 E exposicion “Spirito di Tempo” en
coneccion cu e di 50 aniversario di Cas di Cultura cu a tuma lugar entre
17 y 25 di oktober a wordo bon bishita. Especialmente pa skolnan durante
oranan di mainta. 1200 mucha a disfruta di e pinturanan realistico di
Pandellis, Vervoord, Quigley-Oduber y Donati y a keda fasina pa e pintura
surrealistico di Toton Quandt. Nan a keda igualmente asombra di e departamento
moderno, post-moderno y contemporaneo cu e obranan di Henriquez, Lopez,
Martines, Matthew, De L’isle, Muyale, De Windt, De Veer, Oduber y
Abath. Click read more pa mas detayes.
Specialmente
e set-up estilo di sala cu yerba artificial y cuadronan di Osaira Muyale
tabata interesante pa e muchanan analysa. E cuadronan di flornan cu
fragmentonan di potret di choler den nan a inspira nan. “Porta e choler
no tin un cas”, “porta e choler ta bon hende”, “naturalesa ta
e cas di e choler”, tabata djies algun di e expresionnan di e muchanan
tocante e obra aki. Pues via arte nan ta bira mas conciente di locual
ta pasa den nan medio ambiente. Locual tambe a causa furor ta e obra
“Palo di Homber” di Ryan Oduber cu ta un “totempaal” moderno
traha di monitor chiquito, poni riba otro, cu imagennan cu ta keda core
riba nan. Imagenan cu ta wordo asocia cu nos mundo di awendia cu ta
yen di guera y cosnan malo inventa pa hende mes. E obra ta sugeri pa
nos duna otro un man y siña bisa otro “despensa” (sorry). Esaki
por cierto ta un obra cu a wordo admira tambe den e exposicion “Nos
Herencia”. E muchanan tambe a mira un pelicula titula “Kunst koop
je niet in de supermarkt” di e serie pa mucha “Klokhuis” di Hulanda,
cu ta splica e trabou di un galeria y dicon artista ta escohe hopi biaha
pa bende nan arte di valor via un galeria. Pa culmina nan paseo tur
e clasnan a haña un canvas pa nan tambe pinta of crea un obra di arte
hunto. Esakinan lo wordo exponi desde 15 di november, durante e obra
teatral “Mind Your Gap”.
Un
parti cu Cas di Cultura ta hopi orguyoso di dje ta cu durante e siman
di expo, restaurador di pintura sr. Hendrik Schouten a restaura dos
pintura di Pandellis y uno di Julie Quigley-Oduber. Esaki Cas di Cultura
a haci como muestra di gratitud pa por a presta e pinturanan pa e exposicion
aki. Ta sumamente importante pa obranan valioso asina wordo manteni
den bon condicion y de bes en cuando wordo controla y haci limpi pa
asina conserva e patrimonio artistico/cultural di Aruba.
Mind Your Gap - Tene cuenta cu e espacio
E obra cu cual Cas di Cultura ta celebra
su jubileo ta jama “Mind Your Gap” cu ta un homenage na tradicionnan
y custumbernan cultural di Aruba, protagonisa pa 25 artista Arubiano.
E nomber “Mind Your Gap” no ta uno comun. E ta un frase combina
di e expresionnan “mind your step” cu “mind the gap” cu ta expresionnan
cu bo ta scucha den aeropuertonan y lugarnan cu ta transporta masanan
di hende internacionalmente. E show tin e tema di viahamento aden, viaha
den tempo cu bo custumbernan, arte y maleta cultural. Bo mester dicidi
bo destino pa bo jega un caminda y no keda den un espacio bashi (gap).
Principalmente e ultimo parti aki ta importante, jega na otro, jega
na arte y cultura. Jega! “Mind your gap”, tene cuenta cu e espacio
entre abo y arte y cultura. Con leu bo ta para di dje? Purba jega serca
dje pa haci e espacio mas chikito.
Artistanan
hoben den estrecho colaboracion cu artistanan di renombre y añanan
di experiencia a crea e show aki. Den varios aspecto e tabata un experimento
interesante, pasobra creando arte cu hopi hende, tur cu diferente vision
y background no ta facil. Tur hende mester a traha pa jega na otro y
compronde otro su lenguahe. Esnan cu ta participa pa teatro ta: Joan
Danies, Carmen Herrera, Amy Lasten, Hubert “Juby” Naar, Yvonne Spellen.
Pa baile: Diana Antonette, Sonja Geevers, Astrid Hagers, Alydia Wever.
Pa musica: Hildward Croes, Alphonso “Buchi” Boekhoudt, Tica Giel,
Michael Lampe, Vicente Ras. Pa arte visual: Glenda Heyliger, Mo Mohamed,
Nigel Matthew, Ryan Oduber, Osaira Muyale. Pa representa e disiplina
invita literatura ta Desiree Correa, Quito Nicolaas, Gwendy Sneek, Gerry
Franca. Invita tambe y hungando un rol den e disiplinanan cu nan ta
conoci p’e ta Dolfi Kock, Belen Kock-Marchena, John Freddy Montoya
y Erwin Croes entre otro.
E
temanan ta netamente Arubiano manera tambu, Dera Gai, Carnaval, turismo
y hasta nos pasado televisa, pero semper cu un “twist” diferente,
moderno y inespera. Bishitando “Mind Your Gap” bo por spera un experiencia
simplemente diferente, hopi agradabel y special pa e ocasion special
aki, e jubileo di oro di Cas di Cultura. Instancianan cu ta haci e obra
aki posibel Het Nederlands Fonds voor Podiumkunsten, Unoca, Ahata, Vertegenwoordiging
van Nederland op Aruba, Office Systems, Fatum, KLM, Economy Car Rental,
SvE TV, Aruba Trading cu Freixenet y Tropical Bottling Company cu Tropical
y Coca Cola. Ticket ta obtenibel na rason di Afls. 35,- pa dia 16 y
17 di november na Cas di Cultura.
| Comments () >> |
 |
 |
E exposicion “Spirito di Tempo” en
coneccion cu e di 50 aniversario di Cas di Cultura cu a tuma lugar entre
17 y 25 di oktober a wordo bon bishita. Especialmente pa skolnan durante
oranan di mainta. 1200 mucha a disfruta di e pinturanan realistico di
Pandellis, Vervoord, Quigley-Oduber y Donati y a keda fasina pa e pintura
surrealistico di Toton Quandt. Nan a keda igualmente asombra di e departamento
moderno, post-moderno y contemporaneo cu e obranan di Henriquez, Lopez,
Martines, Matthew, De L’isle, Muyale, De Windt, De Veer, Oduber y
Abath. Click read more pa mas detayes.
