Comite Olimpico Arubano a ricibi e siguiente noticia for di Comité Organizador di e prome edicion di e Weganan di Caribe, cu lo a tuma lugar di 13-19 juli 2009 na Trinidad & Tobago, y cu nos ta desea di comparti cu tur nos federacionnan miembro.

Gobierno di Trinidad & Tobago, riba recomendacion di Ministerio di Salud di e país y basa riba informacion ricibi di e World Health Organization/Pan American Health Organization, a dicidi di pospone e Weganan di Caribe 2009.Motibo ta e prevalencia di e “Influenza A, H1N1”. A considera cu durante e Weganan cantidadnan grandi di persona, procedente di varios país, lo ta aloja den e dormitorionan y lo comparti den varios sitio di competencia. Mientrastanto e cantidad di casonan di e virus ta sigui crece. Bou di e circumstancianan aki, a conclui cu lo ta prudente pa pospone e Weganan na e momento aki.Pa e organizadornan, cu tin mas cu seis aña trahando duro y preparando intensivamente pa e evento regional aki, e decision ta nifica un decepcion sumamente grandi. No tin un fecha nobo ainda pa celebración di e Weganan di Caribe, pues tur cos ta depende di e desaroyonan relaciona cu e virus, conoci como “swine flu”.COA a expresa su palabranan di convivencia na e autoridadnan deportivo na Trinidad & Tobago, como tambe na dirigentenan di e Caribbean Association of National Olympic Committees, entidad responsable pa e Weganan di Caribe.Na mes momento nos kier expresa nos palabranan di aprecio y admiración na e integrantenan di e delegacion Arubano cu lo a representa nos país na Trinidad & Tobago y cu tambe ta wordo confronta awor cu e decepcion grandi aki. Cuatro atleta di e deporte di tennis, bou guia di Chef de Mission Monique Bouwer, a prepara pa e encuentro regional aki y tabata sumamente motiva pa topa nan contrincantenan di Caribe.Aunque cu nos ta convenci cu nan tin comprensión pa e decision cu a wordo tuma pa no laga e competencianan continua, e no ta laga di ta un decision cu ta afecta nan directamente. Nos ta agradecido pa nan dedicacion y pa e motivación cu nan a demostra durante e preparación pa e competencianan na Trinidad & Tobago. Nos tin confianza cu nan lo sa di converti e decepcion aki den un paso di formación den nan carrera deportivo.

Comentarionan (0)

Subscribe to this comment's feed

Mustra/Kita comentarionan

Mustra/Kita e formulario di comentario