E grupo a bishita Suriname pa algun dia, bulando cu Surinam Airways dia 15 di Mei.

Ora cu e grupo a yega cu e avion PAWA, nan a ricibi un bunita bon bini di parti di imigracion, despues di cual nan a topa cu nan tour guide ‘Nootje’.

E grupo a check in na Hotel Torarica y Royal Torarica, despues di cual tabata tin un encuentro cu bebida y snacks.

Anochi nan a haya un tour di bida nocturno di Surniname, incluyendo un bishita na ‘The Fat’. Unda cu esaki ta un otro trip cu Aruba tin locual ta hacie hopi nice. Tin website manera www.partypixsuriname.com . unda cu bo por waak e ambiente riba e site aki.E siguiente dianan a desayuna na Torarica, despues di cual nan a check in na Residence Inn.

Managing Director di Suriname METS Travel & Tours A. Bhagwandas a duna un discurso chikito na e delegacion di Aruba, despues di cual nan a bishita un Eco Resort, nan a haya un tour atravez di diferente parti di Paramaribo City unda cu a conoce e Markt den e Stad y despues pa caminda pa Krasnapolsky tabata tin un parada chikito cu baile y brass band.

Despues di un tremendo lunch na Krasnapolsky Hotel nan a haya un presentacion di video di Berg & Dal Resort.

E grupo di Aruba a bishita tambe Spanhoek Hotel, Best Western hotel y Maretraite Shopping Mall na Paramaribo, cu ta e ‘mall’ mas grandi di e ciudad.Despues e Travel Agents mas anochi a disfruta di un dushi cena na Marriott Courtyard Hotel, y tambe a haci un inspectie na e Marriott Nobo despues di cual un biaha mas nan a disfruta di e bida nocturno di Suriname, unda cu varios banda local a toca.

E siguiente dia a cuminza cu un desayuno, despues di cual a grupo a topa cu representantenan di SLM, despues a cera conoci cu Prensa di Suriname pa despues bishita e mercado di Diadomingo (‘Zondag Markt’).

E grupo di Maduro Travel  y e demas agentenan di viahe tambe a logra bishita un hardin bunita cu tabata tin diferente tipo di Orquidia, despues di cual nan a conoce e ‘Butterfly Farm na Lelydorp.

E grupo a almorza na Indo Suriname.

Nan a bay tambe cerca ‘Maroon workshop Handicraft’ na Warung Lelydorp.

Den e negoshi aki diferente artefacto bunita ta wordo traha usando diferente sorto di palo.

Na Billiton e grupo a haya un demostracion den e negoshi Amer-Indian Pottery, den trahamento di obranan di klei.

E grupo a bishita tambe parke di recreo ‘Cola Kreek’, unda cu nan a haya tambe un splicacion di un experto di Medicinal Flora, riba e diferente tipo di remedi di tera cu tin.

Eynan mes e grupo a haya un presentacion di video di METS Tours.

Despues e grupo di Aruba mester a duna comentario riba e tour cu nan a haya y tur hende a expresa cu nan a pasa hopi bon.

E hendenan di Aruba  a disfruta di e bunita edificionan cu tin y e aspectonan cultural di pueblo di Surniname.

Loke nan mester a custumbra cune ta e hecho cu na Suriname e autonan ta core na otro banda di caminda.

Loke e grupo a gusta masha tambe ta e hecho cu nan a drumi den cabañanan na Cola Kreek, pasobra nan a sinti nan mes hopi cerca di naturaleza, hayando dushi holo di palo y di e Bos.

E siguiente dia nan a desayuna na Cola Kreek, despues di cual nan a bay den ‘paddle boat’ y nan a bishita un ‘slide’ cu tin.

Tabata tin hende cu a puntra dicon e awa ta wordo yama ‘Cola Kreek’, pero ora cu nan a yega na e sitio caba nan a compronde cu e nomber a sali for di e hecho cu e awa ta bastante preto manera Coca Cola of Pepsi Cola.

Apesar cu e awa ta preto, e Arubianonan cu ta custumbra cu nan awa blauw, a haya cu tabata dushi pa landa den dje.

Prome cu e delegacion a bay J.A Pengel Int. Airport, nan a pasa cumpra diferente cos crioyo, despues di cual nan a bula bek pa Aruba.