 Durante
e progama radial di partido AVP diadomingo ultimo, tabata tin un esfera
un poco diferente. E atencion tabata ariba problema di cancer di pecho
na Aruba. Manera ta conosi cu mas o menos 1 ariba 8 hende muher na Aruba
lo haya cancer na pecho. E ta un di e malesanan cu mas hende muher ta
fayece di dje y pa esnan cu jega na sobrevivi e malesa e por tin concecuencianan
hopi grandi pa resto di nan bida. Por haci mas pa subi e cantidad di
sobrevivientenan, pero esaki ta rekeri concientisacion. E programa a inicia
cu e peticion di tur esnan presente pa pueblo en general sostene y participa
den e caminata contra Cancer di pecho cu ta un iniciativa hopi noble
y grandi di Mary Joan Foundation cu ta hasi esfuerzonan grandi pa por
mehora e situacion di pacientnan di e malesa aki na Aruba. Click read more.
Esnan presente tras
di microfon den e programa di radio, tabata Clarisca Velasquez, Lainda
Westerhof y Desiree Croes. Invitadonan e dia aki tabata ta dr. Gregory
Laclé cu ta voorzitter di medische staff na HOH y sra. Yolanda Croes
cu ta un hende muher cu ta un sobreviviente di cancer di pecho. Segun
dr. Laclé, na Aruba por trata e malesa aki te na cierto grado, pero
pa casonan mas urgente y specifico, e pacient mester bay Corsow of Colombia
(cu tin un facilidad di radio terapia mas specialisa). Segun dr. Laclé
tin varios avanse den mundo medico cu por juda den deteccion di e malesa
aki mas tempran. Aki por pensa ariba e machine di mamografia y tambe
esun di MRI nobo cu por detecta cancer den pecho hopi mas tempran. Segun
dr. Lacle deteccion mas tempran ta e yabi na un malesa mihor controla
y cu por resulta den un cura. Pa deteccion tempran hende muher mester
haci examinacion regular personal y tambe di nan dokter, haci un mamo-grafia
regularmente y den casonan mas extremo uso di MRI. Segun dr. Laclé
tin planan pa Hospital trece un Oncoloog, cu ta un specialista di cancer
pa traha na Hospital.
Invitada Yolanda Croes,
a cuminsa pa gradici partido AVP pa e atencion cu nan a pone ariba e
topico aki, mirando cu e mes ta un sobreviviente di cancer na pecho.
Tambe e kier a gradici e lider di partido, Mike Eman, cu tipo di programanan
asina tambe por toca un tema asina importante na Aruba y specialmente
pa hende muhernan. Segun sra. Croes, e la wordo detecta cu cancer 5
aña pasa y a haya un sosten incondicional di su famia y tambe di partido
AVP cu kendenan e tin lazonan fuerte di amistad. Segun Yolanda Croes,
e ta un sobreviviente awe pasobra cu e ta uno cu tabata tin e suerte
di por a detecta e cancer den un statium hopi tempran. Esaki e la logra
pasobra e tabata tin hopi diciplina pa mantene su mes na su schedule
di mamo-grafia di tur aña. Finalmente, despues di a wordo detecta,
sra. Croes mester a bay Corsow pa bestraling companja pa su ruman. Segun
sra. Croes ta sigui splica cu e mester ta pendiente cu e malesa por
bin bek y pesey e mester sigui haci cierto testnan.
Un otro persona presente
tabata Sra. Doina Eman, cu ta esposa di Sr. Mike Eman. Ruman di Doina
tambe ta un sobreviviente di Cancer na pecho y a pasa hunto cu su ruman
temponan masha dificil mes.
Segun Lainda Westerhof
y Desiree Croes, di parti di partido AVP ta aplaudi e sosten di comercio
y pueblo en general pa cu e iniciativa aki di Mary Joan Foundation cu
ta un iniciativa serio y cu ta spera cu por jega na concretisa tur nan
planan pa mehora e situacion pa hendenan muher sufriendo di e malesa
cruel aki na Aruba.
Na final, Lainda Westerhof,
Desiree Croes y Clarisca Velasquez a gradici un presente pa sosten y
un peticion a bay na tur radio oyente y esnan presente pa participa
y sostene e initictivanan di entre otro Mary Joan Foundation y tur otro
grupo y individualnan cu ta traha mehora e bida di tur esnan cu ta sufri
di e malesa di cancer di pecho.
| Comments () >> |
 |
 |
