| Celebracion di dia di prensa cu Aruba Bank |
|
|
|
| Monday, 01 September 2008 - 00:02 | |||||||||||||||||||
 Ta pa hopi aña caba cu Aruba Bank tin e celebracion di “Dia di Prensa” riba su agenda anual di eventonan. Mientras cu aña pasa a tene un lectura cu dos periodista bon conoci for di Mexico, e aña aki a opta pa un evento mas social. A invita periodistanan local pa topa na Garufa Coctail Lounge pa asina hunto celebra nan dia, den forma di un “Mega Press Event”. Click read more pa mas detayes y e imagenan di e tremendo celebracion aki. Un danki grandi na Aruba Bank!
Durante e evento, Edwin Tromp como e CEO di Aruba Bank a hiba palabra na e miembronan di prensa presente, representando e diferente medionan di comunicacion local. E ehecutivo a cuminsa na gradici prensa local pa nan atendencia, pero tambe pa nan colaboracion pa cu Aruba Bank durante henter aña. Di acuerdo cu Edwin Tromp, ora cu el a bay busca riba internet pa e celebracion aki, el a tuma nota cu rond mundo nan ta usa e fecha di “Dia di Prensa” pa por para keto na algun aspecto menos agradabel den e ramo di trabou aki. Aspectonan manera persecucion, impunidad, asesinato y hasta censura contra periodistanan den cuadro di ehecucion di nan labornan diario. “Danki Dios cu mi por bisa cu aki na Aruba nos no conoce e tipo di menasanan asina contra nos periodistanan. Ta importante si, pa nos mantene esaki...un prensa liber cu tur clase di acceso na informacion. E lucha pa sigura libertad di prensa mester ta prioridad di nos tur, pasobra un prensa independiente y liber ta central den cuadro di un bon gobernacion den democracianan hoben y bieuw. Libertad di prensa por sigura transparencia, responsabilidad y cu leynan ta wordo aplica: E ta promove participacion di publico y di politica den discusionnan nacional. Ta bon pa tur hende compronde bon, cu un prensa independiente ta ricibi su poder for di e pueblo cu e ta sirbi y a cambio e ta apodera e mesun pueblo bek como un aliado den e proceso democratico di e pais”, asina e director di Aruba Bank a bisa e representantenan di prensa local presente na e gran celebracion aki. Aruba Bank a felicita tur periodista riba nan gran dia y sperando cu comunidad por sigui conta cu un prensa liber, obhetivo y veraz.
|
|||||||||||||||||||
