21 di mei ta un fecha historico pa Papiamento na Aruba. Dia 21 di mei 2003 Papiamento a bira Lenga Oficial di Aruba hunto cu Hulandes. Riba e fecha historico aki, 6 aña despues,  lo lansa ‘Fundacion Lanta Papiamento’. ‘Fundacion Lanta Papiamento’ ta boga pa cambio den acercamento, posicion y maneho di Papiamento den nos comunidad. Diabierna dia 22 di mei lo tin un anochi special. Click lesa mas pa mas informacion.

Drs. Joyce Pereira, Selvia Lumenier, Swinda Schwengle, Etley Lasten, Pedro Velásquez y Ramon Todd Dandaré Mag. Ling. a dicidi di lanta e Fundacion aki pa duna Papiamento e luga cu e merece den nos sociedad, tanto como lenga nacional como como lenga oficial. Banda di e seis personanan aki tin un grupo grandi di persona cu ta stima Papiamento cu ta duna sosten na e iniciativa aki y ta apoy’e incondicionalmente. 

Como introduccion Fundacion Lanta Papiamento ta organisa diabierna dia 22 di mei proximo un anochi cu tin como tema: Papiamento ... su balor y posicion den e sociedad Arubiano, cu charla tocante Papiamento, poesia na Papiamento y musica na Papiamento. 

E anochi aki lo tuma luga na Centro di Bario Playa Pabao di 8.00 or te 10.00 or y e fundadornan kier organisa un anochi bunita, di satisfaccion y fructifero pa tur presente y ta mira e anochi aki como di inspiracion pa y di promocion di nos idioma Papiamento. 

Joyce Pereira lo elabora tocante e lucha constante di Papiamento pa su luga den enseñansa, Pedro Velásquez lo papia tocante Oficialisacion di Papiamento y su resultadonan y Ramon Todd Dandaré lo trata Terminologia na Papiamento. Olga Buckley, Munye Winklaar y Philomena Wong lo declama poesia na Papiamento y Gregory Goedgedrag, Herman Hennep, Tino Ruiz y Etty Toppenberg lo deleita e publico cu musica Arubiano. 

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario