Atletanan di Enseñansa Basico a disfruta di bon encuentro di softball durante  e recien Olimpiada Escolar Betico Croes 2009. E weganan final a bay entre Cacique Macuarima School, St. Paulus School, Colegio St. Teresita y St. Anna School. Tur wega a tuma lugar riba veld di Noord Cura Cabai.

Wega pa tercer lugar

E wega a bay entre Cacique Macuarima School  y St. Paulus School . Den e prome inning Cacique Macuarima School ta score su prome careda. Den e di dos inning ambos scol ta duna un bon inning na tur fanatico presente. Cacique Macuarima School ta score 3 careda mas, mientras cu St. Paulus School ta score dos careda y ta haci e wega 4 pa 2 na fabor di Cacique Macuarima School. En total a hunga 5 inning completo. Y den e ultimo dos inning di wega St. Paulus School ta reacciona pa bin gana e wega di Cacique Macuarima School cu e score di 7 pa 5.  St. Paulus School ta finalisa e competencia di softball di Olimpiada Escolar Betico Croes na di tres lugar. Tur hungador y nan coach ta  ricibi nan medaya di brons y nan trofeo pa e di tres lugar.

Wega pa Campeon

Pa e wega final a topa otro Colegio St. Teresita di San Nicolaas y St. Anna School di Noord. E hobennan di Colegio St. Teresita a domina practicamente henter e wega. Nan a score 4 careda den e di dos inning, 4 careda mas den e di tres inning y uno den e di cinco. Despues di 5 inning hunga, e wega tabata 5 pa 0 na fabor di Colegio St. Teresita. Den e ultimo inning Colegio St. Teresita ta score un careda mas y ta haci e wega 10 pa 0. Den bom di inning number 6, e hobennan di St. Anna School a purba reacciona pero ta score solamente 3 careda. Finalmente e wega ta caba cu e score di 10 pa 3 y asina Colegio St. Teresita ta bira campeon den softball di Olimpiada Escolar Betico Croes 2009. Alumnonan di St. Anna School ta ricibi nan medaya di plata y nan trofeo di sub-campeon. Feliz pa logra e titulo di campeon, e hobennan di Colegio St. Teresita a tuma nan medaya di oro y nan trofeo di campeon den softball pa nan scol. Como hungador mas valioso a keda Jevin Mentor di Colegio St. Teresita cu tambe a ricibi su plakaat di ‘MVP’.  

IDEFRE ta mira atras un torneo di softball durante Olimpiada Escolar Betico Croes 2009 cu bon participacion di e scolnan basico cu a mustra interes pa asisti y hunga tur wega. Un gradicimento ta bay na tur fanatico pa nan asistencia y apoyo durante tur wega. Pabien na tur scol ganador cu nan titulo.

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario