Cada disciplina di deporte a premia e atleta cu mas a sobresali y el’a ricibi un plakkaat di reconocimento como ‘MVP’. Na final di Olimpiada Escolar a bira conoci e schoolnan cu a termina cu mayor puntuacion y a gana e premio ‘Over-all’ den school preparatorio, school basico y school avanza.

Atletismo

Den e deporte di atletismo pa School Preparatorio a sobresali e hoben deportista Isabella Benschop di Scol Preparatorio Nos Paraiso. Den Enseñanza Basico mucha homber e hoben Dion Baarh di Commandeur Pieter Boer School a keda scohi y e mucha muher di Colegio Pastoor Kranwinkel Siljee Feliciana, ambos a ricibi nan reconocimento como MVP. Den Enseñanza Avanza e hoben Dyron Irausquin di EPB San Nicolas y e hoben Ginella Albertus di Maria College a sobresali den e deporte di atletismo y ta ricibi nan plakkaat di MVP.

Landamento

Den e competencia di landamento a premia e mihor landadonan cu no ta miembro di un club. E mucha muher cu a ricibi e reconocimento aki a resulta Tatiana Mansur di Mon Plaisir School, mientras cu e mucha homber cu a keda reconoci ta Patrick Sydow tambe di Mon Plaisir School. Pa esnan cu ta miembro di un club a keda reconoci Ginayla Arends di Colegio Cristo Rey y den mucha homber a resulta Daniel Jacobs. Pa scolnan di Enseñansa Avansa e reconocimento a bay pa e hobennan Daniela van den Berg y Jordy Groters, ambos alumno di Colegio Arubano Oranjestad.

Kickbal

Den e deporte di Kickbal a participa e schoolnan preparatorio. Campeon a bira Scol Preparatorio Nos Paraiso y e MVP a keda su alumno Denzel Hart.

Futbol Scol Preparatorio

Schoolnan Preparatorio a participa na futbol cu nan ekipo y tambe ‘cheer-leaders’. E school cu a titula campeon ta Scol Preparatorio Conrado Coronel y e MVP a resulta su alumno Joswil Giel.

Futbol Klas 1 y 2

Futbol ta hopi gusta entre nos hobennan y sigur un di e deportenan cu ta haya hopi acohida. Den e categoria di Futbol pa Klas 1 y 2 Colegio Sagrado Curazon di Savaneta a bay cu e titulo di campeon. E hungador mas valioso a resulta Glembert Croes cu a ricibi su plakkaat di MVP.

Futbol Categoria-A mucha homber

E hobennan di Colegio Pastoor Kranwinkel ta titula campeon y nan hungado, e keeper Jean Carl Henriquez ta bira e hungador mas valioso y ta ricibi su plakkaat di MVP.

Futbol Categoria-B mucha muher

E categoria aki ta pa e klasnan mas grandi di schoolnan basico. E mucha muhernan di Maria School a domina y ta bira campeon, mientras cu Alyssa Ras ta bira MVP y ta ricibi su plakkaat.

Futbol Categoria-B mucha homber

Olimpiada Escolar a habri y cera cu encuentro di futbol den e categoria aki. Weganan hopi interesante a tuma lugar durante Olimpiada 2009. E wega final a bay entre Colegio Felipe B. Tromp y Colegio Laura Wernet Paskel. Den un encuentro hopi emocionante di comienzo te final, e hobennan di Colegio Felipe B. Tromp ta domina y ta gana e wega pa titula campeon den e categoria-B mucha homber. E school ta ricibi e premio maximo como ganador cu ta Afl. 2.000,-. E hungado mas valioso a ricibi su plakkaat di MVP y a resulta di ta Makanaki Tromp di Colegio Felipe B. Tromp. E di dos lugar a keda pa Colegio Laura Wernet Paskel cu ta ricibi e premio di Afl. 500,-.

Handbal Categoria-B mix

Handbal a resulta den otro deporte hopi popular y gusta entre hobennan di school. E competencia tabata fuerte entre tur school cu a participa. Pero finalmente ta St. Paulus School ta bay cu e titulo di campeon. St. Paulus School ultimo añanan ta e campeon indiscutibel den handbal y ta prepara fuertemente pa e competencia anual di Olimpiada Escolar. E hungador cu mas a destaca den handbal tabata Monica Useche y e ta ricibi su plakkaat di MVP.

Softball

Otro deporte hopi practica ta softball y durante Olimpiada Escolar esaki a keda demostra cu e talentonan di tur hoben. A hunga e competencia di softball den categoria mix. E scol cu a titula campeon tabata Colegio St. Teresita y su hungado Jevin Mentor a keda scohi como hungado mas valioso y ta keda reconoci como MVP y ta ricibi su plakkaat.

Volleyball School Basico

E competencia di volleyball durante Olimpiada Escolar Betico Croes a haya hopi fanatico. Tribuna yen tanto den Compleho Deportivo Betico Croes na St. Cruz como Compleho Deportivo Frans Figaroa na Noord a duna apoyo na e atletanan escolar. Categoria-B tabata pa schoolnan basico y e school campeon den volleyball categoria-B mucha muher a resulta St. Paulus School y Julienne Dorothal e hungado mas valioso cu ta ricibi su plakkaat di MVP. Den mucha homber categoria-B a bira campeon Cacique Macuarima School, cu ultimo añanan ta bataya fuerte y logra e titulo. Hungado cu mas a destaca a bira Rafael Vasquez di Cacique Macuarima School cu ta haya su plakkaat di MVP.

Volleyball School Avansa

Entre e schoolnan di enseñanza avansa e competencia di volleyball tabata interesante. Hobennan ta hunga volleyball cu amor y fervor pa gana e wega. Den categoria-C mucha muher ta bira campeon Colegio Arubano San Nicolas y Sharla Noguera ta resulta e hungado mas valioso y ta haya su plakkaat di MVP. Den categoria-D mucha muher e hobennan di St. Augustinus College ta bay cu e titulo di campeon y Jovanka Dorothal ta bira e hungado cu mas a destaca y ta haya su plakkaat di MVP.

Basketball

Weganan di basketball a tuma lugar riba cancha di YMCA na San Nicolas. Hobennan di e diferente school cu a participa den e competencia a brinda bunita wega na fanaticonan cu a asisti na grandi pa duna apoyo. Campeon di basketball a bira EPB San Nicolas cu ultimo añanan ta sali fuerte durante Olimpiada Escolar. Hungado mas valioso den basketball a keda Jomar Richardson y e ta haya su plakkaat di MVP.

Futbol di Sala

Den enseñanza avansa e deporte di futbol di sala a desaroya positivo entre e hobennan y e ta un deporte hopi practica na school. E bataya final tabata entre e hobennan di EPB Hato y Colegio Arubano Oranjestad. Finalmente EPB Hato ta bay cu e titulo di campeon pa Olimpiada Escolar y e hungado cu a fungi como keeper di EPB Hato, Bernardo Maduro ta bira hungado mas valioso y ta haya su plakkaat di MVP.

Premiacion ‘Overall’ den Enseñanza Preparatorio

Comision organizador di Olimpiada Escolar Betico Croes 2009 a anuncia e scolnan ganador den cada seccion. Na di tres lugar a keda Scol Preparatorio Conrado Coronel, na di dos lugar a keda Imelda Kleuterschool y Scol Preparatorio ganador di prome lugar a bira Scol Preparatorio Nos Paraiso cu ta haya e bunita premio di Afl. 2,000.- mientras cu e otro dos school a ricibi Afl. 500,- cada un.  Cada school a ricibi nan respectivo trofeo.

Premiacion ‘Overall’ den Enseñanza Basico

Den enseñanza basico a keda na di tres lugar overall Mon Plaisir School, mientras cu e di dos lugar a bay pa Colegio Pastoor Kranwinkel. E schoolnan a ricibi nan premio di Afl. 500,- y tambe nan trofeo di tercer y segundo lugar. E school cu a keda na prome lugar den enseñanza basico ta St. Paulus School cu ta ricibi su premio di Afl. 2,000.- y su trofeo di school campeon.

Premiacion ‘Overall’ den Enseñanza Avanza

Pa schoolnan di enseñanza avanza a keda na di tres lugar EPB Hato, cu ta ricibi su premio di Afl. 500,- y su trofeo di tercer lugar. Na di dos lugar a keda empata Colegio San Antonio y St. Augustinus College, ambos school a ricibi nan premio di Afl. 500.- y e respectivo trofeo di segundo lugar. Como school campeon na prome lugar den enseñanza avanza a resulta Colegio Arubano Oranjestad cu ta ricibi su premio di Afl. 2,000.- y su trofeo di prome lugar.

Loke a defini e clasificacion final di e schoolnan ta e puntuacion cu cada school a logra acumula durante encuentronan deportivo cu a tuma lugar e dos siman di Olimpiada Escolar Betico Croes 2009. Schoolnan ta prepara durante aña escolar y ta competi na e campeonato escolar cu IDEFRE ta organiza. Esaki ta un preparacion caba pa e Olimpiada Escolar cu ta tuma lugar tur aña prome cu final di aña escolar.

Maestro mas activo

Durante Olimpiada Escolar Betico Croes 2009, e comision organizador tabata tin bista riba e maestro cu ta mas activo. Na final di Olimpiada Escolar a keda anuncia cu Juffrouw Perlishka Lockhart-Orman di Mon Plaisir School ta ricibi e reconocemento special aki y tambe su premio di Afl. 500.-.

Mihorr atleta School Preparatorio

Entre tur atleta cu a ricibi e premio di ‘MVP’den nan deporte , e comision organizador a scohe un atleta di cada enseñanza cu a ricibi e premio di mihor atleta. Den Enseñanza Preparatorio a keda anuncia como mihor atleta Isabella Benschop di Scol Preparatorio Nos Paraiso cu ta ricibi su trofeo y tambe su premio di Afl. 500.-.

Mihor atleta School Basico

Pa schoolnan basico a keda anuncia como mihorr atleta Julienne Dorothal di St. Paulus School cu ta ricibi su trofeo y su premio di Afl. 500.-.

Mihor atleta School Avanza

Entre schoolnan di enseñanza avanza a keda anuncia como mihor atleta Sharla Noguera di Colegio Arubano San Nicolas. E ta ricibi su trofeo y su premio di Afl. 500,-.

Voluntario mas activo

Entre tur voluntario cu a participa durante Olimpiada Escolar Betico Croes 2009 a scohe Ludwig Hart di Scol Preparatorio Nos Paraiso como voluntario mas activo. E tambe a ricibi su plakkaat di reconocemento.

Reportero mas activo

Entre medionan di comunicacion a ricibi su plakkaat di reportero mas activo durante Olimpiada Escolar Seever Krozendijk di Bondia Aruba y Sport TV Aruba.