| Sr. Eman satifecho cu atencion pa cu debe |
|
|
|
| Monday, 18 August 2008 - 13:00 | |||||||||
 Lider di partido AVP mr.Mike Eman, den nomber di su fraccion den Parlamento di Aruba, recientemente a manda un carta pa Minister di Enseñansa Hulandes Ronald Plasterk, pidiendo su atencion pa e debenan cresciente di studiantenan Arubiano na Hulanda. E peticion aki di Eman a haya hopi atencion di tanto e politiconan na Den Haag como di prensa Hulandes. Durante e deliberacion general di Reino (POK) den consulta cu Plasterk Eman a haci tambe cu e asunto aki a bira un tema di e reunion. Click read more pa mas detayes y imagen.
Ta relaciona cu esaki cu durante
e reunion general cu ‘vaste kamercommissie” di e comision di
Enseñansa,cu preguntanan a wordo haci na e Minister Plasterk dor di
parlamentarionan Hulandes. A base di esaki a sigui un consulta cu Informatie Beheer Groep (IBG) dor di Minister Plasterk pa duna contesta riba e problematica di e debenan di estudio cu e studiantenan ( y ex studiantenan) Antiyano y Arubiano ta haya nan mes confronta cu ne. Dia 15 di Augustus Minister Plasterk den un carta ta contesta e comision di Tweede Kamer riba nan preguntanan a base di e informacion cu a haya hopi atencion.
“Debedornan Antiyano y Arubiano cu a studia na Hulanda y cu a haya un fiansa Hulandes, ta regresa (despues di nan estudio) den mayoria caso bek nan pais. E debe cu nan ta hiba cu nan mester wordo paga bek na euro. Antiyas y Aruba a duna di conoce cu esaki ta causa problema pa e debedornan aki. Di e lider di oposicon di partido AVP, sr.Eman, mi a haya un carta relaciona cu e asunto aki. Den su carta Eman ta señala cu e debe aki haci na Hulanda ta pisa relativamente duro riba e capacidad di pago di e debedornan. Esaki pasobra cu e entradanan na Antiyas y Aruba por lo general ta mas abou cu esnan di Hulanda y tambe pasobra cu e florín Antiyano y Arubano ta mara na e dollar cu actualmente ta masha bou mes. Ta pa e motibo aki cu diferente di e studiantenan aki ta haya nan mes den problema. Na Antiyas y Aruba tin 5840 di e deberdornan aki bibando. Nan tin un debe di estudio basa riba e Ley studiefinanciering 2000 (WSF2000). E debe aki ta di un promedio di mas o menos 15.5000 euro pa persona. Di 2000 di e debedornan cu no a cumpli cu un of dos termino di pago, e cobransa a pasa over conforme e procedura legal vigente pa un deurwaarder. Na 2007 den mas o menos 75 caso esaki a conduci na un beslaglegging definitivo (executoriaal beslag). Studiante y ex studiantenan cu ta kere cu nan no por paga nan debe di estudio, basa riba e WSF2000 por aplica pa un asina yama “draagkrachtmeting’, un sondeo di nan capacidad financiero. Esaki ta encera cu anualmente un sondeo ta wordo haci pa averigua si un persona tin bastante capacidad financiero pa por paga e fiansa bek. Si esaki no ta e caso, e suma cu mensualmente mester wordo paga ta wordo baha of hasta poni na cero. E sondeo di capacidad financiero ta ofrece bastante alivio pa yuda debedornan cu nan problema di fiansa, Minister Plasterk ta informa Parlamento. Minister Plasterk den su carta ta mustra cu debedornan te cu awor masha poco biaha a haci uso di e areglo aki. Solamente 7% di nan so a pidi un sondeo asina. Esaki por bin dor di cu nan no ta na altura di e areglo aki. Actualmente na Antiyas y Aruba por sera conoci cu e sondeo aki pa medio di foyetonan di informacion general di IBG. Ta pues conviniente pa e grupo di debedornan aki dor di un of otro forma sera conoci cu e areglo aki, entre otro por haci esaki dor di manda e informacion aki por escrito na esnan concerni.” Minister Plasterk den su carta ta sigui bisa cu IBG a informe cu dentro di poco tur nan deberdornan lo haya un carta den cua nan ta wordo atendi riba e existencia di e areglo ya menciona. Ta di spera cu dor di esaki e grupo di deberdonan cu finalmente lo haya su mes confronta cu deurwaarder, lo bira hopi mas chikito. “Esaki mi ta haya suficiente pa yuda debedornan cu problema”, Plasterk ta bisa. “Aplica otro sistema di sondeo di necesidad financiero, manera propone pa sr.De Vries, no ta parce mi necesario. E sistema actual ta ofrece bastante posibilidadnan”, Plasterk ta continua bisando. Lider di fraccion di partido AVP, Eman, kende ta e persona cu a pidi atencion pa e problematica aki, ta kere cu si studiantenan ta mas conoci cu e areglo di pago basa riba “draagkracht” di IBG cu nan lo haci mas y miho uso di dje tambe y cu esaki sigur lo trece alivio. Según Eman, e diferencianan di e curso di e euro si lo keda un punto di preocupacion. Eman ta ker explora tambe e posibilidad pa den cuadra di un cambio den nos systenma di impuesto (un reforma fiscal) por eventualmente crea tambe un extra “break” ora di paga bek e debe di estudio. Esaki dor di permiti un spacio mas amplio pa reduccion for di impuesto. 
Otro banda di mundo.
said:
|
|||||||||
 |
Ha, anto na Hulanda e gobierno mes no por yuda nan propio studiantenan. Mike, por fabor, awendia tin internet y comunicacion ta bay hopi mas liher cu antes. Boso no kere Plasterkerk, pasobra na Hulanda mes nan no por yuda e studiantenan Hulandes, awor nan kier bin yuda esnan di Aruba. Loke Mike ta bisando no ta berdad. Saludos, Un studiante di Aruba, cu ta cabando su estudio. |
ex studiante
said:
|
Loke nan mester hasi ta zorg pa loke e studiante nan tin cu paga back ta basa riba e gemiddelde koers di e anja cu nan a fia. Asina bo ta paga loke bo a pensa cu bo tin cu bai paga back. Ajera nos a fia 1 euro cu tabata 2 florin pa paga back, pero awe bo tin cu paga 3 florin back y esaki ta hasi d**o. E no ta loke hende a planea. Un regeling special mester bin pa rubiano y antiyano sin cu nan tin mester di drenta den bo bida personal controlando tur bo asuntonan financiero. Si despues di esaki e ex studiante no por paga ainda, anto e ora ey por aplica e regla di Draagkracht meting. Prome mester limita e schommeling di e koers. Esey ta e problema na prome lugar, despues ta bin e problema nan personal cu cada persona tin pa caba di paga e debe. |
esey ta tur?
said:
|
E unico cos cu Mike Eman a hasi na Hulanda ta bisa Hulanda: "Ang, ok" |
