Tanki Leendert- Comision Promove Cultura 88.9  por mira atras riba un exitoso festival di San Juan 2009 cu a keda respalda pa e Pueblo cu a yena Centro di Bario Tanki leendert cancan.  Y sigur cu e respaldo ricibi di RBTT Bank of Aruba, Setar N.V. y Fundacion Lotto pa Deporte cu ta sigui kere y aporte  na un parti importante di nos cultura manera nos San Juan.

Bou canto di nos hymno nacional canta pa e commission organisador y miembronan di Radio Bo Guia 88.9 acompanja musicalmente pa Grupo di Betico, nos dushi bandera a wordo hisa dunando asina oficialmente inisio na e Festival San Juan 2009 dedica na mama di nos cultura Bernadina Growell. Un scenario masha bunita mes decora cu varios articulonan di cas di mama di Cultura incluso un maniquin cu tabata bisti cu e trahe Tipico di nos mama di Cultura Bernadina Growell. Bandi di e scenario publico por a disfruta henter anochi di un documenatario “riba big screen” di nos mama di cultura .  Palabra di pabien pa decoracion di e stage cu tabata den man di Edsel Pietersz y Randolf Geerman y e documentario den man di Trevorr Rosel.Mester remarka cu huradonan e anochi tabata Sra. Maybeline Arends-Croes; Sra Arlenne Wever – Croes; Sra. Linda Flores- Figaroa ; Sr. Don Ramon Krozenijk y Sr. Roy Sneek, bou liderasgo di e presidente di hurado Sr. Leo Werleman cu  no tabata tin un trabao fasil e anochi. Comision organisador a enfatisa cu e Festival lo ta uno di calidad y no di cantidad y pesey a accepta solamente 7 agrupacion pa participa cu un total di 21 cantante den e 4 diferente categoria. Cada agrupacion e anochi a presente un cancion di Mama di Cultura dunando e anochi un toke beradero di homenahe na Bernadina Growell.Ta di aplaudi e union den cooperacion cu a ser duna e anochi aki dor di miembronan di prensa na Radio Bo Guia. Primeramente Ramond Hoek y Dino Croes di Tele Aruba,  prensa skirbi y otro radionan cu a yuda promove e actividad. Rado Bo Guia ta gradici di curazon primeramente Sr. Roberto Geerman kende sin su cooperacion e Festival no por a keda transmiti e anochi, tambe Trevorr cu tabata e technico. Sra.Micky Gravenhorst  cu a fungi como stagecoordinator pa e programa por a cana smooth y na ora, y tambe na Sr. Juby Naar cu a duna nos un tremendo man den presentacion di un biografia ken ta Mama di Cultura Bernadina Growell.Grupo di Betico tabata e prome agrupacion cu a hasi su presentacion e anochi sigui pa Tico y sus Estrellas. Despues tabata Rincon Boys, sigui pa Tipico Macuarima. Tradicion Musical a continua y despues Tipico Pegasaya pa final di anochi nos a haya presentacion di Sodo E Cuero agrupacion cu Mama di Cultura a cana hopi tempo cune.Na Final di anochi cada persona cu a traha a wordo sorprendi cu un bunita mug cu nan potret riba dje traha pa Krimidesign di Sr. Renny Alvares cu tabata e persona cu a percura pa e plakaatnan e anochi cu tabata un joy di recuerdo. Cada ganador a keda sorprendi cu nan foto riba plakaat mencionando ki comptencia nan a gana.E resultado ta como lo siguiente: E hoben Brandley Rincones a gana tanto San Juan como Propio composicion cu su cancion “Picudito”  den su catoria di 4 – 7 anja. Den 8-13 anja San Juan e hoben Riegard Ras di Tico y sus estrellas a bira ganador absoluto sigui pa Brandon Rincones di Tipico Macuarima. Mientras cu den propio composicion Brandon ta e ganador absolute cu “ Unda Juan ta” cu Tip. Macuarima sigui pa “Hubentud Positivo di Reynaldo Dirkszen di Tipico Macuarima.Den Categoria di 14 – 17 anja nos a conoce un Reyna di San Juan den persona di Hillyann Croes di Tip. Macuarima sigui pa Christoffer Ras di Tico y sus Estrellas. Den Propio composicion Hillyann a gana tambe cu “ Hubentud nos por” y su finalist ta Miosotis Tromp “ Bo tin mi loco” ambos acompanja pa Tipico Macuarima.Bou di e adultonan Wiwi Maduro di Sodo E Cuero tabata e ganador maximo, sigui pa Alejandro Dirksen di Macuarima, y 2 ndo lugar Tommy Croes di Grupo di Betico. Den propio Composicion Jairo Evertsz cu “ Crioyo mi ta” di Rincon Boys ta ganador absolute, e lugar Tommy Croes “ Ba buske wante” di Grupo di Betico y 2ndo lugar Lucia Thiel cu Ban serio cune cu Sodo E Cuero.Comision Promove Cultura 88.9 ta gradici famia di Sra. Bernadina Growell cu a permiti nan duna e homenahe akin a Mama di Cultura, na Sra Irena y Minister di Cultura Ramon Lee cu a hasi entrega di e premionan, na cada agrupacion, tur miembro di prensa, public en general pero muy en especial Setar, RBTT Bank Y Lotto cu a hasi Festival San Juan 2009 posibel.Alavez ta recorda e agrupacionnan riba e reunion cu lo tuma lugar diahuebs awor pa 8 ‘or na C.B. Tanki Leendert unda cu nan lo ricibi otro premionan y plakaatnan y e grabacion di e anochi. Pronto lo tin un cd riba Mercado y ta spera cooperacion di radio emisoranan y locutornan pa promove “Loke ta di Nos” , nos musica crioyo y San Juan.

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario