E obra cu cual Cas di Cultura ta celebra su jubileo ta jama "Mind Your Gap" cu ta un homenage na tradicionnan y custumbernan cultural di Aruba, protagonisa pa 25 artista Arubiano. E nomber "Mind Your Gap" no ta uno comun. E ta un frase combina di e expresionnan "mind your step" cu "mind the gap" cu ta expresionnan cu bo ta scucha den aeropuertonan y lugarnan cu ta transporta masanan di hende internacionalmente. E show tin e tema di viahamento aden, viaha den tempo cu bo custumbernan, arte y maleta cultural. Bo mester dicidi bo destino pa bo jega un caminda y no keda den un espacio bashi (gap). Principalmente e ultimo parti aki ta importante, yega na otro, yega na arte y cultura. Yega! "Mind your gap", tene cuenta cu e espacio entre abo y arte y cultura. Con leu bo ta para di dje? Purba Yega serca dje pa haci e espacio mas chikito.

            Artistanan hoben den estrecho colaboracion cu artistanan di renombre y añanan di experiencia a crea e show aki. Den varios aspecto e tabata un experimento interesante, pasobra creando arte cu hopi hende, tur cu diferente vision y background no ta facil. Tur hende mester a traha pa yega na otro y compronde otro su lenguahe. Esnan cu ta participa pa teatro ta: Joan Danies, Carmen Herrera, Amy Lasten, Hubert "Juby" Naar, Yvonne Spellen. Pa baile: Diana Antonette, Sonja Geevers, Astrid Hagers, Alydia Wever. Pa musica: Hildward Croes, Alphonso "Buchi" Boekhoudt, Tica Giel, Michael Lampe, Vicente Ras. Pa arte visual: Glenda Heyliger, Mo Mohamed, Nigel Matthew, Ryan Oduber, Osaira Muyale. Pa representa e disiplina invita literatura ta Desiree Correa, Quito Nicolaas, Gwendy Sneek, Gerry Franca. Invita tambe y hungando un rol den e disiplinanan cu nan ta conoci p'e ta Dolfi Kock, Belen Kock-Marchena, John Freddy Montoya y Erwin Croes entre otro.

E temanan ta netamente Arubiano manera tambu, Dera Gai, Carnaval, turismo y hasta nos pasado televisa, pero semper cu un "twist" diferente, moderno y inespera. Bishitando "Mind Your Gap" bo por spera un experiencia simplemente diferente, hopi agradabel y special pa e ocasion special aki, e jubileo di oro di Cas di Cultura. Instancianan cu ta haci e obra aki posibel Het Nederlands Fonds voor Podiumkunsten, Unoca, Ahata, Vertegenwoordiging van Nederland op Aruba, Office Systems, Fatum, KLM, Economy Car Rental, SvE TV, Aruba Trading cu Freixenet y Tropical Bottling Company cu Tropical y Coca Cola. Ticket ta obtenibel na rason di Afls. 35,- pa dia 16 y 17 di november na Cas di Cultura, Botica St. Anna, Botica St. Cruz y Valero Essoville San Nicolaas.

Comments (4) >>

Show/Hide comments

twins hernandez said:

Pabien cu e bunita celebracion. Nos ta orgulloso di Quito Nicolaas, nos a lanzele como Kahlil Gibran di Aruba. Merca tin Obama y Rotterdam Quito-Mania. Quito a gana alma di hopi fans y su presentacion a laga Casa di Cosmetica Nubian Queen vibra. Aruba tin artistanan renombra, falta un poeta cu no ta ariba e lista Lindoro Abraham, tur diadomingo e ta declama pa tur mama Arubiano. Lindoro ta Pablo Neruda di nos Isla natal. Miles di exito y saludos desde Rotterdam.

November 07, 2008

xxxx said:

pabien y tambe mi ta spera cu nan por corda ariba esnan cu a duna les hopi anja pasa...... pasobra e temponan aya tawata masha dushi mes ora di bai tuma les di cualkier instrument...... pabien....

November 07, 2008

M. Mathieux said:

Nos ta manda tur felisitashon pa nos gran poeta y escritornan di Aruba esta Quito Nicolaas y Lindoro Abraham..e ultimo aki ta manda tur diadomingo tur mama na mundo un poesia bou di e titulo Imaginarium. Tur amante tambe editor cu kier recibi su poesia Gratis tur siman por manda su nomber E-mail pa Lindoro Abraham [ This e-mail address is being protected from spam bots, you need JavaScript enabled to view it ]. Tur Arubiano mester ta orguyoso di nos escritor y poetanan. Y e premio Nobel? YES WE CAN!

November 09, 2008

spectacular said:

Pabien Cas di Cultura cu 50 anja. Mihor conoci como e cuna di arte na Aruba. Por cierto un bunita obra. Den futuro mester programa y usa e pause pa declama! Mi ta contento cu Minister Ramon Lee, no a spera nada di e directiva di Cas di Cultura pero e mes a gana su premio cu e concurso "ripiti y gana". Hopi a haci falta cu a traha cu alma y curazon pa Cas di Cultura? Por a mensiona nomber di ex presidente Harms, Oslin Boekhoudt, sra Wilma Kuiperi-Jansen. Finalmente hopi Danki na Scol di Musica, Unoca cu a paga pa hopi anja huur na cas di Cultura y gobierno cu a subsidia Cas di Cultura!

November 24, 2008

Write comment

Show/Hide comment form

Name

Email

Comment

Add Comment