mama Felepa, nos ta bisa ayo y te despues y cu un dia nos tur lo por mira otro atrobe. Bo a bay 1 siman despues cu bo ruman mayor Finchi Croes a bay bo dilanti y 44 aña y mey cu bo casa Urbano a fayece tragicamente. Nos ta gradici Dios di por tabata tin bo como nos mama, ruman, tanta, suegra, abuela, bisabuela, prima etc. Un biaha mas, danki pa tur cos y nos sigur lo haña bo falta.
M.A.L.
said:
|
|||||||||||||||||||||||||||||
 |
Cu Felepa sosega den brasa di nos creador. Un persona hopi aprecia cu hopi amor pa su prohimonan. Mi tabata tin e honor di a conoc'e di cerca y e tabata mi guia den scaresmatico. Cu Todo Poderoso duna consuelo na su yuinan y demas keridonan. |
Eldrich
said:
|
Bunita storia di bida di un persona cu casi nunca ba scucha di dje den medio nan di comunicacion. Loke cu si mi tin cu remarca ta e hecho cu nan nunca a condecora su persona. Pero esei no ta nada.....Loke e la hasi ta bal mas cu un condecoracion. |
Arubadag
said:
|
Por manda condolencia online pa famia Oduber-Croes, bai website www.arubadag.com y lo bo haya link pa condoleer online. |
WALTER CROES
said:
|
dios tata tume den su reino,y condolencia y forza na su familla nan y na aruba su promer ministro |
JR
said:
|
Condolencia na su famia y pas na su restonan. Cu e sosega na pas. |
Rayza Irausquin
said:
|
Hopi forza na Min.Oduber y demas fam.Oduber. Nos niun no kier perde nos sernan keri. Fam. Franca- Irausquin. |
sidney marcano
said:
|
FOR DI PROFUNDO DIMI CURASON MI TA MANDA MI MAS SINCERO PALABRA DI CONDOLENCIA NA FAMIA Y MUI ESPECIAL, NA NOS PROME MINISTER,SR, NELSON O ODUBER. CU TATA TOPO PODEROSO DUNE Y HENTER SU FAMIA FORSA DEN ES MOMENTONAN DIFISIL.(MAMA TA UN SO TIN ,ETA DURU ORA BO PERDE.) |
