|
Pa loke ta actividadnan en general
di Bon nochi, drumi dushi, tin cu bisa cu e periodo aki tawata hopi
activo. Bon nochi, drumi dushi a habri aña cu grabacion di e di dos
serie di contamento di storia na televicion. Mientrastanto muchanan
ta disfrutando di e programanan tanto na ATV como na Tele-Aruba. Bon
nochi, drumi dushi ta haya hopi comentario cu e programa ta cubri un
necesidad grandi riba nos isla.
Grupo di trabou di Bon nochi, drumi
dushi a bishita diferente centro di bario pa presenta e proyecto. Mayornan
presente na e encuentronan aki tawata hopi motiva y a haci bon uzo di
e oportunidad pa informa nan mes tocante e proyecto y tambe e forma
con pa organisa e lesamento pa nan yiu. Grupo di trabou di Bon nochi, drumi
dushi a bishita diferente actividad social cultural publico pa parti
foyeto di inscripcion, combersa cu mayor y ofrece e oportunidad pa inscribi
e mucha mesora. Esaki a resulta un experiencia unico, hopi mayor
a inscribi nan yiu y di parti di e proyecto por a experiencia cu comunidad
di Aruba ta bon na altura di e proyecto y ta apoya esaki. Bon nochi, drumi dushi tawata invitado
di e programa Cerca Dika y a comparti cu sra. Fingal y televidentenan
informacion valioso tocante e proyecto. Nos a keda pendiente pa un continuacion
di e programa, ya cu tin hopi informacion pa comparti. Mientras preparacionnan tawata tumando
luga pa e bishitanan na cas, e comision dinamico consistiendo di; Suzette
Bareño, Lisanne Gomez y Shahaira Kelly a prepara e tremendo exposicion
; Nos chikitinnan pintor. Esaki tawata un exposicion di e pinturanan
cu e muchanan a traha di e storia, Cuero di burico, durante e anochi
di clausura di 2008. Inauguracion di e exposicion a tuma
luga na un manera masha special, riba e anochi aki a habri tres bentana
riba lesamento cu enfoke riba e pinturanan di e storia, presentacion
di e buki, Bencho ta gana un bais, door di Shanaya Howell na Cadee Kelly
y e primicia mes; presentacion di e prome DVD di contamento di storia
di Bon nochi drumi dushi.Sala di activdiad di Biblioteca Nacional
tawata rand rand di hende cu na final di e anochi kier a sigui disfruta
di e DVD y no kier a bay cas.E DVD ta un hoya cu no mag di falta
den ningun cas. E ta obtenibel na UNOCA y pronto na tur libreria. Diasabra 8 di mei e lesadonan a participa
na un tayer pa por sali haci nan bishitanan bon prepara. Pa e periodo
aki Bon nochi drumi dushi por a conta atrobe cu un grupo grandi di lesado
hopi motiva y entusiasma.Ta bon pa menciona cu varios di e lesadonan
nobo mes a acerca e proyecto pa participa, pasobra manera nan mes ta
bisa; e proyecto ta unico, bunita y hopi necesario. Mas o menos 150 famia a inscribi pa
e prome periodo. E biaha aki e inscripcion tawata tin un toke special.
Hopi famia a inscribi pa bishita di lesado den grupo na un adres. Esaki
a haci cu por a combina bishitanan ora di traha lista. Mayoria di lesado
a topa cu e agradabel sorpresa, cu e grupo di mucha presente tawata
mas grandi cu esunnan riba e lista cu nan a haya.Kiermen nan a comparti e placer di
lesamento cu mas mucha, locual sigur ta faborabel pa e meta di e proyecto;
promocion di lesamento. Dia 12 di juni Bon nochi, drumi dushi
a tene un encuentro cu e lesadonan pa evalua e bishitanan. Durante e
evaluacion e lesadonan a comparti nan experiencianan cu otro. E pregunta
central tawata si e lesado ta sinti cu el a logra pasa e mensahe di
e proyecto pa e mayor.Nos ta contento di por bisa cu pa gran
parti esaki ta e caso. Poco poco mayornan ta compronde cu ta importante
pa nan comparti e placer di lesamento cu e mucha. Cu lesamento ta yuda
e mucha desaroya su vocabulario, habri su horizonte, kishiki su
fantasia, maneha su emocionnan y ta crea un moment di intimidad entre
mayor y yiu. Y cu mayor tin un tarea central den esaki. Experiencia di tur lesado tawata cu
nan a wordo bon ricibi y cu mayor a prepara pa e bishita. Un lesado
a experiencia algo masha bunita mes cerca un famia, unda e mayornan
no ta papia ni compronde Papiamento. E yiu homber den klas cinco a traha
diferente poster pa indica na e lesado cu e ta bon bini, na unda e mester
sinta y loke a prepara p’e come y bebe.TinProme cu e lesamento mes e lesadonan
a haci un bishita di orientacion pa cera conoci cu e famia y e muchanan
y pa prepara pa e bishita. Den varios caso e famianan ta haya 2 bishita
poco, pero nos ta splica cu nos a bin trece e herment pa nan sigui traha. Grupo di trabou di Bon nochi, drumi
dushi kier informa cu inscripcion pa bishita di lesamento na october
ta habri caba. Foyeto ta obtenibel na Biblioteca Nacional Oranjestad
y San Nicolas, por deposita e parti di yena den e cahanan. Tambe na
Boekhandel van Dorp, Plaza Bookstore y Boekhandel Mariska. Bon nochi, drumi dushi ta gradici e
lesadonan, e comision di exposicion, contadonan di storia di e programa
di television, sra. Belksi Flores y Biblioteca Nacional Aruba pa nan
motivacion y entusiasmo.Un palabra di danki ta bay specialmente
pa Rubia Bernabela, Swinda Arendsz, Shirley van der Biezem, Kimberly
Giel, Juliet Swaen y Jasmin Lacle pa nan trabou y sosten incansabel
cu ta haci cu e proyecto ta funciona y crece.Bon nochi, drumi dushi ta gradici Cede-Aruba
y UNOCA pa financiamento di e proyecto.
|
Subscribe to this comment's feed
Mustra/Kita comentarionan
Mustra/Kita e formulario di comentario
