| Inscripcion pa Sparkling Tour 2007 ta start |
|
|
|
| Friday, 01 June 2007 - 00:00 | |
|
Telearuba den su funcion como planta nacional kier pa Aruba completo forma parti di Sparkling Tour 2007. Telearuba lo desea pa tur bario, tur scol secundario, tur club hubenil busca un representante pa nan tambe forma parti di e dianan di audition unda cu e participante lo mester presenta un cantica dilanti di e cuerpo di hurado. E aña aki atrobe Sparkling Tour lo bira un espectaculo musical di canto y tambe tocamento den forma di band. E no ta importa ki tipo di cantica e participante kier participa cu ne na e audition, e por ta un cantica di R&B, rock, merengue, salsa, bachata, etc. Loke cu ta importante ta pa bo presenta un cantica cu abo ta sigur di dje y cu bo sa cu bo lo por duna e mihor presentacion di bo mes pa causa un impacto riba e miembronan di hurado y posiblemente clasifica den e grupo di 25 finalistanan cu lo avansa pa e prome ronda di competencia. Pa pasa inscribi bo mester ta entre e edad di 14 pa 21 aña, mester ta residencia na Aruba y mester presenta un medio di identificacion valido (Cedula di Aruba, Paspoort valido, Rijbewijs di Aruba, Antillas Hulandes y Hulanda). Tur esnan bou di e edad di 18 aña mester ta acompaña pa un mayor pa duna autorisacion na e participacion di esun cu a bin inscribi pa forma parti di e audition. Mayornan tambe mester trece un identificacion valido. E dianan di audition lo ta 16 y 17 di juni 2007, pues tur participante cu inscribi lo tin mas o menos 2 siman pa por practica y perfecciona nan presentacion prome cu nan haci esaki dilanti di e huradonan. |
