| COA preparando acuerdo di cooperacion |
|
|
|
| Wednesday, 20 August 2008 - 00:00 | |||||||
 Durante e ultimo añanan Comité Olimpico Arubano ta creando mas y mas oportunidad pa atletanan di nos país entrena den exterior, como preparación pa competencianan internacional grandi. Tambe e dos atletanan Olimpico, Jan Roodzant y Fiderd Vis, a pasa un periodo di casi un aña den exterior, prome di a competi durante e Weganan Olimpico na Beijing. Jan Roodzant a beneficia di un beca Olimpico y a entrena na Gainesville, Florida, mientras cu Fiderd Vis a pasa un periodo di entrenamento intensivo na Hulanda y na Sao Paolo, Brasil. Click read more pa mas detayes y imagen.
COA ta masha satisfecho cu e posibilidadnan cu asina a ofrece na varios atleta durante e ultimo añanan, y ta den proceso di preparación pa por amplia e posibilidadnan pa nos atletanan ainda mas. Ta un hecho cu na Aruba e posibilidadnan pa nos atletanan ta limita, loke ta hasi necesario pa hasi uso di oportunidadnan di entrenamento y preparación den exterior.
Hasiendo bon uso di e presencia di tur e paisnan di e región na e Weganan Olimpico na Beijing y después di un análisis profundo di e posibilidadnan specifico cu cada un di e paisnan por ofrece e deporte Arubano, miembronan di e delegación Arubano a reuni na Beijing cu representantenan di e Comitenan Olimpico di varios país, pa asina prepara un colaboración mas estrecho, di cua nos atletanan y entrenadornan lo beneficia directamente. Director di Alto Rendimento di COA, Lic. Edmundo Josiah y Presidente di Comision Tecnico, Chu Halabi, a reuni cu representantenan técnico di Puerto Rico, USA, Brasil, Colombia, Venezuela, Mexico y Republica Dominicana, pa asina defini cu cada un di nan e aspectonan principal di un acuerdo di cooperación pa e próximo ciclo Olimpico. E deseo pa estrecha e lazonan di cooperación cu cada un di e paisnan menciona a wordo expresa na dirigentenan y prepara pa Nicole Hoevertsz, miembro di Comité Olimpico Internacional na Aruba, cu a pone e contactonan inicial cu cada Comité Olimpico y a logra crea e interés di nan parti tambe. Intencion ta pa próximamente formalisa e deseo di cooperación cu a wordo prepara na Beijing den forma di un acuerdo, cu lo sirbi como base pa e cooperación durante e próximo ciclo Olimpico 2009-2012. E ciclo nobo aki ta ensera compromisonan importante pa nos país, caminda Aruba lo kier mehora e nivel di nos atletanan y logra mehora cada biaha mas e resultadonan deportivo. E reunionnan na Beijing a sirbi tambe pa e representantenan técnico di COA wordo informa tocante e desaroyonan mas reciente den exterior y con e información aki por sirbi Aruba tambe. A splica ehempelnan concreto y a ofrece ayudo pa entrena tecniconan y personal medico di nos país tambe. Intención ta pa no solamente riba tereno técnico, pero tambe riba tereno medico, dirigencia y tambe e area di marketing, COA siña for di e experiencia di otro paisnan, logrando asina un mehoracion di e deporte en general di nos país. Riba e portretnan por mira Director di Alto Rendimento di COA, Lic. Edmundo Josiah y Presidente di Comisicion Tecnico, Chu Halabi, den reunión cu Humberto Cintron, Director de Alto Rendimento di Comité Olimpico di Puerto Rico y cu Marcus Vinicius, Director Tecnico di Comité Olimpico di Brasil. Den e próximo dianan lo comparti mas información tocante e encuentronan importante aki, cu nos representantenan ta hibando na Beijing.
|
|||||||
