Monday, 01 September 2014
Clyde Harms: Un poco di Eagle Colony di antaño Print E-mail
Wednesday, 10 October 2012 15:45
DSC_2063
E trabou bunita cu DOW a haci riba Engelandstraat, un di e cayanan original di Eagle Colony, a evoka hopi bunita memoria. Tempo mi tabata mucha mi famia tabata biba na Lagoen, pero hopi biaha mi a bay bishita mi Tante Ika y Oom Jaap Pietersz cu tabata biba na skina di loke awe ta Belgiestraat y Ierlandstraat.

Mi ta corda e epoca ey como un tempo feliz. Cu e articulo chikito aki mi kier a comparti algo di mi memorianan.

Contrario di Lago Colony, Eagle tabata hopi integra den comunidad Arubiano. Na Eagle tabata biba hopi famia local cu yiunan cu mi a conoce na Julianaschool. Por cierto, APM tabatin un bus cu tabata trece e studiantenan scol mainta y hiba nan cas atardi. Varios biaha mi a bay Eagle cu e bus aki. Tambe, algun director di APM, manera Newton, Merryweather y Barbour, a casa cu Arubiano.

E entrada pa e tereno di Arend Petroleum Maatschappij (APM) tabata na crusada di Arendstraat (awor Caya Eleuterio ‘Boes’ Orman) y Balanderstraat, pero e casnan di Eagle Colony tabata paden di e area fronterisa pa loke awe ta Belgiestraat, Ierlandstraat, Engelandstraat y Frankrijkstraat. Cu excepcion di Engelandstraat, na banda pafo di cada un di e cayanan tabatin un garage pa autonan di e famianan cu ta biba cerca. Na Engelandstraat no tabatin garage pasobra aki e top ehecutivonan tabata biba y nan tabatin garage den nan mes cura. Banda di e garagenan comunitario tabatin un casita cu baño pa e servicionan di cas y caminda nan por a laba paña den tobo grandi di concret

Un di e cosnan cu mi ta corda cu placer tabata e bista y holo di yerba berde cu tabata cubri mayoria di e curanan di cas. E tempo ey ta solamente den Lago Colony tabatin yerba tambe. Na Eagle awa pa muha e yerba no tabata un problema pasobra tur cas tabatin un tanki grandi pa aw’i yobe y APM tabatin un cadena di pomp di awa cu tabata extende te banda di Bubali. E pompnan tabata traha cu mulina di biento y tabata provee e casnan cu awa dushi di pos. Cortamento di yerba tampoco tabata problema, pasobra hopi campesino tabata ofrece corta yerba pa hiba pa nan cria di carne of cabrito.

Eagle Club tabata solamente pa su miembronan y nan huespednan. E tabata conta cu dos bon cancha di tennis cu e miembresia tabata usa regularmente. Nochinan di fin di siman tabata mustra pelicula riba e canchanan di tennis. Paden tabatin un sala grandi caminda regularmente tabatin fiesta bailabel y un podium caminda e orkesta tabata toca. Tabatin un bar grandi caminda Dewars White Label y Amstel tabata manda. Patras tabatin un comedor y cushina cu tabata sirbi cuminda na e solteronan cu tabata biba den Bachelors’ Quarters cu tabatin entrada principal riba Schotlandstraat. Den un cuarto especial, tabatin un mesa di ‘snookers’ cu ta parecido na un mesa di biar pero hopi mas grandi. Pa nos cu tabata mucha, e mesa di snookers tabata parce un tereno di futbol cubri cu yerba. Dilanti di Eagle Club tabatin un piscina na unda nos tabata bay landa. E piscina tabata un lugar hopi bishita pa e residentenan di Eagle Colony. Durante Guera Mundial II gerencia di Eagle a laga traha un ‘air raid shelter’ pa cada ocho cas den e colony. De bes en cuando tabatin simulacro pa haci sigur cu tur residente sa kico nan mester haci den caso di un atake. Gracias na Dios esaki nunca a bira necesario. Despues di guera APM a elimina tur e cosnan comunitario manera e garagenan, piscina y e shelternan, pero no e club. Esaki tabata e alma y curazon pa esnan cu a keda biba den Eagle Colony.

Pa prepara e articulo mi a ricibi ayudo di mi primo Charles Pietersz ken a biba hopi aña na Eagle. E potretnan adhunto ta di e buki na Biblioteca Nacional (Bachstraat) publica na 1938 pa Gebiedsdeel Curacao – KvK en Nijverheid (J van Balen). Manda bo comentarionan pa clydeharms@yahoo.com

dowers dowers  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter